MINISTRU OBRAS PÚBLIKAS SELEBRA NATAL HAMUTUK NO REALIZA REFLESAUN HODI HAKBI’IT KUALIDADE DESEMPEÑU SERVISU NU’UDAR SERVIDOR ESTADU

Dili, 18 Dezembru 2025

Ministériu Obras Públika (MOP) iha kinta-feira ne’e selebra natal hamutuk inklui realiza reflesaun ho objetivu hakbi'it kualidade servisu funsionáriu nu'udar servidór estadu hodi atinji metas iha tinan 2026.

Iha seremónia Ministru Obras Públikas, Samuel Marçal hateten Ministériu ida-ne'e importante tebes no iha responsabilidade ne’ebé boot hodi garantia dezenvolvolvimentu infraestrutura iha Timor laran.

“Responsabilidade ne'ebé jerente sira kaer ne'e liga direta ba moris povu nian no nasaun nia dezenvolvolvimentu tanba ko'alia kona-ba infraestrutura ita presiza atu servisu maka'as tanba infraestrutura ne'e MOP nia responsabilidade hodi sai hanesan baze ida ba setór sira seluk” hateten Ministru Obras Públikas.

Ministru Obras Públikas haktuir bainhira jerente sira lahalo servisu hanesan ema servidor ida ne’e sei fo ameasa ba área infraestrutura no sei fó impedimentu ba prosesu dezenvolvimentu hodi hamate mós setór sira seluk hanesan edukasaun, saúde, turizmu no agrikultura.

Tamba ne'e, presiza Eleva mákina Estadu atu halo funsionamentu ho di'ak, nasaun ne'e bainhira atu la'o ba oin xave no destinu ne'e mak iha Ministériu Obras Públikas nia liman.

“Maske servisu balun ladun másimu maibé ita konsege atinje ona planu ka programa Governu IX konstitusinál nian. Ha'u fiar katak antes mandatu remata ita-nia servisu bele konklui tuir meta ne'ebé ita iha, atu povu bele sente mudansa infraestrutura iha baze”.

Iha biban ne’e Ministru Obras Públikas apela ba instituisaun tutelada sira no forsa traballu funsionáriu Ministériu Obras Públikas sira hotu atu nafatin esforsu no hatudu kualidade dezempeñu servisu ne'ebé di'ak.

Entretantu partisipa iha atividade reflesaun no selebra natál hamutuk ho funsionáriu sira ne'ebé hakna’ar a’an iha Ministériu Obras Públikas no instituisaun tuteladas sira, Vise Ministru Infraestrutura, Julio do Carmo, Sekretariu Estado Eletrisidade Bee no Saneamentu, Santos Noronha, Ministru Planeamentu Investimentu Estratejiku, Gastão Francisco de Sousa, SEATOU, Germano Santa Brites Dias, Sekretariu Estado Formasaun Emprego, Rogerio Araújo Mendoça, Embaixador Japaun ba Timor Leste, Kimura Tetsuya, parséru dezenvolvimentu ho empreza nasional.*

Mídia MOP