MINISTRU OBRAS PÚBLIKAS REALIZA MARCHA SAÚDAVEL HODI KOMEMORA ANIVERSÁRIU LORON KONSULTA POPULAR BA DALA-27

Dili, 28 Agostu 2026

Komemora Loron Konsulta Popular ba dala 27, Ministériu Obras Públikas - MOP realiza atividade Marcha Saudável iha Cristo Rei.

Komemorasaun ne'e hodi hanoin fali loron istóriku 30 Agostu 1999, ne'ebé povu Timor-Leste tomak ho vontade aas hili atu determina nia aan rasik.

Atividade Marcha Saudável ne'e lidera husi Ministru Obras Públikas, Samuel Marçal. Partisipante sira iha marcha ne'e mai husi funsionáriu Ministériu Obras Públikas, instituisaun tuteladas no dirijente sira husi MOP. Partisipa mós funsionáriu sira husi Ministériu Saúde (MS), ekipa husi Ministériu Prezidénsia Konsellu Ministrus (MPCM) , no Correios Timor Leste reprezenta Ministériu Transporte no Komunikasoens (MTK).

Atividade ne'e la'ós de'it atu promove saúde, maibé mós atu reforsa espíritu patriotizmu no unidade entre funsionáriu MOP nian ho funsionáriu sira husi liña ministeriál sira seluk.

Rota ba Marcha Saudável ne'e hahú husi pontu entrada área Cristo Rei, Dolok Oan, Rotunda Areia Branca no remata fali iha área Cristo Rei.

Ministériu Obras Públikas kontinua komprometidu atu kontribui ba dezenvolvimentu nasionál liuhusi hadi'a infraestrutura, hodi onra sakrifísiu povu nian iha luta ba ukun aan.*

Mídia-MOP