PM XANANA OBSERVA KONSTRUSAUN EDIFISIU FOUN BA KDTL

PM XANANA OBSERVA KONSTRUSAUN EDIFISIU FOUN BA KDTL

Dili, 21 Novembru 2025

Primeiru-Ministru (PM), Kay Rala Xanana Gusmão hamutuk ho Ministru Obras Públikas (MOP), Samuel Marçal observa kontrusaun edifisiu foun ne’ebé sei oferese ba grupu Klibur Defisiénsia Tilun Timor-Leste (KDTL), iha área Kampu Hudi-Laran, Fatuhada, Dili, Sesta-Feira ne’e.

Antes ne’e, iha loron 1 Setembru 2025, Primeiru-Ministru Kay Rala Xanana Gusmão  hala'o vizita bá maluk sira ne'ebé halibur-an iha Klibur Defisiénsia Tilun Timor-Leste (KDTL) hodi observa sira nia fatin la iha kondisoes atu hala’o servisu.

KDTL halibur maluk sira neʼebé ho problema tilun ka maluk sira ne'ebé labele rona no labele ko'alia ka baibain bolu defisiénsia tilun.

KDTL ne'e hanesan mós membru hosi Assosiasaun Defisiénsia Timor-Leste (ADTL) ne'ebé eziste hodi haree espesífiku-liu bá maluk sira ho defisiénsia tilun ho nia koordenadora maka Crecênsia Madeira de Deus.

KDTL foin mak hetan apoiu oitoan hosi ADTL ho Ministériu Solidariedade Sosiál no Inkluzaun (MSSI) hodi halo no dezenvolve formasaun sira mak hanesan dezenvolve Lian Jestuál, dezenvolve Lian Jestu Nasionál. Iha mós apoiu hosi Sekretária Estadu Igualdade (SEI) bá atividade sensibilizasaun nian.

Edifisiu foun ne’e tuir planu, KDTL sei uza hodi oferese formasaun bá maluk defisiénsia tilun 100-resin mai-hosi Munisípiu neʼebé diferente.

Maluk defisiénsia sira ne'e hela iha ida-idak ninia uma privada iha Dili laran no lorloron bá tuir formasaun iha sentru ne'e.*

Mídia-MOP