Antes ne’e, S. Exa, Prezidente Repúblika (PR), Dr. José Ramos Horta, no S. Exa, Priméiru Ministru (PM), Jenerál Taur Matan Ruak, konkorda ona atu halo lansamentu ba projetu Pista Aeroportu Internasionál Prezidente Nicolau Lobato (AIPNL), Kumoro, Dili.

“Ida-ne’e kompeténsia MTK (Ministériu Transporte no Komunikasaun) nian mais hanesan membru Komisaun ba Projetu ida-ne’e ami halo preparasaun másimu, fiar katak hanesan Ohin S. Exa, Primeiru Ministru orienta ona preparasaun ba lansamentu ida-ne’e”, Sr. Ministru Obras Públika informa ba jornalista sira hafoin enkontru ho Xefe Governu iha Palásiu Governu, iha parte dader.

Kona-ba kompensasaun ba abitante sira ne’ebé afeitadu husi konstrusaun projetu ne’e, Sr. Ministru hatete “Hotu-hotu ita rezolve tuir regras, kooperasaun ne’ebé ita simu ne’e ita agradese, ida rua sei iha problema oituan tanba ita la hatene see mak na’in mais esforsu kontinua, i ha’u hanoin sei la taka dalan ba lansamentu projetu importante ida-ne’e tanba ida-ne’e parte importante husi ita-nia eforsu atu tama ASEAN (Asosiasaun ba Nasaun Sudeste Aziátiku), ne’e husi kompañia Indonézia mak manán, iha projetu balun, pakote balun maibé ida-ne’e preparasaun hotu tama ba ASEAN tanba ha’u hanoin preokupasaun husi Na’i Prezidente ne’e pertinente i Governu sei halo preparasaun tomak ba ida-ne’e”.

Hafoin lansamentu, sei halo demolisaun ba área hirak ne’ebé afeitadu husi konstrusaun pista Aeroportu Internasionál Prezidente Nicolau Lobato, Kumoro, nune’e Sr. Ministru hatete, “Simm, parte balun ne’ebé mak ita presiza, ita presiza hamoos, ne’e la’os 100% ona, iha parte balun ne’ebé presia hamoos ita halo, ha’u hanoin agora projetu primeiru ne’e projetu Pista entaun impaktu ne’e ladún barak”.

Iha parte loraik Xefe Governu mós lidera reuniaun ho membru Komisaun Interministeriál hodi ko’alia kona-ba preparasaun ba lansamentu Aeroportu Internasionál Prezidente Nicolau Lobato ne’ebé sei hala’o lansamentu iha tempu badak.

Reuniaun ne’e partisipa husi membru Governu sira ne’ebé hola parte iha Komisaun Interministeriál hanesan Vise Primeiru Ministru no Ministru Planeamentu no Ordenamentu (V-PM no MPO), Ministériu Obras Públikas (MOP), Ministériu Finansas (MF), Ministériu Transporte no Komunikasaun (MTK), Ministru Justisa (MJ), Diretór Ajénsia Dezenvolvimentu Nasionál (ADN-IP) inklui tekníku sira husi ministériu relevante.