MINISTRU OBRAS PÚBLIKA HATUR FATUK DAHULUK BÁ KONSTRUSAUN PONTE MALI LOEK

Covalima, 22 Novembru 2024

Ministru Obra Públika, Samuel Marçal, akompaña husi Vise-Ministru, Júlio do Carmo, Prezidente Autoridade Covalima, Miguel Armada Cardoso, Diretor Jeral Ponte no Estrada, Nene Lobato, Kordenador Unidade Inspesaun Verifikasaun no Pagamantu. Aleixo do Carmo Amaral, Diretur Jeral SEFOPE no Prezidenti IGE-ADI, Ana Paula da Cruz, hatur fatuk dahuluk ba konstrusaun ponte Mali-Loek ne'ebé lokaliza iha Aldeia Sanfuk, Suku Camanasa, Postu Administrativu Suai.

Iha nia deskursu Ministru Obras Públika,hatete, iha tinan hirak ba kotuk dezenvolvimentu iha Timor Leste la lao, insfraestrutura publiku sira hanesan, estrada ho ponte barak mák kotu, tanba ne’e Ministeriu Obras Públika iha nia responsabilidade atu rezolve prolema hirak ne’e.

"Ita tinan hirak bá kotuk, ita-nia dezenvolvimentu la funsiona. Ha'u kuaze la'o iha Timór laran tomak, hare ponte barak kotu no estrada aat, ho situasaun sira ne'e mak Governu iha responsabilidade tomak atu hadia ponte no estrada sira ne’ebé aat, projeitu ida ne'e mós faz parte hosi komprisu IX Governo nian, tamba ne'e husu bá autoridade no komunidade sira atu kontribui hodi bele aselera projetu ne'e hodi bele finaliza tuir tempu, ne'ebé determina ona iha kontratu,"hatete Ministru Obras Públika iha nia deskursu.

Antes atu taka nia deskursu, Ministru Obras Públik, husu ba empreza Djeje Oal Unipessoal Lda,tenke konstrui ponte ho kualidade no labele haree ba orsamentu, tanba ida-ne'e hanesan fó oportunidade ba empreza atu aprende hodi kontribui ba dezenvolvimentu iha Timor-Leste.

Iha fatin hanesan Prezidente Autoridade Covalima, Miguel Armada Cardoso, hateten, hafaoin halo tiha lansamentu espera konstrusaun ponte Mali-Loek ne'e, bainhira remata no inaugural bele fasilita komunidade atu halo movimentu ho transporte publiku no privada.

"Tinan barak ita hotu hein no kada tinan komunidade sempre partilla informasaun kona-ba kondisaun ponte Mali-Loek Sanfuk ne'ebé difísil halo movimentu bainhira iha tempu udan. Ohin loron ita haksolok lansa fatuk dahuluk ba konstrusaun ponte,"nia dehan.

Entretantu orsamentu ba kontrusaun ba ponte Mali Loek, Sanfuk hamutuk $1,119.530,98 tuir kontratu obra ne'e sei halo durante fulan ualu.

Partisipa iha seremónia hatur fatuk dahuluk, Prezidente Administrasaun Munisípiu Covalima, Komando PNTL  Covalima, Autoridade Posto ho Xefe Suku sira.*

Mídia-MOP