Manufahi 21 Outubru 2023

Ministru Obras Públika-Samuel Marçal, akompañia hosi Prezidente Komisaun Ezekutiva Eletricidade de Timor-Leste, Empreza Públika, (EDTL, E.P)-Paulo da Silva-,Supervizor EDTL, E.P Manufahi, Diretur Ezekutivu IGE-ADI- Sonio Anunu Sarmento da Silva inklui tékniku PMU, Ofisiálmente halakan eletrisidade bá komunidade uma kain 80 resin iha Daur, Aldeia Loti, Suku Daisua, Postu Administrativu Same Vila, Munisípiu Manufahi, liu-husi Programa Eletrifikasaun Komunitária (PEK).

Hafoin Ofisiálmente halakan tiha ahi eletrisidade, Ministro das Obras Públicas, sente orgullu no kontenti tanba durante tinan naruk hahu’u hosi tempu Indonezia to’o mai ukun a’an, komunidade Daur ba dahuluk foin senti naroman hosi eltrisidade.

"Agradese ba komunidade sira ne’ebe kontribui no kolabora ho EDTL, E.P hodi instala liña eletrisidade iha aldeia ida ne’e, hodi ohin sabado ne’e, ita bele mai halakan ahi eletrisidade, hau hatene katak durante tinan naruk imi la senti naroman hosi eletrisidade hahu’u hosi tempu Indonezia to mai mai ukun a’an, imi foin senti naroman ne’e,"kestaun ne’e hato’o hosi Ministru Obras Públika hafoin Ofisiálmente halakan eletrisidade, iha aldeia Daur, sabado ne’e.

Iha biban ne’e Ministru Obras Públika, apela mos ba komunidade sira iha aldeia Daur, bainhira utiliza enerjia elétrika tenke uza ho didiak no kuida aparelu elétriku ne’ebé instala hosi tekniku atu nune’e bele uza to tempu naruk.

Iha sorin seluk Xefe Suku Daisua Amorin da Costa, hato agaradese ba EDTL,E.P ne’ebe ho esforsu makas hodi dada lina eletrisidade ba komunidade sira iha Aldeia Daur no Bubur Laran, nune’e ohin Ministru Obras Públika ho Komisaun Ezekutiva EDTL, E.P, Ofisiálmente mai halakan ona.

"Agradese bá EDTL,E.P. ne'ebé esforsu makas hodi dada liña eletrisidade hodi fornese enerjia elétrika bá Komunidade sira iha aldeia Daur no Bubur Laran,"hatete lider komunitaria ne’e.

Xefe Suku Daisua , informa, suku Daisua rasik kompostu husi aldeia tolu, dadaun ne’e aldeia tolu ne’e assesu hotu ona enerjia eletrisidade.

Iha Biban ne’e Prezidente Komisaun Ezekutiva EDTL,E.P.-Paulo da Silva hato apresiasaun no agradesemente bá komunidade hotu ne’ebé mak ho vontade akompañia ekipa tekniku EDTL,E.P Munisipiu Manufahi hala’o servisu komunitaria dada lina eletrisidade ba komunidade sira iha Aldeia Daur hodi hasai sira hosi nakukun ba naroman.

"Husu ba ita bo’ot sira bainhira uza eltrisidade tenke uza eletrisidade ho seguru no responsabilidade,Ahi lori naroman maibé fó risku bá vida, nune'e husu kontaktu tékniku EDTL, E.P bainhira presiza halo ligasaun ruma,"dehan Prezidente Komisaun Ezekutiva EDTL,E.P.

Alende ne’e Prezidente Komisaun Ezekutiva EDTL,E.P informa mós ba komunidade sira, iha diretu atu uza eletrisidade gratuita to'o fulan neen (6), hafoin fulan 6 remata ekipa tékniku sira hosi EDTL,E.P sei mai halo sosialiazasaun no hodi monta kontador.

Antes atu remata Prezidente EDTL,E.P. informa mos ba aldeia sira ne’ebé seidauk assesu eletrisisade atu hatama proposta,nune’e bele hatama ba iha planu hodi asselera prosesu dada eletrisidade bá komunidade. EDTL iha programa rua bain-bain bolu Programa Eletrifikasaun Komunitáriu no Progama Distribuisaun Solar Panel, solar panel ne’e atu distribui bá komunidade sira ne'ebé hela iha areas remotas.

Entretantu reprezentante Joventude-Filomeno da Costa, hato agradese wain ba Governu liu-husi Ministériu Obras Públika no EDTL,E.P. ne’ebé servisu maka’as hodi instala ona lina eletrisidade iha Aldeia Daur hodi lorin naroman mai komunidade no transforma ona komunidade sira hosi nakukun bá naroman.

Programa Eletrifikasaun Komunitária ho distánsia liña MT 3 Kms no liña BT 1,45 Kms fo ona benifisia komunidade uma-kain 80 resin assesu eletrisidade. Prosesu dada lina eletrisidade ba komunidade Daur hahu uluk ho seremonia kultural no servisu ida ne’e rasik hetan mos apoio hosi komunidade musulmanu ne'ebé hela iha area Bubur Laran, Luak.(*)

Mídia-MOP