PM XANANA KONTINUA HATUUR FATUK DAHULUK BA ESTRADA LAUTEM BA LOSPALOS NO PROJEITU MELHORAMENTU NO FORNESIMENTU BEE MOOS IHA LOSPALOS VILA

Lautem, 31 Outubru 2025

Nonu Governu Konstituisionál Primeiru-Ministru, Kay Rala Xanana Gusmão akompania hosi Ministru Obras Públikas, Samuel Marçal, kontinua hatur fatuk dahuluk bá projetu reabilitasaun estrada Lautém ba Lospalos ho kilometru 27.980 no projeitu melloramentu no fornesimentu bee moos iha munisípiu Lautein, postu-administrativu Lospalos, sesta-feira ne’e.

Iha oportunidade ne'e Primeiru-Ministru, Kay Rala Xanana Gusmão, hateten, ohin marka istoria foun hadi mai asisti hamutuk asina akordu entre Governu ho kompania rua, kona-ba projeitu reabilitasaun estrada no instalasaun bee moos.

“Ohin ita hotu mai hamutuk iha ne'e hodi haree hamutuk asina akordu entre Governu ho kompania rua, ida kona-ba estrada no ida kona-ba bee moos. Hanesan ohin temi tiha ona infraestrutura bázika mak sai fundasi ba dezenvolvimentu hanesan estrada, bee, ponte, eletrisidade, entaun bainhira buat sira ne'e mak iha ona ita bele la'o ba hasoru dezenvolvimentu”, dehan PM Xanana.

PM Xanana afirma hafoin Membru Governu da-sia simu posse, hahu’u kria orden atu halo servisu hodi servi povu no hatan ba povu tomak nia halerik.

Iha fatin hanesan, Ministru Obras Públikas, Samuel Marçal hateten orgullu tebes bele mai iha Lospalos hodi bele partisipa iha atividade serimónia hatur fatuk dahuluk bá projeitu reabilitasaun estrada no projeitu melloramentu ba fornesimentu bee moos, ne'e hatudu imi-nia unidade, maske iha diferente polítika maibé iha prosesu dezenvolvimentu imi hotu hamutuk nafatin.

"Ohin mai iha ne'e atu lansa projetu boot rua ida ba estrada no ida seluk maka melloramentu ba fornesimentu bee moos, ne'ebé ninia prosesu ne'e kuaze tinan ida liu", dehan Ministru Obras Públikas.

Ministru Obras Públikas haktuir ohin asina kontratu ho kompania manán na'in sira iha komunidase nia oin tamba osan ne'e, osan povu nian entaun tenke envolve ema hotu hodi sai sasin ba iha asina kontratu ne’e, tamba ne'e ema hotu ne’ebé marka prezensa iha ne’e iha direitu atu tau matan ba prosesu dezenvolvimentu ida ne'e.

"Osan ne’e povu nian, entaun tenke envolve ema hotu hodi sai sasin ba iha asina kontratu ne’e, tamba ne'e ema hotu ne’ebé marka prezensa iha ne’e iha direitu atu tau matan. Husu bai ta bo’ot sira labele halo impedimentu atu servisu ne'e bele konklui tuir tempu tamba iha fatin seluk mós sei presiza Governu atu hadi'a estrada,"hatete Ministru Obras Públikas.

Iha oportunida ne'e Ministru Administrasaun Estatal, Tomas do Rosário Cabral,hatete nia sei la ko'alia barak tamba ohin autoridade ko'alia ona, maibé nia sei orienta bá autoriedade lokal sira iha munisípiu inklui xefe suku sira atu tau matan ba projetu sira ne'ebé lansa ona.

"Lansamentu ba estrada no bee moos ne'e la'o tiha lakleur imi ba halo impedimentu, hanesan munisípiu balun la fó apoiu ba projetu sira ne'e, tamba ne'e mak projetu atu benefísiu ba povu entaun autoridade lokál sira tenke ba halo fiskalizasaun hodi ajuda programa ne'e bele la'o ho di'ak,"tenik Ministru Administrasaun Estatal.

Entretantu Prezidente autoridade munisípiu Lautein, Mélio de Jesus, iha biban ne’e, hato'o agradese bá Governu da-sia ne'ebé ho komitmentu boot no kompromisu hodi lori dezenvolvimentu ba timor laran tomak.

"Aproveita oportunidade ida ne'e lori komunidade tomak iha lospalos agradese ba Governu da-sia nia esforsu tomak, maibé ami husu mós atu mellora reabilitasaun estrada ba parte seluk hanesan, Iliomar, Loré,"dehan PAM Lospalos.

Enkuantu projetu reabilitasaun estrada ne'e sei implementa husi kompania internasionál ChongQing durante tinan ida ho balun ho montante orsamentu $18,836,713.10.*

Mídia-MOP