PM XANANA OFISIALMENTE LANSA PROJETU REHABILITASAUN ESTRADA HOSI LAUTEM BA SUKU COM

Lautem, 30 Outubru 2025

Nonu (IX) Governu Konstituisionál ne’ebé lideradu husi atual Primeiru Ministru (PM) akompañia husi Ministru Obras Públikas, Samuel Marçal no Membru sira seluk ofisialmente lansa projetu rehabilitasaun estrada husi Posto Administrativu Lautem bá Suku Com, Munisipiu Lautem.

Iha nia intervensaun Primeiru-Ministru, Kay Rala Xanana Gusmão, suntu infraestrutura ne'e pertinente tebes iha programa nonu governu konstituisionál ne’ebé Planeamentu Estratéjiku Dezemvolvimentu Nasionál (PEDN) 2011 to'o 2030, ne'ebé define katak infraestrutura bázika mak sai hanesan baze ba dezenvolvimentu ne'ebé klasifika tiha ona estrada nasionais, rejionais, lokais no estrada rurais.

"Ohin ha'u mai iha ne'e liuliu imi komunidade sira hodi asiste asinatura kontratu entre Governu ho kompania atu hadia estrada ba imi komunidade sira, tamba iha fatin balun sempre iha indemnizasaun no lakoi fo fatin atu hadia estrada", Xefe Governu ne'e afirma iha ninia diskurus ne'ebé realiza iha suku Com, Munisípiu Lautem.

Xefe Governu dehan, kontente tebes tanba atividade ohin Governante sira balun mai partisipa iha seremónia ne’e i kontente tebes haree ferik katuas sira marka mós prezensa iha ne'e.

Entretantu Ministru Obras Públikas, Samuel Marçal hatete iha okaziaun ida ne'e nia hato'o agradese wai’in bá ekipa ne'ebé servisu hamutuk hodi realiza obra ida ne'e bele la'o.

"Kuazé ita hotu ninia servisu maka'as durante tinan ida to'o ohin loron ita konsege realiza projeitu reabilitasaun estrada ne’e. Tanba ne’e hau husu bá ita hotu nia kolaborasaun, atu nune’e obra ida ne'ebé ita lansa, bele konklui tuir kontratu ne'ebé iha, tanba osan ne'e povu nian, husu ba ita hotu-hotu atu tau matan no fó apoiu atu labele halo impedimentu”, hatete Ministru Obras Públikas.

Iha fatin hanesan, Prezidente Autoridade Munisípiu Lautem, Mélio de Jesus hateten hanesan ita hotu hatene durante tinan barak nia laran komunidade Munisípiu Lautem infrenta difikuldade iha setór infraestrutura bázika, hanesan iha Lospalos ba Lautem no Lautem ba Com, nu'udar loron importante tebes ita hotu halibur iha ftin ida ne'e atu marka signifikante iha istória dezenvolvimentu Lautem nian maka lansamentu ofisiál ba projetu reabilitasaun estrada diresaun Lautem ba Com.

“Tanba ne’e aproveita oportunidade ida ne’e, reprezenta komunidade Munisípiu Lautém hakarak hatoo Obrigadu wain ba “Kaka-Lafai” Kay Rala Xanana Gusmão nia esforsu tomak ne’ebe lahatene kolen, sempre hadomi nia Povu no ohin loron sei kontinua luta ba prospriedade povu Timor-Leste iha rai laran no mós iha nivel Internasionál.

PAM Lautem haktuir lansamentu projetu ida ne'e nu'udar resposta konkretu ba preokupasaun no ejijénsia komunidade sira-nia, maibé agora di'ak ona ba sira atu halo movimentu hodi lori sira-nia produtu ba faan.

Projetu reabilitasaun estrada diresaun ida ne'e kuazé kilometru 19.760 no sei implementa husi kompania internasionál Shananxi Construction Engineering Group durante tinan ida ho balun ho montante $11,213,813.90.

Enkuantu iha atividade lansamentu ne'e partisipa husi entidades Governu, Autoridade Lokál, Autoridade seguransa PNTL, parséria dezenvolvimentu no komunidade sira.*

Mídia-MOP