UIVP-MOP HO LAB NASIONAL-MOP SOBU MORU PROTESAUN NE’EBE KONSTRUI HUSI KOMPAÑIA LUCKY STAR TANBA LA PRIEMXE REKEZITU

Metinaru, 31 Agostu 2026

Ekipa tékniku Ministériu Obras Públikas liu husi Unidade Inspesaun, Verifikasaun no Pagamentu - UIVP hamutuk ho ekipa Laboratóriu Nasionál MOP, iha loron domingo ne’e sobu moru protesaun ho naruk 140 metru husi total 780 metru ne'ebé konstrui husi Kompañia LUCKY STAR iha Mota Mantelelau, Postu Administrativu Metinaro, Munisípiu Díli.

Ekipa UIVP-MOP ho ekipa LAB MOP bainhira tu'un ba terrenu deteta moru protesaun ne'ebé konstrui husi Kompañia LUCKY STAR iha indikasaun mosu irregularidade ba obra konstrusaun moru protesaun ne'ebé implementa iha Mota Mantelelau.

Hafoin ekipa tékniku MOP deteta irregularidade ba konstrusaun síklope, husi naruk total 780 metru, identifika iha 140 metru mak servisu la tuir métodu no prosedimentu servisu nian. Prosedimentu ne'e kona-ba mistura betaun ho fatuk no rai-henek. Loloos nia prosedimentu mak 60% betaun-konkretu no 40% fatuk.Aleinde ne'e, medida fatuk ne'ebé kompania uza la prienxe kritériu.

Tuir Loloos fatuk nia medida ne'e husi 15 sentímetru to'o 25 sentímetru. Maibé hafoin deteta iha terrenu, badaen sira uza fali fatuk ne'ebé ki'ik liu, la tuir padraun ne'ebé hatuur iha kontratu. Tanba ne'e, ekipa MOP deside sobu tiha metru 140 ne'ebé la prienxe rekezitus.*

Mídia-MOP