Fatubesi, 04 Maiu 2023: Ministru Obras Públikas (MOP), Eng. Abel Pires da Silva, akompaña husi Diretór Jerál Estrada, Ponte, Prevensaun no Kontrollu i Seias (DJEPPKS), Eng. Rui Hernani, ho tékniku sira halo observasaun direita ba kondisaun estrada husi postu administrativu Ermera vila to’o suku Fatubessi, postu administrativu Hatulia B ne’ebé parte balun rai-monu no ameasa atu kotu.

Ministériu Obras Públikas mós planu ona atu loke estrada liga husi suku Fatubesi, postu administrativu Hatulia B, munisípiu Ermera nian ba Loes, munisípiu Likisa nian, tanba ne’e, Sr. Ministru orienta tékniku sira atu haree no halo Dezeñu Enjenaria Detalladu (DED) ba estrada refere.

Sr. Ministru hatete, kondisaun estrada liga husi Ermera vila ba Fatubesi ladún luan entaun defikulta tebes movimentasaun transporte bainhira hasoru malu iha dalan klaran, karreta ida tenke buka fatin para para fó fatin ba karreta ida tenke liu uluk, nune’e Sr. Ministru orienta ekipa tékniku oinsá mak halo luan estrada, aumezmu tempu halo mós manutensaun ba estrada ne’ebé hetan estragus kauza husi udan no rai-monu.

“Sr. Diretór Jerál mak ne’e ita planu husi ne’e tembus Loes, tanba ida-ne’e postu, ida ne’eba mós postu entaun estrada bele liga ba malu. Estrada ida-ne’e konstrui ona (maibé nia luan ladún) entaun ita esforsu para halo luan la’os aspalt mais natón para karreta rua hasoru malu ne’e bele sees, selae araska,” Sr. Ministru hatete bainhira hasoru malu ho xefe suku Fatubesi, iha suku Fatubesi, postu administrativu Hatulia B, munisípiu Ermera.

Sr. Ministru esplika “Uluk (projetu rehabilitasaun estrada husi Ermera vila ba Fatubesi) ita simu ne’e Liurai, tanba osan ne’e osan gratuita, maibé sira mai ho dezeñu hanesan ne’e entaun ita mós simu de’it ona”.

Iha fatin hanesan xefe suku Fatubesi, Armando de Carvalho, hato’o mós perokupasaun kona-ba kondisaun estrada no estrada ladún luan defikulta transporte hasoru malu iha dalan klaran.