PREZIDENTE REPÚBLIKA ORGANIZA SEMINARIU NASIONAL HO TEMA “PAPEL JERASAUN FOUN IHA KONTESTU DEZENVOLIMENTU NASIONAL HODI HATUTAN OBRA JERASAUN TUAN”

Dili, 02 Setembru 2025

Prezidente Repúblika, José Ramos Horta abertura seminariu nasional ho tema “Papel Jerasaun Foun iha Kontestu Dezenvolvimentu Nasional Hodi Hatutan Obra Jerasaun Tuan” atividade ne’e realiza iha salaun Xina, Palásiu Prezidensial, Aitarak-Laran, Tersa-feira ne’e.

Orador Prinsipal ba seminariu ne’e mak Primeiru Ministru (PM), Kay Rala Xanana Gusmão ne’ebe hato’o nia palestra ho tema “Jerasaun foun no Lideransa; Dezafiu no Oportunidade”.

Iha nia palestra Primeiru Ministru (PM), Kay Rala Xanana Gusmão apela ba jerasaun foun sira tenke uza meiu hotu-hotu hodi kontribui ba Nasaun, tanba futuru Timor-Leste iha foinsa’e sira nia liman.

 “Jerasaun foun sira tenke hanoin ba saida mak nia bele halo hodi labele ba estuda deit buka mak atu sai funsionariu públiku maibe tenki hanoin oinsa kontribui ba dezenvolvimentu nasaun nian. Vizaun ba futuru hakarak Timor ne’e atu sai oinsa. Tanba ne’e husu ba joven sira labele hanoin hau tenke ba tuur iha Governu, ba tuur iha Parlamentu, ida ne’e egoizmu demais, individualizmu demais” hateten PM Xanana iha nia Palestra.

Entretantu Orador Prinsipal iha parte loraik Vise-Primeiru-Ministru, Ministru Koordenador Asuntus Sosiais no Ministru Dezenvolvimentu Rural no Abitasaun Komunitaria, Mariano Assanami Sabino ne’ebe aprezenta “Kolaborasaun Jerasaun Foun no Tuan ba Dezenvolvimentu Nasional”.

Partisipa iha serimonia ne’e Ministru Obras Públika, Samuel Marçal, Eis Vise-Ministru Edukasaun, Kultura, Joventude no Desportu, Roque Rodrigues, Xefe Estadu Maior Jeneral FALINTIL Forsa Defeza Timor-Leste (F-FDTL) Tenente Jeneral Reformadu Lere Anan Timur, Membru Governu da-IX, Komandante Jeral Polisia Nasional Timor-Leste (PNTL), Komisariu Jeral Polisia, Henrique da Costa, Prezidente Autoridade Munisipiu 13 inklui estudante hosi Universidade sira.*

Mídia-MOP