ARSEBISPU ARKIDIOSESE METROPOLITANA DILI INAUGURA GRUTA NOSSA SENHORA DE AITARAK NE’EBE SAI MAHEIN BA IJE-ADI

ARSEBISPU ARKIDIOSESE METROPOLITANA DILI INAUGURA GRUTA NOSSA SENHORA DE AITARAK NE’EBE SAI MAHEIN BA IJE-ADI

Dili, 16 Outubru 2025

Arsebispu Arkidiosese Metropolitana Dili, Dom Virgílio Cardeal do Carmo da Silva,SDB akompania ho Prezidenti Ana Paula da Cruz inagura no fó bensa bá konstrusaun gruta mahein illas Na’in-feto Aitara, iha kampaun IJE-ADI, Akanunu, Hera, kinta-feira ne’e.

Iha intervensaun Prezidente Instituisaun Jestaun Ekipamentus, Ana Paula da Cruz hateten ita hotu hatene katak Instituisaun Jestaun Ekipamentus (IJE-ADI) ne’e nia servisu liga liu ho ekipamentu pezadu ka mákina boot sira ne’ebé iha risku ma’akas, tanba ne’e IJE-ADI desidi tau mahein ikus mai konstrui gruta ida hodi tau illas Nain-Feto Aitarak hodi sai protetór ba servisu IJE nian.

“Kuaze traballadór sira ne’e iha tempu barak liu halo servisu sira no laiha ona tempu atu ba misa, tamba ita haree dalaruma udan halo rai monu taka komunidade sira-nia rikuso’in ruma ita tenke ba normaliza lalais, entaun ita harii gruta ne’e atu hametin nafatin sira-nia fiar”, Prezidente IJE-ADI informa ba jornalista sira iha ninia knaar fatin Hera, ohin.

Kontrusaun gruta ne’e parte ida kontribuisaun husi Governu da-sia tamba bainhira mandatu remata, bele rai hela prezervasaun sagradu ida ba instituisaun ida ne’e atu nafatin hetan protesaun husi Maromak.

Iha biban ne’e Arsebispu Arkiodioseze Metropolitana Dili, Dom Virgílio Cardeal do Carmo da Silva hato’o agradese ba instituisaun ida ne’e tamba bele harii gruta na’in feto ninian ho objetivu ida katak hakarak atu lori prezensa Maromak nia besik liután iha sira-nia servisu fatin, tamba instituisaun ida ne’e nia papél ne’e boot lori ekipamentus lori la’o haleu timor laran tomak, maske dalabarak servisu iha risku nia laran.

“Nu’udar fiar na’in sira sempre tau konfiansa ba Maromak, entaun harii gruta ida ne’e husu mós Nai Maromak liu husi intersesaun harohan da’et na’in feto Aitarak-Laran nian hodi proteje traballadór sira hotu ne’ebé servisu iha ne’e”, Arsebispu hateten.

Amu Cardeal afirma katak sira sei la la’o mesak maibé hetan nafatin protesaun husi na’in-feto nia akompania ba sira-nia servisu ne’ebé nakonu ho risku oioin, tamba ne’e ohin ita mai halo inagura no misa hamutuk ho traballadór sira iha ne’e.

Entretantu inagurasaun ba gruta illas Na’in-feto Aitarak ne’e iha mós selebra misa agradesimentu no mós asina plaka husi Amu Arsebispu Arkiodioseze Metropolitana Dili, Dom Virgílio Cardeal do Carmo da Silva,SDB, partisipantes sira kompostu husi Ministru Obras Públikas (MOP), Samuel Marçal, Sekretáriu Estadu Asuntu Toponímia no Organizasaun Urbana (SEATOU), Germanu Santa Brités Dias, ekipa IJE-ADI, Madre inklui mós komunidade sira iha Hera.*

Mídia-MOP