Dili, 22 Junnu 2023: Ministru Obras Públikas (MOP), Eng. Abel Pires da Silva, partisipa iha reuniaun dahuluk Lejislatura daneen (VI) nian, no iha reuniaun ne’e deputadu sira eleita deputada Fernanda Lay husi partidu CNRT hodi asumi kargu nu’udar Prezidente Parlamentu Nasionál VI Lejislatura nian ba periodu 2023 to’o 2028 ho votus afavór 45, kontra 0, abstensaun 19 no branku 1.

Reuniaun dahuluk VI lejislatura nian ne’e lidera husi Prezidente Parlamentu Nasionál (PN) sesante, Sr. Aniceto Longuinhos Guterres Lopes, partisipa husi deputadu eleitu 65 husi partidu polítiku hanesan partidu CNRT, FRETILIN, PD, KHUNTO no PLP.

Iha reuniaun ne’e asiste mós husi Prezidente Tribunál Rekursu (TR), Sr. Deolindo dos Santos, membru VIII Governu Konstitusionál, Korpu diplomátiku, sosiedade sivíl no konvidadu sira.