Dili, Segunda, 03 Julhu 2023-Ministru Obras Publika Foun Samuel Marçal, hafoin simu pose iha loron Sabado 01 fulan Julho 2023. Ohin Segunda feira 03 Julho 2023 oras 8:30 hamutuk ho Vise Ministru MOP inklui Secretário de Estado da Eletricidade, Água e Saneamento hala'o audiénsia Ministru sesante Obras Publika Abel Pires da Silva ho diretór kargu xefia sira iha ministériu Obras Publika inklui Prezidenti EDTL.ep ho BTL.ep.

"Hau ohin mai iha ne'e halo introdusaun no halo koñesimentu ho staff sira ho diresaun sira ne'e hotu, mais sira ne'e"e seidauk hotu, ha'u hanoin sei bele kontinua ba aban tanba orsida loraik sei iha reuniaun Konsellho Ministru,"dehan Ministru Obras Publika iha edifísiu Obras Publika,Kaikoli.

Iha biban ne'e MOP Samuel Marçal hatete, servisu sira ne'ebé atu hala'o iha mandatu tinan 5 ne'e, maka kontinua hala'o atividade sira ne'ebé ligadu ho obras hirak ne'ebé ministru sesante halo, inklui saida mak bele sei kontinua hadi'a no halo tan.

"Atividade sira ne'ebé atu hala'o iha mandatu tinan 5 ne'e la'ós buat foun, ne'e hanesan kontinuasaun ba obra sira ne'ebé ministru sesante halo ona, ita sei hare saida mak ita bele kontinua hadi'a no saida mak ita bele kontinua halo tan,"

Ministru obras hatutan, klaru katak povu sei presiza nafatin ministériu nia apoia tanba ne'e presiza servisu makas hodi responde ba nesesidade povu nian.

Ligadu ho estatutu EDTL.ep ho BTL.ep Ministru Obras ne'ebé dadaun ne'e iha ona ona ba iha Secretário de Estado da Eletricidade, Água e Saneamento nia okos karik sei muda ba diresaun ou mantein nafatin, ministru Obras haktuir, kona-ba ida ne'e seidauk bele hatete sai tanba sei iha reuniaun konsellu ministru mak sei deside.

"Konaba atu halo mudansa ida ne'e ha'u seidauk bele hatete sai, tanba sei iha diskusaun Konsellhu Ministru, depois mak ita rona de'it desizaun husi Konsellhu Ministru,"hatete Ministru Obras Publika.

Iha nia diskursu Ministru Obras Publika Samuel Marçal hatete,rai ida ne'e presiza ita hotu-hotu nia servisu hamutuk,ha'u foin la'o oituan ba munisípiu to iha aldeia sira, ita-nia inan aman sira dala ruma susar tebe-tebes, iha fatin balun ita-nia inan feto sira isin rua atu ba partus sira ba hospital dalan kotu, ponte kotu susar tebe-tebes.

"Ita hotu-hotu ne'ebé tur iha ne'e, sira tau fiar ba ita, ohin vice hatete ona dehan, labele tau ita-nia interese privadu aas liu fali interese nasionál,labele tau fali ita-nia interese partikulár ne'e liu fali interese estadu nian,"tenik Ministru MOP iha nia diskursu.

Hafoin remata atividade iha loron dahuluk hodi halo introdusaun ba funsionáriu obras publika no entrega relatóriu husi Ministru sesante MOP nian ba atuál Ministru Obras Publika Samuel Marçal no nia Vise Julio do Carmo, inklui ho Secretário de Estado da Eletricidade, Água e Saneamento Santos Noronha no hala'o vizita kortezia dahuluk ba iha EDTL.ep ho Direção Nasional das Estradas Ponte e Controlo dé Cheias iha Komoro Rai Kotu.

Iha loron dahuluk servisu, funsionáriu Ministeriu Obras Publika simu atuál Ministru Obras Publika Samuel Marçal ho tara tais.*