MINISTRU OBRAS PÚBLIKAS AKOMPAÑIA SUA EMINENSIA DOM VIRGILIO KARDEAL DO CARMO DA SILVA INAUGURA KAPELA NOSSA SENHORA MARIA AUXILIADORA DOS CRISTÃOS SUKU SABORIA

MINISTRU OBRAS PÚBLIKAS AKOMPAÑIA SUA EMINENSIA DOM VIRGILIO KARDEAL DO CARMO DA SILVA INAUGURA KAPELA NOSSA SENHORA MARIA AUXILIADORA DOS CRISTÃOS SUKU SABORIA

Aileu, 08 Novembro 2024

Sua Eminensia Dom Virgilio Kardeal do Carmo da Silva,SDB hamutuk ho Ministeriu Obras Públika (MOP), Samuel Marçal akompañia husi Sekretariu Estadu Asuntu Toponomia no Organizasaun Urbana (SEATOU), Germano Santa Brites ho Sekretáriu Estadu formasaun Profisional no Empregu (SEFOPE) inklui Padre, Madre, Autoridade Lokál, Lia Nain no Sarani sira hotu iha Suku Saboria, Inagura Kapela Nossa Señora Maria Auxiliadora dos Cristãos iha suku Saboria.

Iha intervensaun Sua Eminensia Dom Virgilio Kardeal do Carmo da Silva,SDB hato'o agradese bá Governu, tanbá iha ona inisiativa tulun sarani sira iha suku Saboria hodi rehabilita kapela ne'ebé sai uma kreda atu halo orasaun no hametin ida-idak nia fiar.

"Ami nafatin agradese bá Governu liu husi Ministeriu Obras Públikas (MOP) ne'ebé laran luak bele harii kapela furak ba sarani sira liu-liu ba devotu Maria Auxiliadora sira, ohin mós ha'u haree devotu balun mak iha ne'e ona", dehan Sua Eminensia Dom Virgilio Kardeal do Carmo da Silva SDB.

Igreja ne'e fatin bá ita sarani atu hasa'e ida-idak nia fiar, entaun ida ne'e sai sinál ida tanbá nu'udar ema fiar na'in uma kreda nian sai fatin ba ema hotu, la haree ba kór ka polítiku ida nian, iha kapela ida ne'e ita hotu nu'udar sarani ninia mahein maka na'in-feto Maria Auxiliadora.

Iha biban ne’e Sua Eminensia Dom Virgilio Kardeal do Carmo da Silva,SDB husu ba sarani sira iha ne'e atu tau-matan hodi garante fatin ne'e matak nafatin.

"Imi sira hela besik iha ne'e tau matan hodi ita garante nia di'ak no matak nafatin, nune'e tinan hirak mai tan bainhira vizita fatin ne'e nafatin furak, ida ne'e mak sinál gratidaun boot ida, la'ós simu de'it maibé tenke uza didi'ak”, hateten Sua Eminensia Dom Virgilio Kardeal do Carmo da Silva SDB.

Iha biban ne'e Ministru Obras Públikas (MOP), Samuel Marçal haktuir tuir loloos ohin Primeiru-Ministru marka prezensa iha ne'e, maibé tanbá iha ajenda importante balun ne'ebé presija atende, maibé agradese teb-tebes bá sarani sira iha ne'e bele koopera ho Governu hodi konklui obra ida ne'e.

"Ha'u agradese tebes bá ita boot sira bele koopera ona ho Governu, hodi konklui Obra ne’e, konstrusaun ne'e ita halo la to'o tinan ida, hau mós husu ba sarani sira atu utilija kapela ka igreja ne'e sai fatin ne'ebé atu transforma mudansa ba ita nia a'an liu-liu morál, atitude hodi dezenvolve bá nasaun ida ne'e," hatete Ministru Obras Públikas, Samuel Marçal.

Ministru Obras Públikas husu ba sarani sira atu labele halo igreja sai fatin Ospitál bainhira moras ona foin mai halo orasaun.

"Sarani sira labele konsidera kapela ne'e hanesan Ospitál, bainhira moras mak hakbesik an mai halo orasaun ne'e laloos, tanbá ne'e imi atu kuidadu fatin ida ne'e sai fatin sagradu no furak ba ema hotu", hateten MOP.

Entretantu Projetu reabilitasaun kapela Nossa Señora Maria Auxiliadora dos Cristãos hahu'u rehabilita iha loron 01 fulan-Novembru 2024 to'o loron 31 fulan-Maiu 2025 rehabilita husi Kompañia Quatro Colegas, Lda no hetan fundus husi Ministrériu Obras Públikas ho nia montante Orsamentu hamutuk $ 218,833.56 .*

Mídia-MOP