KM APROVA PROJEITU REZOLUSAUN GOVERNU NE'EBE APREZENTA HOSI PM XANANA KONA-BA KRIA KOMISAUN EZEKUTIVA HODI ESTABELESE ZONA DEZENVOLVIMENTU EKONOMIKU ESPESIAL IHA OEKUSSI AMBENU

KM APROVA PROJEITU REZOLUSAUN GOVERNU NE'EBE APREZENTA HOSI PM XANANA KONA-BA KRIA KOMISAUN EZEKUTIVA HODI ESTABELESE ZONA DEZENVOLVIMENTU EKONOMIKU ESPESIAL IHA OEKUSSI AMBENU

Dili, 30 Janeiro 2025

Sorumutu Konsellu Ministru ne'ebe hala'o iha Palasiu Governu, Kinta-feira ne'e aprova Projeitu Rezolusaun Governu nian, ne'ebe aprezenta hosi Primeiru-Ministru, Kay Rala Xanana Gusmão ba alternasaun daruak ba Rezolusaun Governu no. 7/2024, loron 24 fulan-Janeiru, ne'ebe kria Komisaun Ezekutiva ho Objetivu atu estabelese Zona Dezenvolvimentu Ekonomiku Espesial iha Oekusi Ambenu.

Alternasaun ida ne'e estende mandatu Komisaun Ezekutiva nian ba fulan tolu tan to'o fulan-Abril 2025 nia rohan, hodi konsidera kompleksidade hosi misaun ne'ebe atribui no nesesidade atu kompleta knaar esensial sira ne'ebe sei hala'o hela. To'o periodu ne'e nia rohan, Komisaun ne'e tenki aprezenta proposta ba enkuadramentu organiku Zona Ekonomiku Espesial iha futuru, hodi garante nia inkluzaun iha preparasaun siklu orsamental 2026 nian.

Konsellu Ministru delibera hodi fo instrusaun ba Ministru Administrasaun Estatal, reprezenta Estadu hodi notifika adjudikatarias iha kontratu públiku LCB/006/MAE/2020 no LCB/007/MAE/2020, konaba jestaun rezidu solidu urbanu no lixeira Tibar hodi kumpre sira nia obrigasaun kontratual iha prazu masimu loron 15 nia laran.

Ikus liu, Konsellu Ministru aprova projeitu Rezolusaun Governu, ne'ebe aprezenta hosi Ministru Asuntu Kombatente Libertasaun Nasional, Gil da Costa Monteiro "Oan Soru", konaba implementasaun medidas legal konaba rejistu dadus kombatente no martir sira libertsaun nasional nian, ne'eb rezulta hosi publikasaun avizu rejistu daruak-2009.

Ho Rezolusaun ida ne'e, Governu reafirma ninia apoiu inkondisional ba Ministeriu Asuntu Kombatentes Libertasaun Nasional, iha implementasaun medidas hotu-hotu relasiona ho publikasaun avizu rejistu 2009 nian, tuir termu sira ne'ebe estabelese ona iha Estatutu Kombatentes Libertasaun Nasional nian, ne'ebe aprova ona hosi Lei n. 3/2006, loron 12 fulan-Abril altera hosi Lei n. 9/2009, loron 29 fulan-Jullu, Lei n. 2/2011, loron 23 fulan-Marsu no Lei n. 3/2024, loron 12 fulan-Juñu.

Governu iha no sei komprometidu nafatin atu garante katak prosesu tomak rejistu dadus konaba Kombatente Libertasaun Nasional nian hala'o ho forma integral no bazeia eskluzivamente ba Lei, hodi garante kombatente hotu-hotu nia direitu. Tuir termu Estatutu Kombatentes Libertasaun Nasional nian, karik laih konkordansia ho dadus ne'ebe públika ona, interesadu sira iha direitu atu aprezenta reklamasaun ho provas ne'ebe fundamentu, individualmente iha prazu loron 60 hahu hosi data publikasaun avizu. Ema ne'ebe halo deklarasaun falsu ka fo informasaun falsu ka falsifika dokumentus relasiona ho prova militansia iha Luta Libertasaun Nasional ho intensaun atu hetan direitu ne'ebe konsagra iha Estatutu Kombatente Libertasaun Nasional sei hetan kastigu tuir lei haruka.*

Mídia MOP