PM XANANA OBSERVA DIRETA PANEL RMU HO PANEL LV NE’EBE HETAN ESTRAGUS IHA BEKORA

Dili, 28 Agostu 2026

Primeiru-Ministru Kay Rala Xanana Gusmão, hamutuk ho Ministru Obras Públikas, Eng. Samuel Marçal, no Sekretáriu Estadu Asuntu Toponímia no Organizasaun Urbana - SEATOU, Germano Santa Brites Dias, akompaña husi Prezidente Komisaun Ezekutiva Eletricidade de Timor-Leste, Empresa Públika - EDTL, E.P., Paulo da Silva ho ekipa BIR-MOP, observa direta Panel RMU - Ring Main Unit no Panel LV - Low Voltage sistema underground nian ne'ebé hetan estragus husi ema deskonhesidu iha área oin Igreja Békora, kinta-feira ne'e.

Iha observasaun ne'e, PM Xanana kondena maka'as aktu vandalizmu ne'ebé komete husi ema deskonhesidu hasoru propriedade eletrisidade nian.

Aktu ne'e inklui sobu odamatan husi Panel RMU no Panel LV, no uza tinta pilox hodi pinta iha Panel RMU nia lolon.

PM Xanana husu ba autoridade relevante sira atu halo investigasaun lalais hodi identifika autór sira no aplika lei tuir prosedimentu ne'ebé vigora.

Xefe Governu mós husu ba komunidade sira atu kuidadu no proteje hamutuk infraestrutura públika sira, tanba infraestrutura ne'e benefísiu ba povu tomak. Se la kuidadu didi'ak, ema kontinua mai sobu no ikus liu ahi sei la lakan.*

Mídia-MOP