Infraestrutura
PM XANANA HATUR FATUK DAHULUK BA KONSTRUSAUN PONTE WE-LOLO
Viqueque, 13 haree
PM XANANA HATUR FATUK DAHULUK BA KONSTRUSAUN PONTE WE-LOLO Viqueque, 06 Outubro 2025 Primeiru-Ministru, Kay Rala Xanana Gusmão akompañia husi Ministru Obras Públikas, Samuel Marçal, Vise-Ministru ba Asuntus Parlamentares (VMAP), Adérito Hugo da Costa, Prezidente Autoriedade Viqueque, Francisco C.S de Gonzaga iha loron sabado ne’e ofisiálmente hatur fatuk dahuluk bá konstrusaun Ponte We-Lolo, Aldeia Uma Boot, Suku Luca, Munisípiu Viqueque ho investimentu totál $4,398,863.24. Iha nia intervensaun, Primeiru-Ministru (PM), Kay Rala Xanana Gusmão hatete dezenvolvimentu nasionál ne’ebé dau-daun ne’e lao la akontese hanesan milagre, tanba iha tinan hirak liuba ema barak lakon sira-nia oan, familia tan deit hakarak rai ne’e diak.
PM XANANA HATUR FATUK DAHULUK BA KONSTRUSAUN PONTE WE-LOLO
Viqueque, 06 Outubro 2025
Primeiru-Ministru, Kay Rala Xanana Gusmão akompañia husi Ministru Obras Públikas, Samuel Marçal, Vise-Ministru ba Asuntus Parlamentares (VMAP), Adérito Hugo da Costa, Prezidente Autoriedade Viqueque, Francisco C.S de Gonzaga iha loron sabado ne’e ofisiálmente hatur fatuk dahuluk bá konstrusaun Ponte We-Lolo, Aldeia Uma Boot, Suku Luca, Munisípiu Viqueque ho investimentu totál $4,398,863.24.
Iha nia intervensaun, Primeiru-Ministru (PM), Kay Rala Xanana Gusmão hatete dezenvolvimentu nasionál ne’ebé dau-daun ne’e lao la akontese hanesan milagre, tanba iha tinan hirak liuba ema barak lakon sira-nia oan, familia tan deit hakarak rai ne’e diak.
“Hau husu ba joven sira atu labele halo impedimentu no tenke tulun Governu hodi aselera lalais konstrusaun ne'e bele hotu lalais. Governu dau-daun ne’e halo esforsu atu halo dezenvolvimentu maibé iha fatin balun komunidade la kontribui no halo impedimentu, ikus mai difikulta kompañia hodi aselera nia servisu. Iha prosesu hotu, la akontese hanesan milagre. Ita hatene katak iha tinan hirak liuba, ema barak lakon sira-nia oan, familia tan deit hakarak rai ne’e diak,” dehan PM Xanana.
Iha biban ne’e, Ministru Obras Públikas (MOP), Samuel Marçal informa, IX Governu konsidera infraestrutura hanesan prioridade boot ida ba dezenvolvimentu nasionál, tanba Ministru Obras Públika husu ba komunidade sira atu labele lakon esperansa, servisu ne’ebé MOP halo neneik maibe bebeik.
“Hau fiar katak povu ida ne’e seidauk lakon esperansa hodi pasiensia nafatin hodi hein estadu ida ne'e hodi serví povu iha rai ida ne'e. Hau kontenti tebe-tebes povu ida nee nafatin iha pasiensia, mesmu hetan sofre durante tinan rua nia laran tanba Covid-19, iha tempu hanesan ita akontese dezastre naturais hodi estraga komunidade nia uma. Hafoin hau simu tiha posse hanesan Ministru. Primeiru-Ministru bolu hau hodi fo orientasaun atu rezolve setór infraestrutra sira area rural. Vique-que ohin marka-tan istoria boot ida tanba PM Xanana mai lansa fatuk dahuluk ba konstursaun ponte We-Lolo,”hatete Ministru Obras Públikas.
Alende ne’e Ministru Obras Públikas husu mós ba komunidade sira atu labele lakon esperansa.
Iha fatin hanesan, Vise-Ministru ba Asuntus Parlamentares (VMAP), Adérito Hugo da Costa esplika dau-daun ne’e projetu balun iha progressu ona no balun foin hahu.
“Ida ne’e mak esforsu IX Governu nian tuir kompromisu ne’ebé ita trasa, to’o mandatu ida ne’e remata. Iha fatin barak mak ita halo ona lansamentu ho montante ida ne’ebé boot tebes”, Vise-Ministru ba Asuntus Parlamentares.
Vise-Ministru ba Asuntus Parlamentares informa kada semana deputadu sira iha Parlamentu Nasional sempre relata problema infraestrutura no sosial sira ne’e ba Governu.
“Hanesan portavoz ka reprezentante governu nia ba Parlamentu, atu hatete deit Ami nafatin tau atensaun ba problema sosial hirak ne’ebé povu enfrenta. Espera ho lansamentu fatuk dahuluk ba kontrusaun Ponte We-Lolo sei fó benefísiu boot ba komunidade lokál hodi asesu no konektividade, fasilita movimentu ba eskola, sentru saúde, fasilitasaun transportasaun produtu agrikultura, fortalese ligasaun entre komunidade rurál no sentru urbanu no seluk tan.
Lansamentu Fatuk Dahuluk Ponte We-Lolo reprezenta la’os de’it projetu infraestrutura, maibé kompromisu konkretu IX Governu Konstituisionál nian ba dezenvolvimentu balansu iha territóriu nasionál tomak, Ponte We-Lolo ne’e konstrui husi kompania Nananiu Unipessoal, Lda ho durasaun servisu 365dias ho montante orsamentu $4,398,863.24.
Partisipa iha seremonia lansamentu Ponte We-Lolo, Vise Prezidente Asuntu Parlamentár Aderito Hugo, Vise-Ministru Administrasaun Estatál, Jacinto Rigoberto G. de Deus, Prezidente Bee Timor-Leste’E.P (BTL), Deputadu CNRT, José Virgilio, Diretór Jerál Estrada Ponte Prevensaun no Kontrolu, Nene Lobato, Diretór Jerál Habitasaun Urbanismu, Domingos de Jejus Sequeira, Diretór Nasional Konstrusaun Vias Rodaviarias, Milton Ramanata de Castro Monteiro, Kordenador Unidade Inspesaun Verifikasaun no Pagamentu, Aleixo Amaral do Carmo, Diretóra Nasionál Aprovizionamentu MOP, Isabel Maria Lay Guterres, Jerente no funsinariu BTL,E.P, Sekretariu Grande Projetu, ADN, PNTL Munisípiu Vique-que, autoriedade lokal, lia nain, komunidade no estudante sira.*
Mídia-MOP
