Remexiu, 06 Jullu 2023: Ministru Obras Públikas (MOP), Eng. Abel Pires da Silva, akompaña husi Deputadu Domingos de Carvalho Araujo, husi Komisaun F ne’ebé toma konta ba área Infraestrutura halo lansamentu fatuk dahuluk ba konstrusaun estrada husi estrada boot ba postu administrativu Remexiu, munisípiu Aileu ho distánsia Kilometru 5.028.

Sr. Ministru Obras Públikas akompaña husi Deputadu Domingos de Carvalho Araujo, husi Komisaun F trata asuntu Infraestrutur no mós nu’udar Remexiu ona ho kometiva to’o iha fatin serimónia simu husi komunidade ho dadolin husi lia-nain sira, tebe-tebes no morador husi labarik ki’ik Remexio oan sira hodi akompaña Sr. Ministru ho nia kometiva to’o iha fatin serimónia.

“Ha’u mós la haluha hakarak hato’o lai na’i Primeiru Ministru nia komprimentus no mós hakuak boot ba inan-aman sira hotu iha ne’e, na’i liurai sira hotu, tuir loloos ita-nia na’i Primeiru Ministru hakarak atu mai atu halo lansamentu maibé tanba iha servisu ida ke lebele husik hela, ha’u tenta konvida ita-nia na’i Primeiru Ministru, ne’e mos horseik dehan bele mais ohin iha ajenda importante ida tan entaun la konsege mai, maibé ne’e la redús importánsia husi ita-nia serimónia importante ida-ne’e, tanba ne’e mak ha’u agradese hanesan Ministru ha’u mai i depois ita-nia membru Komisaun Infraestrutura mós mai iha ne’e entaun hatudu duni katak esforsu ida-ne’e esforsu ida importante, pertinente no sei benefisia ita-nia povu iha rai doben ida-ne’e”, Sr. Ministru Obras Públikas haktuir bainhira lansa fatuk dahuluk ba projetu estrada ba postu Remexiu.

Sr. Ministru hatutan, serimónia lansamentu ne’e reprezenta VIII Governu tanba ne’e Sr. Mnistru lori VIII Governu Konstitusionál nia-naran, lori na’i Primeiru Ministru Jenerál Taur Matan Ruak nia naran hato’o parabéns ba povu Aileu, liuliu ba povu Remexiu ne’ebé sei asesu ba estrada.

Aliende ne’e, Governu mós halo esforsu lubuk ida ba munisípiu Aileu mak presiza kompleta husi postu Remexiu ba Laklo munisípiu Manatutu nian tanba Manatutu vila mai Laklo semana oin lansa ona, entaun naturalmente presiza kompleta husi Laklo ba Remexiu tanba populasaun sira-nia ligasaun tradisionál barak tebes husi postu rua ne’e, ne’e sei iha faze inísiu. 

Iha mós faze avansadu liutan mak projetu estrada husi Aileu ba postu Lekidoe ne’ebé semana oin sei lansa, Sr. Ministru rasik mós ko’alia ona ho kompañia manán na’in COVEC, ne’ebé daudauk ne’e konstrui hela estrada husi Baukau ba Vikeke tanba ne’e semana oin halo ona lansamentu ba estrada refere husi Aileu ba Lekidoe, Lekidoe sai fali mai estrada boot Aileu ba Dili.

Esfrosu seluk ne’ebé Governu halo mak kona-ba estrada ligasaun munisípiu Ermera no Aileu liuliu liga Gleno ba Seloi Kraik, munisípiu Aileu nian ne’ebé nia dezeñi finaliza ona no daudauk ne’e Ajénsia Dezenvolvimentu Nasionál (ADN) sei verifika hela, tanba ne’e Sr. Ministru fiar katak fulan ida ka rua mai verifikasaun finaliza ona bele hahú prosesu tenderizasaun ba konstrusaun estrada refere.

