Maukatar, 19 Maiu 2023: Ministru Obras Públikas (MOP), Eng. Abel Pires da Silva, iha Kinta-feira ne’e inagura projetu bee-moos ne’ebé konstrui husi Kruz Vermella Timor-Leste ba komunidade aldeia Du’ut no Busada’o iha suku Belekasak, postu administrativu Maukatar, munisípiu Kovalima.

Iha lansamentu ne’e, Sr. Ministru hatutan mensajen S. Exa, Primeiru Ministru (PM), Jenerál Taur Matan Ruak, hodi hato’o parabéns ba komunidade iha suku Belekasak no husu atu kuidadus fasilidade ne’ebé konstrui ona atu bele ba tempu naruk.

“Ha’u hatutan tan lia-fuan murak ne’ebé mak ita-nia na’i Primeiru Ministru hameno hela, horseik kuandu hasoru malu dehan aban Ministru atu ba ne’ebé ha’u dehan ha’u ba inagura lai bee-moos entaun ita-nia na’i Primeiru Ministru hato’o hela lia-fuan ida Parabéns maibé inan-aman sira tenke kontribui atu halo manutensaun didi’ak, ne’e ita-nia na’i Primeiru Ministru nia lia-faun rasik ne’ebé ha’u lalika aumenta tan, manutensaun ne’e importante tebes, ohin ita-nia maluk husi Kruz Vermella mós hatete favór ida ajuda ba mais iha problema ruma mak inan-aman sira hanoin katak ha’u bele ajuda bele hato’o mai ha’u liuhosi sms”, Sr. Ministru hatutan ba komunidade sira iha suku Belekasak, postu administrativu Maukatar, munisípiu Kovalima bainhira inagura bee-moos ba aldeia rua iha suku refere.

Sr. Ministru sente kontente hamutuk ho komunidade iha suku Belekasak, postu Maukatar hodi inagura instalasaun bee-moos ba komunidade iha suku refere tanba bee ne’e importante tebes ba ema.

“Ha’u hakfodak no kontenti, kuandu hamutuk ho na’i liurai hatete katak aldeia Du’ut ho Busada’o ne’e foin primeira ves iha história ita-nia hetan asesu ba fasilidade bee-moos, dezde kedas Portugues nia tempu mós laiha, Indonézia nia tempu tinan 24 mós la hetan, ukun-an mós iha tinan ne’e mak ha’u-nia inan-aman sira bele asesu ba bee-moos. Bee ne’e importante tanba bee iha mak foin moris, eletrisidade importante maibé kuandu eletrisidade laiha ita bele sunu lilin maibé bee kuandu laiha tenke buka para kuru bee”, Sr. Ministru hatete.

Sr. Ministru hatutan “Ha’u-nia oan sira, ha’u-nia subrinnu no subrinna sira-nia servisu sei kamaan oituan, la hanesan uluk ami-nia tempu ami tenke ba kuru bee, imi-nia tempu ne’e barak liu atu estuda, inan-aman sira mós lalika ona hirus, hakilar sira tanba de’it sira haluha kuru bee, ne’ebé di’ak bai nan-aman sira, di’ak ba oan sira iha ne’e, di’ak ba eskola, sentru saúde iha ne’e, entaun ha’u hanoin kondisaun moris iha aldeia rua ne’e sei di’ak liu kompara ho saida mak akontese liuba”.

Sr. Ministru mós informa ba komunidade sira kona-ba projetu estrada, eletrisidade inklui bee-moos ba komunidade sira.

Kona-ba estrada nian daudauk ne’e Governu kontinua halo esfrosu halo dezeñu ba estrada hirak ne’ebé ho kondisaun att hela, no hirak ne’ebé dezeñu iha ona Ministériu Obras Públikas kontinua halo esforsu halo implementasaun. Preokupasaun eletrisidade nian kona-ba kompañia abandona servisu, Sr. Ministru promete liuhosi koordenasaun Eletrisidade Timor-Leste Empreza Públika (EDTl.EP) nian sei bolu kompañia hodi kontinua no finaliza projetu refere.

Iha fatin hanesan, Reprezentante Kruz Vermella Timor-Leste (CVTL) iha munisípiu Kovalima, agradese ba Governu liuliu Ministériu Obras Públikas tanba tulun ona no apoiu finansiamentu ba instalasaun bee-moos ba komunidade iha área refere, no sente kontenti tebes tanba bele hala’o de’it iha fulan rua nia-laran.

Nune’e mós xefe suku Belekasak, Leonito Gusmão, fó obrigadu no agradese tebes Sr. Ministru Obras Públikas no CVTL ne’ebé konsege dada bee-moos ba komunidade ne’e durante tinan barak seidauk asesu ba bee-moos.

Agaradese mós ba kontribuisaun husi parte hotu konege dada bee-moos ba komunidade sira, liuliu komunidade rasik ne’ebé durante ne’e apoiu halo instalasaun ba bee-moos iha fatin refere.

Xefe suku mós husu atu komunidade bele estrada fasilidade bee-moos nian, karik asesores balun mak att tenke informa ba Grupu Maneja Fasilidade (GMF) iha suku refere para troka ou hadi’ak kedas.

Projetu instalasaun bee-moos ne’e ho nia distánsia Kilometru 4 resin no fornese ba komunidade aldeia rua mak aldeia Du’ut no Busada’o iha suku Belekasak.

iha oportunidade ne’e, CVTL mós entrega kedas ekipamentu manutensaun bee-moos nian ba Sr. Ministru no kontinua entre ba xefe suku atu nune’e GMF iha suku refere bele utiliza halo manutensaun ba fasilidade bee-moos nian bainhira iha estragus ruma.

Serimónia inagurasaun bee-moos ne’e partisipa mós husi reprezentante Prezidente Autoridade Munisípiu Kovalima nian, Administradór Postu Maukatar, Prezidente Autoridade Nasionál Bee no Saneamentu (ANAS, sígla Portugues), Vise Prezidente Eletrisidade Timor-Leste (EDTL.EP), reprezentante Bee Timor-Leste (BTL.EP), xefe suku viziñu sira, veteranus no komunidade iha fatin refere.