Laklo, 16 Junnu 2023: Ministru Obras Públikas (MOP), Eng. Abel Pires da Silva, reprezenta S. Exa, Primeiru Ministru (PM), Jenerál Taur Matan Ruak, hato’o parabéns ba komunidade munisípiu Manatuto nian, espesialmente ba komunidade postu administrativu Laklo ne’ebé sei benefisia husi konstrusaun projetu estrada Manatuto-Laklo ho distánsia kuaze Kilometru 17, husi distánsia ne’e la sura ho ponte sira.

“Jenerál Taur Matan Ruak loloos tenke mai halo rasik lansamentu ida-ne’e maibé na’i Primeiru Ministru agora daudauk prepara hela tranzisaun ba Governu dasia entaun na’i Primeiru Ministru hato’o de’it lia-menon tuir ha’u dehan hato’o parabéns, komprimentus no hakuak boot husi na’i Primeiru Ministru ba povu Laklo no Manatuto einjerál”, Sr. Ministru Obras Públikas hato’o liuhosi entrevista hafoin lansamentu fatuk dahuluk ba projetu konstrusaun estrada Manatuto-Laklo ne’ebé realiza iha aldeia Obratu, suku Sau, postu administrativu Manatuto vila, munisípiu Manatuto.

Sr. Ministru hatutan “Hanesan ohin administrador munisípiu hato’o dehan, kala postu Laklo mak reja barak ne’e mak ohin ita lansa, mais realidade ha’u haree katak postu Laklubar mós reza barak, postu Soibada mós reja barak tanba saida? Tanba prosesu ba estrada rua ne’e avansadu ona, fulan rua liuba Konsellu Ministru aprova tiha ona prosesu aprovizionamentu tender ba estrada rua ne’e, ha’u hein katak fim do ano 2023 sei kompleta, no inísiu 2024 ita bele halo ona lansamentu ba estrada importante rua ne’e, tanba ne’e ita-boot sira haree katak Manatuto hetan atensaun ida ke espesiál tebes husi ita-nia na’i Primeiru Ministru Taur Matan Ruak”.

Iha oportunidade ne’e, Sr. Ministru husu ba autoridade munisípiu, komunidade, inklui veteranu sira hodi apoiu konstrusaun ba projetu estrada refere, atu nune’e konstrusaun bele la’o ho di’ak no remata tuir tempu ne’ebé iha.

Aliende ne’e, Sr. Ministru ko’alia mós kona-ba progresu dezeñu ba Ponte Bekusi no lansamentu ba projetu estrada Aileu-Lekidoe.