MINISTRU OBRAS PÚBLIKAS LANSA FATUK DAHULUK BA PROJEITU REHABILITASAUN ESTRADA HUSI CASA BA ZUMALAI

MINISTRU OBRAS PÚBLIKAS LANSA FATUK DAHULUK BA PROJEITU REHABILITASAUN ESTRADA HUSI CASA BA ZUMALAI

Covalima, 25 Novembru 2025

Ministru Obras Públiku, Samuel Marçal akompañia hosi Ministru Asuntus Kombatentes Libertasaun Nasionál, Gil da Costa Monteiro “Oan Soru”, Vise-Ministru ba Infraestruturas, Júlio do Carmo, Vise-Ministru ba Fortalesimentu Institusionál Saúde, José dos Reis Magno, Sekretáriu Estadu Dezenvolvimentu Lokál, Mateus dos Santos Tallo ho Prezidenti Autoridade Munisipiu Ainaro no Kovalima, hatur fatuk dahuluk ba projeitu rehabilitasaun estrada hosi Suku Casa, Munisipiu Ainaro bá Suku Webaba, Postu Adminsitrativu Zumalai, Munisipiu Kovalima,Tersa-feira ne’e.

Antes tama ba hatur dahuluk, lia-nain sira husi suku Raimea ho Mape, Postu Administrativu Zumalai hala'o ritual kultura nian hodi husu matak malirin ba beiala sira.

Iha nia deskursu hafoin lansa hatur tiha fatuk dahuluk ba projeitu rehabilitasaun estrada, Ministru Obras Públiku, Samuel Marçal husu ba Komunidade, Joven no Autoridade Lokal sira ne’ebé hela besik iha area konstrusaun hotu-hotu iha dever atu tau matan ba obra ida ne'e, bainhira obra ne’e remata, obra ne’e sei fo benefisiu ba populasaun hosi Munisipiu rua ne'e.

“Hafoin ita hatur tiha fatuk dahuluk ba projeitu rehabilitasaun estrada hosi Suku Casa, Munisipiu Ainaro bá Suku Webaba, Postu Adminsitrativu Zumalai, Munisipiu Kovalima, hau husu ba autoriedade lokal ho komunidade hotu tenki tau matan ba obra ne'e. Ne'ebe ohin ofisialmente ita lansa, konstrusaun Estrada ne’e konstrui durante tinan ida. Osan ne’ebé uja ba projetu ida ne'e, osan povu nian, povu ida ne'e maka luta fo sira nia vida tomak hodi hetan ukun rasik aan, tanba ne'e ohin ita mai iha ne'e partisipa no involve sente katak projetu ida ne'e ita hotu nian, tan ne'e ita hotu tenke tau matan", hatete Ministru Obras Públikas iha nia diskursu.

Ministru Obras Públikas haktuir, rehabilitasaun estrada husi Casa, Ainaro ba Webaba, Kovalima ne’ebé lansa ona ne’e konstrui husi empreza Aitula Unipessoal, Lda no China Overseas Engineering Group Co., Ltd. (COVEC).

“Tanba ne’e Hau husu ba empreza rua ne’e, bainhira ezekuta projeitu rehabilitasaun estrada ne’e tenke ezekuta tuir kontratu, tenke halo ho kualidade, husu mós ba PAM na'in rua atu tau matan hodi obra ne’e bele halo lalais ba komunidade sira, labele tuda ema nia ekipamentus, tesi ema nia fiu makina nian, tanba makina sira nee sosa karun hodi bele halo dezenvolvimentu diak ba ita nia rai rasik”, hateten Ministru Obras Públikas.

Iha fatin hanesan, Prezidenti Autoridade Munisipiu Ainaro, Manuela Georgina Carmo Bucar Corte Real lori povu husi Munisipiu rua agradese ba Governu liu husi Ministru Obras Públikas

“Agradese wain ba Governu liu husi Ministeriu Obras Públika, ami kontenti tebes reprezenta povu Ainaro suku Cassa espresa ami nia kontenti, tanba estrada nee prinsipal tebes ba atividade hotu ohin halo lansamentu ba estrada Ainaru Cassa liga ba Covalima Zumalai neebe mak durante nee sai preokupasaun ba komunidade sira povu iha Munisipiu rua nee”, hateten PAM Ainaru.

Nia mos husu ba empreza sira tenki halo ho kualidade, laos deit Obras Públikas mak tun halo akompañia maibe PAM mos akompañia.

“Laos deit Obras Públikas deit mak tun akompañia imi maibe ami Prezidenti Autoridade mos iha obrigasaun akompañia ita boot sira halo hotu lalais atu nunee ita nia komunidade sira liu ba mai lori sira nia produtu bele lao ho livre, seguru ho kondisaun estrada neebe mak diak”, hateten PAM Ainaru.

Iha sorin seluk, Prezidenti Autoridade Munisipiu Covalima, Miguel Armada Cardoso hato’o Bemvindo no agradese ba Ministru Obras Públikas no Membru Governu balun ne’ebé marka prezensa iha seremonia hatur fatuk dahuluk ba projeitu rehabilitasaun estrada iha Munisipiu Ainaru no Covalima.

“Iha tinan hirak nia laran ami halerik, maibe ohin liu husi lansamentu fatuk dahuluk ida nee bele halo kmaan komunidade sira hodi bele asesu Estrada ne’ebé diak, hau fiar katak tinan ida ka rua bainhira projeitu ne’e remata ona komunidade sira sei la halerik tan ba estrada, tanba ne’e husu ba kualker se deit ita hotu tenke tau matan hodi obra nee bele lao ho diak”, dehan PAM Covalima.

Entretantu projetu rehabilitasaun ne'e iha pakote rua, pakote ida kaer husi Kompañia Aitula Unipessoal, Lda Timor-Leste ho Orsamentu montante $4.023,143.73, Pakote ida kaer husi Kompañia Xina Overseas Engineering Group,Co.Ltd Xina ho  Orsamentu $4,856,254.24, rehabilitasaun estrada husi Ainaru Cassa liga bá Zumalai ho nia durasaun tinan ida.*

Mídia-MOP