PM XANANA NO MOP HO MEMBRU GOVERNU BALUN KOMEMORA LORON KONSULTA POPULAR HO MEMBRU ADTL IHA SARLALA-MUNISIPIU AILEU

PM XANANA NO MOP HO MEMBRU GOVERNU BALUN KOMEMORA LORON KONSULTA POPULAR HO MEMBRU ADTL IHA SARLALA-MUNISIPIU AILEU 

Aileu, 30 Agostu 2025

Primeira-vez iha Timor-Leste, ema ho defisiensia organiza responsabilidade no lidera tomak serimonia Isár Bandeira Nasional ne’ebe Primeiru-Ministru (PM), Kay Rala Xanana Gusmão mak sai hanesan Inspetor, serimonia ne’e realiza iha Sarlala, Munisipiu Aileu, Sabadu ne’e (30/08/2025).

Serimonia ne’e realiza iha ámbitu enseramentu “Semana Akampamentu Joven ho Defisiensia” ne’ebe organiza hosi Assosiasaun Defisiensia Timor-Leste (ADTL) durante semana rua, hahú hosi 25 to’o 30 Agostu 2025 ho partisipante sira mai-hosi Munisipiu Covalima, Manufahi, Ainaro, Aileu no Dili hamutuk ema na’in-150.

Pimeiru-Ministru louva teb-tebes partisipasaun ema ho defisiensia iha eventu ohin nian no apela ba Autoridade sira iha Munisipiu hotu-hotu atu fo oportunidade ba maluk defisiente sira liu-liu husu atu iha Komemorasaun Loron Proklamasaun Unilateral Independensia iha 28 Novembru, Ema ho Defisiensia mak hasae Bandeira Nasional.

“Ezemplu hosi maluk Defisiente sira ne’ebe hasae Bandeira Nasional ne’e hatudu katak sira mos bele tanba sira mos sidadaun Timor-Leste. Ba Munisipiu hotu-hotu, hau husu boot iha 28 Novembru, fo fatin ba ema ho Defisiensia mak hasae Bandeira Nasional”, hateten Primeiru-Ministru.

Iha biban ne’e Diretor Ezekutivu ADTL, Cesário da Silva hateten ohin marka istoria ida uniku tebtebes, tanba maluk defisiente sira mak sai hanesan organizador ba serimonia Isár Bandeira Nasional.

Eventu ida uniku tebtebes tanba maluk sira ho kondisaun defisiensia fiziku, liu-liu sira ne’ebe uza deit ai-tonka mak hasae Bandeira Nasional.

“Ida ne’e primeira vez iha Timor-Leste no iha mundu. Dalaruma ema haree deit sira nia kondisaun fizika no ema foti ona konkluzaun katak sira labele. Tanba ne’e, momentu ida ne’e sai hanesan momentu ida importante tebes hodi hatudu katak ema o defisiensia mos bele”, hateten Diretor Ezekutivu ADTL, Cesário da Silva.

Situasaun ida ne’e sai hanesan momentu ida nakonu ho orgullu, momentu ida ne’ebe inspira no motiva ema hotu-hotu atu loke matan ba ema ho defisiensia katak inkluzaun ne’e tenke iha duni oportunidade.

Reflesaun ba loron importante ohin, hanoin hikas Luta Libertasaun Pátria iha pasadu tenke sai duni inspirasaun ba ema hotu-hotu atu hamutuk luta liberta ema ho defisiensia hahu ohin.

“Ami Joven ho defisiensia presiza liu oportunidade. Dala barak ami la hetan oportunidade. Inisiativa ne’ebe ami halo daudaun hakarak ba públiku katak ema ho defisiensia bele” nia hateten.

Maski preparasaun ne’e loron ida deit maibe serimonia Isár Bandeira Nasional la’o diak tebtebes no susesu, hetan partisipasaun masimu hosi joven ho defisiensia sira kompostu hosi ema nain-tolu mak hasae Bandeira Nasional, ida mak sai hanesan Komandante ba serimonia tomak, koru ne’ebe hananu Hino Nasional “Patria-Patria” mak partisipante sira ho tipu defisiensia oin-oin, ezemplu sira ne’ebe defisiensia tilun sira kanta ho lian Jestual.

Iha lorokraik ekipa ne’e rasik mak prezide nafatin serimonia hatun Bandeira Nasional hafoin fahe malu.

Partisipa iha serimonia ne’e maka Ministru Obras Públika, Samuel Marçal, Ministra Solidariedade Sosial no Inkluzaun, Veronica das Dores, Sekretariu Estadu Formasaun Profesional no Empregu, Rogério Araújo Mendonça, Sekretariu Estadu ba Protesaun Sivil, Domingos Mariano Reis, Prezidente Autoridade Munisipiu Aileu, João Bosco dos Santos, ekipa Logistik Ministeriu Obras Públika, Estudante sira no Komunidade.*

Mídia-MOP