MINISTRU SAMUEL MARÇAL MARKA FALI PREZENSA IHA “PAGINA DO GOVERNO” HODI DISKUTE KONA-BA SERVISU NE’EBE HALAO IHA SETOR INFRAESTRUTURA

Dili, 27 Fevereiro 2026

Ministru Obras Públikas, Samuel Marçal, partisipa ohin, loron 27 fulan-fevereiru tinan 2026, iha gravasaun epizódiu foun husi programa "Página do Governo", ne'ebé aborda kona-ba projetus estratéjikus ne'ebé la'o hela no prioridades intervensaun nian iha setór infraestruturas.

Partisipasaun ne’e marka tan prezensa Ministru Samuel Marçal nian ba iha programa ne’e, hafoin sai bainaka iha epizódiu dahuluk, ne’ebé transmite iha loron 14 fulan-marsu tinan 2025, iha ne’ebé nia aprezenta liña estratéjika Governu nian ba setór infraestruturas, área sentrál ida ba dezenvolvimentu nasionál.

Iha ninia regresu ba " Página do Governo" ida-ne’e, entrevista foka ba ezekusaun no aplikasaun rekursus iha projetu infraestrutura estratéjiku sira. Aborda mós intervensaun estruturante sira ne'ebé la'o hela, no mós aspetu sira ne'ebé relasiona ho jestaun, manutensaun no responsabilidade sira ne'ebé iha ligasaun ho implementasaun obras. Iha programa ne’e, fahe mós perspetiva sira ba períodu 2026-2028, inklui estratéjia sira atu hamenus impaktu hosi inundasaun.

Ministériu Obras Públikas maka responsavel ba konsesaun, ezekusaun, koordenasaun no avaliasaun ba polítika públika iha área obras públikas, abitasaun, fornesimentu no jestaun bee, saneamentu, eletrisidade, no planeamentu urbanu, no asegura mós koordenasaun téknika no fiskalizasaun projetu konstrusaun no infraestruturas iha territóriu nasionál tomak.

Programa “Página do Governo” promove husi Gabinete Portavós Governu, ne’ebé lidera husi Ministru Prezidénsia Konsellu Ministrus, Agio Pereira. Programa ne’e prodús iha parseria ho Rádiu no Televizaun Timor-Leste no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.

Programa ne’e konta ho Nélia Chaves nu’udar aprezentadora no ho Ika Moniz hanesan produtora ezekutiva. "Página do Governo" sai hanesan espasu ida ba diálogu institusionál, ne'ebé foka liu ba interese públiku nian, atu bele garante  populasaun nia asesu ba asaun no desizaun prinsipál sira Ezekutivu nian.

Epizódiu ohin nian, hamutuk ho Ministru Obras Públikas, sei tranzmite iha tempu badak nia laran iha RTTL no iha plataforma dijitál no rede sosiál sira Governu nian.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE

𝘙𝘦𝘱𝘰𝘴𝘵 : 𝘔𝘦𝘥𝘪𝘢 𝘗𝘊𝘔

PT

Link para a a notícia completa no Portal do Governo:

https://timor-leste.gov.tl/?p=47557&n=1&lang=pt

EN

Link to the full article in the Government Website:

https://timor-leste.gov.tl/?p=47557&n=1&lang=en

Ministério das Obras Públicas-Samuel Marçal