UMA-KAIN 204 HOSI ALDEIA HAAT IHA SUKU BECO ASESU ONA ELETRISIDADE HAFOIN MINISTRU OBRAS PÚBLIKA BA INAUGURA

UMA-KAIN 204 HOSI ALDEIA HAAT IHA SUKU BECO ASESU ONA ELETRISIDADE HAFOIN MINISTRU OBRAS PÚBLIKA BA INAUGURA

Covalima, 05 Setembru 2025

Komunidade Suku Beco uma kain hamutuk 204 hosi Aldeia Bibel, Gala, Tobur no Teda asesu ona eletrisidade hafoin Ministru Obras Públika, Samuel Marçal akompañia hosi Prezidente Komisaun Ezekutiva EDTL,E.P., Dr. Paulo da Silva inaugura projeitu eletrifikasaun nasional iha Postu Administrativu Suai, Munisipiu Covalima, Sexta-feira ne’e.

Iha diskursu Ministru Obras Públika, Samuel Marçal hateten ohin mai halo inaugurasaun eletrisidade ba Aldeia haat iha Suku Beco ne’ebe foin asesu eletrisidade, tanba dezde tempu Portugés to’o tempu ukun a’an komunidade nafatin la asesu ba infraestrutura bazika hanesan estrada no eletrisidade.

“Dezde tempu Portugés to’o tempu a’an, komunidade nafatin la asesu ba eletrisidade nune’e ohin ita mai inaugura eletrisidade iha aldeia haat ne’ebe foin asesu eletrisidade, ba futuru Governu hamutuk ho EDTL,E.P. sei foku implementa programa Timor Naroman ba aldeia sira ne’ebe seidauk asesu enerjia eletrika”, hateten Ministru Obras Públika iha nia diskursu.

Ministru Obras Públika haktuir ohin mai laos ne’e deit mai atu inaugura eletrisidade, maibe ami halo observasaun ba prosesu konstrusaun estrada inklui hodi rona direita komunidade nia preokupasaun no saida mak Governu presiza atu halo ba komunidade sira.

“Antes simu Posse Primeiru-Ministru fo ona orientasaun ba hau atu tau prioridade ba Suku no Aldeia rural sira, tanba iha area rural  sira ita nia komunidade barak mak sei susar ba ahi eletrisidade, bee moos no estrada” hateten Ministru Obras Públika.

Antes atu taka diskursu, Ministru Obras Públika apela mos ba komunidade katak ho eletrisidade ne’ebe lakan ona ne’e husu ba komunidade atu kuidadu teb-tebes eletrisidade ne’ebe foin inaugura tanba eletrisidade bele fo mos risku, bainhira atu halo instalasaun foun, presiza koordena ho tekniku EDTL ne’ebe destaka iha postu sira.

Iha biban ne’e Prezidente Ezekutivu Eletrisidade Timor-Leste, Paulo da Silva hato’o parabens ba komunidade ne’ebe ohin asesu ona eletrisidade no enkoraja atu uza enerjia eletrika ho kuidadu, responsabilidade no seguru.

“Ohin loron mai halo inaugurasaun ba instalasaun eletrifikasaun ba aldeia haat iha Suku Beco, projeitu ida ne’e hola parte hosi Projeitu Eletrifikasaun Nasional (PEK) ne’ebe kobre uma-kain hamutuk 204 ho ninia baixa tensaun 149km, media tensaun 204, distansia 10km” hateten Prezidente Ezekutivu EDTL ne’e.

Partisipa iha serimonia inaugurasaun eletrisidade ne’e Komisariu Ezekutivu Servisu Krporativu, Julio de Jesus Gonçalves, Diretor Jeral Estradas, Pontes no Controlo de Cheias-Ministeriu Obras Púlika (DJEPCC-MOP), Nene Lobato, Diretor Jeral Habitasaun Urbanismu (DJHU), Domingos de Jesus Sequeira, Diretor Nasional Vias Rodoviarias, Milton Ramanata de Castro Monteiro, Diretor Ezekutivu Interino Agensia de Dezenvolvimentu Nasional (ADN), Januario M. Guterres, Koordenador Unidade Inspesaun, Verifikasaun no Pagamentu, Aleixo Amaral do Carmo, Xefe Gabinete Ministeriu Obras Públika, Cristovão Fausto Guterres, reprezentante PAM Covalima, Xefe Suku Beco, Veteranu, Lia Nain, Estudante no Komunidade hosi aldeia haat ne’ebe asesu eletrisidade.*

Mídia-MOP