PM XANANA HALAO DIALOGU HO KOMUNIDADE ALDEIA ROMIT

Dili, 23 Janeiru 2026

Ekipa Konjunta ne’ebé lidera husi Primeiru-Ministru (PM), Kay Rala Xanana Gusmão akompaña hosi Ministru Obras Públikas, Samuel Marçal, Sekretariu Estadu Asuntus Toponímia no Organizasaun Urbana (SEATOU), Germano Santa Brites Dias no Munisípiu Dili hala’o diálogu ho populasaun iha Aldeia Romit, Suku Becora, Postu Administrativu Cristo Rei iha Sesta-feira ne’e.

Inisiativa hodi realiza diálogu ne’e atu esplika bá populasaun afetadu bá projetu alargamentu estrada diresaun ponte Maufelu bá Becusse.

Xefe Governu esplika, dala ruma Governu atu hasai desizaun difísil uitoan tanba soke fali ho interese privadu, soke fali ho direitu privadu maibé dezenvolvimentu tenke la’o tanba ne’e mak husu atu kolabora nune’e dezenvolve rai ne’e bá oin.

SEATOU sobu tun-sa’e ne’e la’ós bá ninia-an maibé atu fasilita populasaun sai hosi uma hala’o vida lorloron nian fásil liu.

“Ami mai ko’alia sobu ne’e laos sobu deit, laos kaer soe deit bá mota laran. Hanesan sidadaun ne’ebe hakarak sidade Dili sai furak ita presija kontribui ba dezenvolvimentu iha ita nia vida laiha problema ne’ebé laiha solusaun no problema hotu-hotu sempre iha solusaun, ita hatudu ona iha tinan 24, kilat oituan deit, kilat musan mós oituan deit. TNI Okupa fatin hotu-hotu difisil tebtebes maibe ita hetan solusaun. Povu ho kilat ida la tarutu tu’u deit surat tahan mutin ita konsege duni inimigu sai. Ida ne’e hanesan ezemplu ida ba ita, problema bele mosu maibe sempre iha solusaun. Labele haluha sira ne’ebé mate, sira la husu buat ida ba ita, sira mate atu ita ukun-an no ita ne’ebé moris bele hadia hodi senti ukun-an”, hateten PM Xanana bainhira halo dialogu ho komunidade sira.

Konaba alargamentu estrada ne’e rasik Governu sei foti tan medida metru sia hosi hela fatin komunidade nian iha parte liman-loos no liman-karuk. Maski nune’e, ekipa seidauk bele tun halo despezu administrativu tanba sei halo levantamentu dadus bá uma-ka’in sira ne’ebé sei afeta bá alargamentu estrada ne’e.

Estrada ne’e sei gasta osan millaun $2.6 ne’ebé sei responsabiliza hosi kompañia Ruvic Construction.

Dialogu ho komunidade ne’e iha terrenu Primeiru-Ministru akompañia hosi Ministru Obras Públikas, Samuel Marçal, Sekretáriu Estadu Asuntus Toponímia no Organizasaun Urbana, Germano Santa Brites Dias, Sekretaria Estadu Eletrisidade Água no Saneamentu, Santos Noronha, Diretór Jerál Terras no Proriedades, Lucas António da Costa inklui ekipa tékniku Ministériu Obras Públikas.*

Mídia-MOP