PM XANANA HO MINISTRU OBRAS PÚBLIKA SOSIALIZA PROJEITU ALARGAMENTU ESTRADA NASIONAL ERMERA IHA NUNUTALI

PM XANANA HO MINISTRU OBRAS PÚBLIKA SOSIALIZA PROJEITU ALARGAMENTU ESTRADA NASIONAL ERMERA IHA NUNUTALI

Ermera, 08 Fevereiro 2025

Primeiru Ministru, Kay Rala Xanana Gusmão akompania hosi Ministru Obras Públika, Samuel Marçal halo sosializasaun ba komunidade afeitadu sira ligado ho projeitu alargamentu estrada Gleno-Letefoho hodi realiza komprimisiu IX Governu Konstituisional ba Munisipiu Ermera.

Atividade  sosializasaun ba komunidade afeitadu sira halo iha aldeia Nunutali, Suku Humboe, Postu Administrativu Gleno, Munisipiu Ermera, iha loron Sabado ne'e.

Iha biban ne'e Primeiru Ministru, Kay Rala Xanana Gusmão hateten projeitu estrada Gleno-Letefoho ne'ebe sei halo iha tempu badak, bazeia ba iha Planu Estratejiku Dezenvolvimentu Nasional (PEDN) 2011-2030, tanba iha PEDN nia laran define klaru kona-ba infraestrutura bazika, hanesan ponte, estrada nasionais, regional hosi postu to rural inklui elektrisidade.

"Hau kontenti mai iha fatin ida ne'e, hodi bele mai koalia ho imi kona-ba iha fatin balun estrada komesa lao diak ona, balun seidauk hanesan husi Tibar mai Gleno, ita hare rai monu tanba ita nia rai fraku. Ne'ebe ba estrada ita iha problema boot, problema boot ne'e mak bainhira udan boot rai monu, rai lolon sira mesak halai halo estrada sira sai at hotu. Ohin hau dehan bainhira ita atu loke luan dalan hosi Gleno, Letefoho ba Hatulia, kafe hun ida ka rua tenki tesi, tan ne'e hau husu ba ita boot sira nia kooperasaun, labele iha impedimentu hodi fo biban ba Governu atu bele hadia estrada halo luan ho kualidade no dura ba tempu naruk" dehan PM Xanana.

Aleinde, Prezidente Autoridade Munisipiu Ermera hateten buat ida ne'ebe mak povu Ermera hein kleur mak mosu mai dadauk ne'e.

"Ohin Señor Ministru no Primeiru Ministru mai hamutuk ho ita iha ne'e para atu fo hanoin deit ba ita dehan katak ita hahu ona, maibe hahu husi hau to Xefe Suku no komunidade sira, ita hotu tenki prontu kolabora iha prosesu implementasaun".

Nia apela ba komunidade hotu tenke kolabora ho Governu, tanba tinan barak ona terus ba estrada, nune'e Nono Governu lori dadauk mai ona, nune'e tenke hamutuk fo liman ba malu, mantein paz no unidade atu projeitu lao ho susesu.

Entretantu Ministru Obras Públika, Samuel Marçal iha sosializasaun ne'e hateten objetivu husi sosializasaun ne'e mak mai koalia ho komunidade afeitadu sira kona-ba projeitu estrada Gleno-Letefoho.

"Hau atu esplika deit ba ita hotu-hotu, depois IX Governu kaer ukun, estrada Ermera sai prioridade maibe imi hotu hatene katak ita hotu hakarak buat ida rezultadu diak ho kualidade, laos ita tur foti deit kalen taka deit hodi ita mai hela ona. Maibe ita presiza tekniku sira presiza halo estudu didiak hodi halo dezeñu diak, depois mak ita foin bele halo implementasaun, kondisaun rai Ermera la hanesan ho Munisipiu seluk, rai Ermera kuaze bele dehan fatuk laiha, tanba ne'e mak tenke halo estudu didiak molok implementa projeitu estrada", hateten Ministru Obras Públika, Samuel Marçal iha nia diskursu.

"Hau tama ho tama atu hahu kedan, maibe labele tanba tenke hadia fali dezeñu, tanba mota sira uluk kiik oan, agora sai tiha mota hotu ona.

Tan ne'e ita tenke halo fali revizaun ba  dezeñu sira ne'e hotu mak han tempu uitoan, mas hau espera katak prosesu ne'e lao kuaze hotu . Mais agora halo hela prosesu tender ba ida ne'e ninian, tanba osan boot, uniku projeitu ida ne'e mak boot teb-tebes ho osan ne'ebe boot" nia esplika.

Ministru Obras Públika hatutan prosesu ba projeitu ne'e iha hela faze no koalia ona ho Primeiru Ministru Kay Rala Xanana Gusmão  atu bele aselera lalais projeitu estrada refere.

Iha biban ne'e hafoin rona tiha esplikasaun hosi Primeiru Ministru, Kay Rala Xanana Gusmão no Ministru Obras Públika komunidade promete ba Primeiru Ministru Kay Rala Xanana Gusmão katak sira prontu atu koopera hamutuk ho Governu hodi implementa projeitu ne'e no sei la husu indemnizasaun ba ai hun sira ne'ebe sei tesi hodi loke luan estrada.

 Ministru Obras Públika afrima projeitu estrada Gleno-Letefoho ne'e tuir dezeñu sei ho luan metro 10, nune'e sei afeita ba plantasaun kafe sira. Tan ne'e husu atu komunidade sira kolabora hodi labele husu ganti rugi ka indemnizasaun ba Governu.

"Ohin PM Xanana dehan estrada ne'e tenke loke halo luan, imi konkorda "Konkorda" (lian husi komunidade afeitadu). Se konkorda kona kafe hun ida imi bele fo ka lae "Fo" (lian husi komunidade afeitadu). Hau mos kontente imi koopera hakarak fo", hateten Ministru  Obras Públika.

Iha biban ne'e Autoridade Lokal sira hamutuk ho komunidade tomak promete ba Primeiru Ministru, Kay Rala Xanana Gusmão akompania hosi Ministru Obras Públika, Samuel Marçal nia oin katak sira hotu prontu koopera no kolabora ho Governu ba projeitu estrada ne'ebe durante tinan naruk sira hotu hein.

Entretantu, atividade sosializasaun ne'e hetan partisipasaun maximu hosi komunidade afeitadu sira nomos Autoridade Lokal sira hotu, Prezidente Autoridade Munisipiu ermera, Veteranus sira,  ekipa Brigida Intervensaun Rapida-Ministeriu Obras Públika (BIR-MOP), Komandante PNTL Ermera no Seluk tan.*

 Mídia MOP