Dili, 19 Outubru 2023

Ministru Obras Públika-Samuel Marçal akompania hosi Vogal Instituto do Gestão de Equipamentos e Apoio ao Desenvolvimento Infrastruturas (IGE-ADI), inklui oan mane hosi Primeiru Ministru Kay Rala Xanana Gusmão, Kay Olok Gusmão,iha kinta-feira ne'e kontinua hamos bee dalan ne'ebé nakonu ho foer.

Atividade limpeza ne'e rasik Ministru Obras Públika ho nia ekipa hala'o iha aldeia São Miguel-Aimutin, Suku Komoro, Posto Administrativu Vera Cruz.

Iha biban ne'e Ministru Obras Públika,kontinua apela ba komunidade ne'ebé hela besik iha valeta ninin Area Delta mai Aimutin, labele soe foer ba iha valeta bee dalan.

"Hau kontinua apela ba komunidade sira ne'ebe hela besik iha valeta ninin, hahu hosi area Delta mai Aimutin, labele soe foer ba iha valeta bee dalan, se ita boot sira kontinua soe foer ba iha valeta laran, bainhira udan monu rai, foer sira ne'e halo intupidu, bele akontese inundasaun," hatete Ministru Obras Públika, bainhira remata hamos bee dalan, iha area Aimutin.

Iha limpeza ne'e komunidade balun inklui alin mane kiik oan sira, ne'ebé hela besik iha ne'eba entuziaismu tebes akompañia Ministru Obras Públika, hodi tu'un direta ba valeta laran hodi hamos foer.(*)

Mídia-MOP