“Ida tan estrada boot husi Ermera liuliu iha parte Gleno mai Seloi Kraik ne’e mós dezeñu hotu ona, AND agora verifika hela entaun ha’u fiar katak dentru de fulan ida rua ne’e verifikasaun hotu entaun bele hahú ona tender ba estrada importante ida ne’eba tanba parte ne’eba mós potensial tebes, potensiál ba turízmu, potensiál ba produsaun agríkula la’as de’it agrikultura maibé mós negósiu, sosial no kulturál buat sira ne’e hotu”, Sr. Ministru esplika.

Iha oportunidade ne’e, Sr. Ministru mós husu ba veteranus, autoridade lokál no komunidade sira iha área refere atu kontribui másimu iha prosesu konstrusaun atu nunune’e prosesu konstrusaun bele la’o ho di’ak.

“Hanesan lia tatoli husi ita-nia na’i Primeiru Ministru dehan katak favór ida inan-aman sira, liurai sira ajuda atu prosesu sira ne’e bele la’o ho di’ak, prosesu preparasaun sira ne’e liuliu prosesu konstrusaun sira ne’e bele la’o di’ak, ha’u rona parte estrada boot parte Aileu ba Lekidoe ne’e iha problema oituan iha ne’eba ne’ebé ha’u husu ba ita-nia na’i veteranu sira iha ne’e, ita-nia na’i ulun sira para ajuda ba, estrada ne’e ba ita hotu, ba povu tomak, ba timor nia di’ak, importante mak ita asegura ida ne’e para depois povu tomak iha kondisaun para buka moris i implementa duni liafuan ida ita liberta ita-nia povu husi ki’ak no mukit”, Sr. Ministru husu.

Sr. Ministru agradese ba kompañia kontratór ne’ebé implementa projetu refere ne’ebé la’o daudauk ona, espera katak antes antes Natal tinan oin estrada refere bele kabér ona.

“Ohin ita lansa estrada importante ida-ne’e Kilometru 5,028, tuun mai ne’e servisu la’o daudauk ona, ita seidauk lansa mós kompañia hadi’ak ona ne’ebé ha’u konvida ita hotu basa liman ba reprezentante kompañia iha ne’e”, Sr. Ministru agradese ba kompañia.

Iha fatin hanesan, Administradór munisípiu Aileu, Sr. Abel da Conseição, sente kontenti tanba Governu liuhosi Ministru Obras Públikas bele lansa ona estrada liga husi estrada boot ba postu administrativu Remexiu vila, tanba ne’e Sr. Administradór ne’e agradese tebes ba esforsu Governu nian hodi implementa projetu refere.

“Ohin previleiju boot ida ba ami komunidade postu Remexiu tanba ofisialmente Sr. Ministru Obras Públikas mai lansa ona ami-nia estrada postu Remexiu nian,” Sr. Administradór hatete.

Nia hatutan, munisípiu Aileu agradese tebes tanba munisípiu Aileu sei kontrui estrada ba postu administrativu rua mak ba postu administrativu Remexiu no Lekidoe ne’ebé sei lansa iha tempu badak. Estrada ba postu administrativu rua ne’e durante tinan barak dezde ukun-an la konsege halo no ohin loron iha mandate VIII Governu Konstitusionál nian konsege lansa projetu hirak ne’e.

Projetu refere konstrui husi kompañia kompañia Maran-Dai.Lda, Jv ho Adam Motor Unip.Lda, ho montante orsamentu hamutuk millaun $ 4 resin ($4,000,400,31) no durasaun ba konstrusaun projetu ne’e iha fulan 12 nia-laran no sei aumentu ho retensaun sira.

Lansamentu projetu ne’e partisipa husi Administradór rasik ho nia administradór postu administrativu no autoridade lokál sira, Komandu PNTL munisípiu Aileu, Diretór Jerál no Nasionál sira, Amu Pároku iha Remexiu, Kagru sefia sira husi instituisaun tutela, tékniku, estudante no komunidade postu administrativu Remexiu nian.