Atsabe, 06 Abril 2023: Ministru Obras Públikas (MOP), Eng. Abel Pires da Silva, orienta tékniku husi Diresaun Jerál Estrada, Ponte, Prevensaun no Kontrollu i Seias (DJEPPKS) no kompañia nasionál identifikadu ne'ebé iha kapasidade atu halo nornalizasaun ba estrada kotu iha suku Eraulu, postu administrativu Letefoho no iha suku Atara, postu administrativu Atsabe, munisípiu Ermera nian, ne'ebé daudauk ne'e defikukta movimentasaun transporte públiku no privadu ih área refere paradu.

"Ha'u mai Ermera dala rua ona, iha Segunda liu ba mai, Tersa ne'e tékniku sira halo preparasaun, Kuarta ohin ne'e esforsu maka'as iha parte Ermera nian, maibé la'os de'it Ermera mak kotu, iha parte Atara mós kotu, entaun ohin mai iha ne'e para depois oinsá buka dalan para atu rezolve, tanba distánsia ne'e dook oituan, asesu husi mákina tronton ne'e defísil entaun sei han tempu oituan, ne'ebé ohin esplika ba nai Liurai parese han tempu loron ida, rua, ba oin sira mai para halo normalizasaun iha ne'e. Kompañia ita orienta tiha ona ne'ebé agora hein, ha'u fiar katak la to'o fim de semana oin ne'e ida-ne'e normaliza ona", Sr. Ministru informa ba jornalista iha suku Atara, postu administrativu Atsabe, munisípiu Ermera hafoin halo observasaun ba prosesu normalizasaun estrada kotu iha área Gleno-Ermera vila no husi Gleno ba Atabae.

Sr. Ministru esplika katak, mobilizasaun ekipamentu pezadu ba halo normalizasaun iha fatin rua ne'e mak defísil tanba kondisaun estrada ne'ebé kotu tutuir dalan, liuliu iha suku Humboe nian defikukta tebes kareta pezadu tula eskapatór ba fatin rua ne'e.

Maske nune'e, Sr. Ministru garante katak, kompañia nasionál ne'ebé hetan fiar sei halo esforsu hodi mobiliza ekipamentu para halo normalizasaun.

Hafoin estrada kotu iha Atara transporte públiku no privadu paradu tanba estrada ne'e mak dalan úniku movimentasaun komunidade nian, nune'e mós iha Heraulu tranporte públiku no privadu tenke liuhosi mota-laran, bainhira udan-boot, mota tuun iha rísku boot no fó ameasa ba ema nia vida.

Tanba ne'e liuhosi observasaun Sr. Ministru nian, Sr. Ministru orienta kompañia sira halo normalizasaun emerjénsia iha fatin rua refere.

Entertantu diresaun estrada Gleno ba Ermera vila, daudauk ne'e kompañia nasionál ne'ebé iha kapasidade hala'o ona normalizasaun emerjénsia ba estrada no ponte hodi fasilita movimentu komunidade nian.