MINISTRU OBRAS PÚBLIKA PARTISIPA FÓRUM DEZENVOLVIMENTU MERKADU ABITASAUN HODI SUPORTA DEZENVOLVIMENTU MERKADU IPOTEKA NO EFISIENTE IHA TIMOR-LESTE

MINISTRU OBRAS PÚBLIKA PARTISIPA FÓRUM DEZENVOLVIMENTU MERKADU ABITASAUN HODI SUPORTA DEZENVOLVIMENTU MERKADU IPOTEKA NO EFISIENTE IHA TIMOR-LESTE

Dili, 6 Março 2025

Ministru Obras Públika, Samuel Marçal iha Kinta-feira ne’e partisipa iha “Fórum Dezenvolvimentu Merkadu Abitasaun” iha salaun enkontru Ministeriu Finansas, Aitarak-Laran. Objetivu hosi fórum ne’e mak atu suporta dezenvolvimentu merkadu ipoteka ne’ebe efisiente iha Timor-Leste. Dezenvolvimentu merkadu abitasaun iha Timor-Leste sei fo benefisiu direita ba uma-kain Timor sira liu hosi hadiak mahon, seguransa no kriasaun empregu no iha tempu hanesan suporta mos kresimentu ekonomiku no aprofundamentu setor finanseiru.

“Fórum Dezenvolvimentu Merkadu Abitasaun ne’e loke direita hosi Vise-Primeiru-Ministru, Ministru Koordenador Asuntus Ekonomikus no Ministru Turizmu no Ambiente, Francisco Kaluadi Lay akompaña hosi Vise-Primeiru-Ministru, Ministru Koordenador Asuntus Sosiais no Ministru Dezenvolvimentu Rural no Abitasaun Komunitaria, Mariano Assanami Sabino.

Entretantu fórum ne’e organiza hosi Ministeriu Planeamentu no Investimentu Estratejiku (MPIE), Banku Central Timor-Leste ho International Finance Corporation (IFC).

IFC dadaun ne’e servisu hamutuk ho Governu Timor-Leste atu dezenvolve finansiamentu abitasaun iha Timor-Leste ho atensaun espesial ida ba emisaun ipoteka. Atu apoia ida ne’e, IFC kompleta ona avaliasaun diagnostiku detalladu kona-ba prokura abitasaun, asesibilidade, oferta iha prazu badak no ambiente politiku no regulamentar ba dezenvolvimentu abitasaun.

Objetivu hosi fórum ne’e atu permiti Instituisaun públiku no privadu sira ne’ebe involvidu iha setor abitasaun Timor-Leste atu halibur malu ba aprezentasaun analize foun ida kona-ba setor ne’e no diskusaun kona-ba prioritizasaun no sekuensia inisiativa sira atu apoia dezenvolvimentu merkadu abitasaun no emisaun emprestimu ipoteka.

Objetivu final hosi fórum ne’e mak atu kria konsensu kona-ba asaun importante sira ne’ebe atu hatama iha Roteiru ne’ebe propoin ona ba emisaun ipoteka.

Entretantu Governu Timor-Leste reprezenta hosi Ministeriu relevante sira ne’ebe inklui maibe la limitadu ba Banku Sentral Timor-Leste, Ministeriu Planeamentu no Investimentu Estratejiku, Ministeriu Justisa, Ministeriu Obras Públika, Ministeriu Finansas, Ministeriu Administrasaun Estatal no Ministeriu Dezenvolvimentu Rural no Abitasaun Komunidade.*

Mídia MOP