GOVERNU LIU HUSI EDTL,E.P. ASSINA AKORDU BA IMPLEMENTASAUN PROJEITU SOLAR PV & BESS IHA LALEIA MANATUTU HO KONSORSIU ITOCHU & EDF HO KAPASIDADE 72MW-80MW

GOVERNU LIU HUSI EDTL,E.P. ASSINA AKORDU BA IMPLEMENTASAUN PROJEITU SOLAR PV & BESS IHA LALEIA MANATUTU HO KONSORSIU ITOCHU & EDF HO KAPASIDADE 72MW-80MW

Dili, 22 Jullu 2025

Vise-Primeiru Ministru, Ministru Koordenador Assuntus Sosiais no Primeiru Ministru Interinu, Eng. Mariano Assanami Sabino hamutuk ho Ministra Finansas, Santina José Rodrigues F. Viegas Cardoso, Ministru Obras Públika, Samuel Marçal partisipa serimonia Aniversariu EDTL,E.P. no sai sasin mos asinatura akordu ba implementasaun projeitu enerjia solar photovoltaic ho kompañia EDF no ITHOCHU GRUPU hosi Japaun no Fransa ne’ebe sei implementa projeitu ne’e iha Laleia, Manatutu, serimonia assina akordu no aniversariu EDTL,E.P. ba dala V, realiza iha salaun Oka, Osindo.

Aniversariu EDTL,E.P., Vise-Primeiru Ministru, Eng. Mariano Assanami Sabino hato’o agradese wain ba funsionariu EDTL hotu-hotu ne’ebe dedika a’an tomak servisu ho fuan hodi garantia ahi labele mate. Primeiru Ministru Interinu mos fo onra no gloria ba funsionariu EDTL sira ne’ebe hetan dezastre no mate bainhira hala’o misaun iha terenu, husu atu kontinua valoriza sira hodi tau matan ba sira nia fen ho oan.

Iha biban ne’e Vise-Primeiru Ministru, Ministru Koordenador Assuntus Sosiais no Primeiru Ministru Interinu, Eng. Mariano Assanami Sabino lori Primeiru Ministru IX Governu Konstituisional, Kay Rala Xanana Gusmão nia naran hato’o mos parabens ba imi hotu tanba ho imi nia dedikasaun maske dalaruma ahi mate ema trata hasai lia mal ba imi maibe ho apoiu familia tomak imi kontinua pasiensia hodi halo servisu ho diak.

Iha tempu hanesan Ministru Obras Públika, Samuel Marçal akordu ne’ebe daudaun ne’e assina ligadu ho projeitu solar PV, iha sei fo benefisiu boot Timor-Leste. Projeitu ida ne’e sei kontribui ba dezenvolvimentu sustentavel, protesaun ambiente no nia husu tan ba kompañia sira atu uza rekursu Timor oan nian, hodi bele envolvimentu lokal sai prioridade. Hodi fo oportunidade ba jovens Timor oan atu hasae kapasidade nian no prepara-an atu jere projeitu iha futuru.

Entretantu iha nia diskursu Prezidente Komisaun Ezekutiva, Paulo da Silva hateten ohin EDTL hamutuk ho konsorsiu asina akordu PPA ba tinan 25 ba projeitu solar PV, ida ne’e ho modalidade IPP (Independent Power Producer) katak kompañia maka sei halo investimentu halo konstrusaun, operasaun no manutensaun rasik no sei fa’an deit enerjia mai EDTL liu hosi akordu ne’ebe iha. Ho projeitu solar PV ida ne’e sei kontribui ba iha redusaun kustu produsaun enerjia (Custo ba mina) provolta liu $30M kada tinan. Implementasaun projeitu solar PV refere sei implementa iha Postu Administrativu Laleia, Munisipiu Manatutu ho kapasidade 72MV-80MV.

Serimonia assina akordu no aniversariu EDTL,E.P. ba dala V, marka presenza embaixador Japaun ba Timor-Leste, Kimura Tetsuya, Country Diretor ADB, Stefania Dina reprezentante Bandu Mundial.*

Mídia-MOP