MOP-SEATOU INAGURA PROJEITU ELETRIFIKASAUN NASIONAL, NE’EBE MAKA EDTL,E.P. KOMPLETA ONA IHA SUKU BETULAU-LIQUIDOE

Aileu, 05 Juñu 2025

Ministru Obras Públika, Samuel Marçal akompanha hosi Sekretariu Estado Assuntu Toponímia no Organizasaun Urbana, Germano Santa Brites Dias, Prezidente Ezekutivu EDTL,E.p., Paulo da Silva, Prezidente Autoridade Munisipiu Aileu, João Bosco dos Santos hamutuk ho Autoridade Lokal halo inagurasaun ba projeitu eletrifikasaun nasional (PEN) iha Liquidoe Betulau Naumata-Sabere-Builoko, Munisipiu Aileu.

Iha intervensaun Ministru Obras Públika, Samuel Marçal hatete Nasaun ida ne’e povu mak hari’i tanba ne’e hanesan membru Governu ida ne’ebe lidera hosi Primeiro-Ministru, Kay Rala Xanana Gusmão prontu atu servi povu  no rai ida ne’e, ohin ita inagura eletrisidade iha suku Betulau.

“Betulau suku ikus ne’ebe foin asesu ona eletrisidade ba futuru Governu sei hamutuk EDTL,E.p. sei foku ba implementasaun programa eletrifikasaun komunitaria no programa enerjia rural ba aldeia sira ne’ebe ita identifika ona seidauk asesu enerjia eletrika. Parabens ba imi hotu iha Betulau tanba desde tempu Portugues mai to tempu Indonezia, ohin imi bele asesu ona eletrisidade” dehan Ministru Obras Públika.

Ministru Obras Públika apela mos ba joven sira atu nafatin hadomi Paz hodi nune’e dezenvolvimentu bele lao to’o mai iha nivel suku no aldeia.

Iha fatin hanesan Sekretariu Estadu Assuntu Toponímia no Urbana, Germano Santa Brites Dias husu ba komunidade sira utiliza eletrisidade ho didiak, dehan SEATOU.

Prezidente Autoridade Munisipiu Aileu, João Bosco dos Santos haktuir Betulau suku ida ikus liu iha tertarik Timor Laran asesu ona eletrisidade, tekniku administrador munisipiu Aileu. Apela mos ba autoridade seguransa sira liu-liu membru PNTL (OPS) ne’ebe destaka iha kada suku atu asegura.

Entretantu Prezidente Komisaun ezekutiva, Dr. Paulo da Silva informa dadaun ne’e EDTL,E.p. prepara ona dezenu BoQ ba aldeia 127 ne’ebe seidauk asesu enerjia eletrika, tuir estimasaun EDTL,E.p. sei konklui taxa 100% asesu enerjia eletrika iha teritoriu nasional  iha tinan 2026.

“Rasio eletrifikasaun nivel suku to’o ona 100%. Presija kooperasaun diak ho komunidade agradese ba kompanha ne’ebe mai instala ona eletrisidade iha suku Betulau”, hatete Prezidente EDTL,E.p.

Projeitu Eletrifikasaun Nasional iha suku Betulau implementa hosi kompanha Lemalaku ho volume servisu instalasaun Liña media tensaun 2 kilometro sirkuitu, Liña baixa tensaun 9.9 kilometru sirkuitu, instalasaun transformador ho kapasidade 50 kVA, total benifisiariu uma-kain 231.

Implementasaun Projeitu Eletrifikasaun Nasional iha suku Betulau hanesan suku ikus ne’ebe asesu ona enerjia eletrika ho nune’e EDTL,E.p konklui ona taxa 100% asesu eletrisidade nivel suku iha teritoriu Timor-Leste.*

Mídia MOP