Infraestrutura
PM XANANA HO MINISTRU OBRAS PÚBLIKA LANSA FATUK DA-HULUK BA KONSTRUSAUN PONTE LAMARA
Manatuto, 8 haree
PM XANANA HO MINISTRU OBRAS PÚBLIKA LANSA FATUK DA-HULUK BA KONSTRUSAUN PONTE LAMARA Manatuto, 02 Agostu 2025 Primeiru-Ministru (PM), Kay Rala Xanana Gusmão akompañia hosi Ministru Obras Públika, Samuel Marçal hatuur fatuk dahuluk konstrusaun Ponte Lamara ne’ebe liga Suku Manehat ba Postu Administrativu Natarbora inklui bele fasilita mos komunidade sira hosi Fatuberliu, Munisipiu Manufahi. Iha intervensaun Primeiru-Ministru (PM), Kay Rala Xanana Gusmão fo atensaun ba empreza responsavel Shandong Hejian Construction Group atu halo ho kualidade tanba povu mak sei uza no tenke uza ba tempu naruk no husu atu halo ho kualidade tanba ponte ne’e halo ba povu ida ne’ebe eroi ba ukun rasik-an.
PM XANANA HO MINISTRU OBRAS PÚBLIKA LANSA FATUK DA-HULUK BA KONSTRUSAUN PONTE LAMARA
Manatuto, 02 Agostu 2025
Primeiru-Ministru (PM), Kay Rala Xanana Gusmão akompañia hosi Ministru Obras Públika, Samuel Marçal hatuur fatuk dahuluk konstrusaun Ponte Lamara ne’ebe liga Suku Manehat ba Postu Administrativu Natarbora inklui bele fasilita mos komunidade sira hosi Fatuberliu, Munisipiu Manufahi.
Iha intervensaun Primeiru-Ministru (PM), Kay Rala Xanana Gusmão fo atensaun ba empreza responsavel Shandong Hejian Construction Group atu halo ho kualidade tanba povu mak sei uza no tenke uza ba tempu naruk no husu atu halo ho kualidade tanba ponte ne’e halo ba povu ida ne’ebe eroi ba ukun rasik-an.
“Hau husu ba empreza atu halo didiak, halo ho kualidade tanba ponte ne’e halo ba povu Timor-Leste liu-liu povu Barique-Natarbora. Halo ho kualidade atu uza ba tempu naruk, tanba ponte ne’e halo ba povu ida, povu ida ne’ebe sai eroi ba ukun rasik-an, povu ne’ebe na’in ba independensia no povu ne’ebe manan funu ne’e ho ruin no ran”, hateten PM Xanana iha serimonia Lansamentu Fatuk Dahuluk Ponte Lamaran, Postu Administrativu Barique, Munisipiu Manatuto, iha sabado ne’e.
Iha biban ne’e Xefe Governu husu mos ba ema ne’ebe kaer ukun, liu-liu ba membru IX Governu Konstituisional atu tau-matan ba povu ne’e hodi bele responde sira nia difikuldade tomak.
“Ohin hanesan momentu importante ida, tanba imi nia dalan diak ona, maibe iha tempu udan sei impedimentu tanba ponte la iha. Entaun, ohin ita hatu’ur fatuk dahuluk hodi konstrui ponte ne’e atu bele fasilita imi. Husu imi atu kontribui hodi tau matan ba prosesu tomak konstrusaun ponte ne’e”, hateten PM Xanana iha povu Natarbora nia oin.
Alende PM Xanana husu mos ba Natarbora oan sira liu-liu joven sira atu aproveita tempu hodi estuda, tanba futuru iha oin no buat diak ruma sei mai iha Natarbora.
Iha fatin hanesan Ministru Obras Públika, Samuel Marçal ofisialmente asina kontratu ho Empreza Shandong Hejian Construction Group ho sasin hosi Primeiru-Ministru, membru Governu sira, lia-nain, Autoridade Munisipal Manatuto, Amu Vigáriu Parókia São Francisco de Asisi Welaluhu, Frei Domingos Xavier OFM no Populasaun.
“Hau reprezenta imi asina projeitu ne’e no Primeiru-Ministru hamutuk ho imi mak sai sasin. Primeiru-Ministru koalia bebeik kona-ba osan povu nian, tenke gasta ho diak. Tanba ne’e iha oportunidade ida-ne’e hau hakarak atu asina kontratu ho empreza iha imi hotu nia oin”, hateten Ministru Obras Públika, Samuel Marçal.
Iha biban ne’e, nain ba empreza Shandong Hejian Construction Group, Ren Yong Jie deklara prontu atu halo projeitu ne’e ho kualidade no kumpre rekezitus sira ne’ebe hatuur iha kontratu, promete katak sei finaliza tuir data determinadu.
“Hau prontu halo ho kualidade no prontu atu finaliza tuir data ne’ebe termina ona iha kontratu hodi entrega hikas ba Governu”, dehan nain ba empreza Shandong Hejian Construction Group.
Entretantu serimonia hatuur fatuk dahuluk ne’e hahu ho simu Primeiru-Ministru ho tara tais, dadolin hosi lia-nain sira tuir kultura Natarbora nian.
Hafoin PM Xanana akompañia hosi membru Governu sira hakat kedan ba fatin assinatura plaka konstrusaun nian no kontinua ho hamulak hosi lia-nain sira hodi husu matak malirin, hatuur fatuk inan ne’ebe hetan bensaun hosi Amu Vigáriu Parókia São Francisco de Asisi Welaluhu, Frei Domingos Xavier OFM.
Iha oportunidade ne’e nain ba empreza ho makina pezadu halo kedan servisu simbolikamente hodi hahu konstrusaun no kontinua loke ofisialmente kuadru projeitu.
Projeitu konstrusaun ponte ne’e ho númeru kontratu TENDER/185/MOP-2024 ho montante orsamentu $ 4,605,887.72 ne’ebe superviziona hosi Ministeriu Obras Públika ho durasaun 365.
Partisipa iha serimonia lansamentu ne’e maka Vise-Ministru Asuntus Parlamentares, Aderito Hugo da Costa, Vise-Infraestrutura, Julio do Carmo, Sekretariu Estadu Komunikasaun Sosial, Expedito Dias Ximenes, sekretariu Estadu Dezenvolvimentu Lokal, Mateus dos Santos Tallo, Sekretariu Estadu Veteranus, César dos Santos da Silva, Prezidente Autoridade Munisipiu Manatuto, Luis Inacio Henrique Fernandes, Autoridade Lokal sira, reprezentante Ajénsia Dezenvolvimentu Nasional (ADN), ekipa tekniku sira hosi MOP no populasaun Natarbora.*
Mídia-MOP
