Projetu sira ne’e mak hanesan, estrada iha Maliana vila nian, estrada husi munisípiu Aileu ba postu administrativu Lekidoe no ba postu administrativu Remexiu, husi munisípiu Manatutu vila ba postu administrativu Laklo.

“Primeiru atu komprimenta de’it, Agradese ba S. Exa, nia tempu simu ona ami para depois liuliu atu hato’o kona-ba progresu servisu nian, ita iha estrada pakote lubuk ida ne’ebé mak prontu ona atu halo lansamentu, ida mak estrada Maliana vila, Aileu ba Lekidoe ne’e mós hetan ona vistu, I depois Manatuto vila ba Laklo no mós estrada ba Remexio vila, hirak ne’e prontu ona atu lansa no instrusaun husi S. Exa nian ita sei lansa, mais tarde semana oin. Tender hotu ona, balun nasionál mak kaer, balun internasionál mak manán ne’ebé ne’e rezultadu hotu ona, simu tan ona vistu husi ita-nia Kámara de Kontas agora Governu halo tuir kna’ar ida tan atu lansa para depois projetu sira ne’e bele la’o ona”, Sr. Ministru Obras Públika informa ba jornalista sira iha Palásiu Governu hafoin enkontru ho Xefe Governu.

Orsamentu ba projetu hirak ne’e, Sr. Ministru hatete “Orsamentu ba projetu sira ne’e hotu-hotu iha ona, tama hotu iha Orsamentu Jerál Estadu 2023 nian, depois ida-ne’e multi-anuál, entaun ne’e aseguradu i depois ita-nia Kámara de Kontas mós fó ona vistu ne’ebé laiha tan prosesu seluk para ita hein, agpra ne’e hein lansa de’it para depois kompañia bele hala’o ona sira-nia servisu, sira hotu-hotu prontu ona”.

Relasaun ho mandatu VIII Governu Konstitusionál nian ne’ebé sei termina iha tempu badak, Sr. Ministru hatete nu’udar servidór estadu Governu sei halo servisu to’o Governu foun mai.

“Reuniaun (Reuniaun Konsellu Ministru) mak to’o dia 7 de Junnu mais servisu to’o Governu foun mai, ne’ebé ne’e administrativu atu lansa estrada sira ne’e ita kontente para depois see de’it mak tuir mai bele iha kondisaun di’ak liután, serví ita-nia povu, serví ita-nia rai ida-ne’e mak ita hakarak halo. Ne’e rezultadu tender CNA (Komisaun Nasionál Aprovizionamentu) mak hato’o ona, balun empreza internasionál mak Maliana, mais ida Manatutu vila ba Laklo ne’e empreza Timoroan sira Joint Venture ho empreza Indonézia nian, ida Remexio ne’e nasionál, ida Lekidoe ba Aileu ne’e Internasionál (Xina)”, Sr. Ministru hatete.

Husi orientasaun Xefe Governu nian ne’e, Ministériu Obras Públikas sei halo preparasaun ba lansamentu estrada hirak ne’e.