MOP LANSA FATUK DAHULUK, KONSTRUSAUN ESTRADA NASIONÁL LETEFOHO-HATUBUILIKU NE'E IMPORTANTE TEBES - PM TAUR HATO'O SAUDASOENS ESPESIÁL BA KOMUNIDADE

Letefoho, 16 Maiu 2023: Ministru Obras Públikas (MOP), Eng. Abel Pires da Silva, lansa ona fatuk dahuluk ba konstrusaun estrada nasionál husi postu administrativu Letefoho, munisípiu Ermera nian ba postu administrativu Hatubuiliku, munisípiu Ainaru nian.

Projetu konstrusaun estrada husi Letefoho ba Hatubuiliku ho nia distánsia Kilometru 18 resin, ho orsamentu konstrusaun finansia husi Fundu Impréstimu husi Banku Mundiál ho montante USD 25,540,405.33, konstrui husi kompañia Internasionál China Civil Engineering Construction Coperation, Ltd (CCECC) ho durasaun durante tinan ida fulan fulan sanulu (fulan 22).

Intervensaun Sr. Ministru nian iha lansamentu ne’e hatutan mós mensajen saudasoens espesiál husi S. Exa, Primeiru Ministru (PM), Jenerál Taur Matan Ruak, ba komunidade Ermera no Ainaru espesialmente ba komunidade postu administrativu Letefoho no Hatubuiliku nian, ne’ebé sei benefisia husi projetu konstrusaun estrada ne’e.

“Ha’u hakarak hatutan saudasoens espesiál no hakuak bo’ot husi ita hotu nia na’i Primeiru Ministru Jenerál Taur Matan Ruak, ba ita hotu, inan-aman sira hotu, oan sira hotu iha ne’e, lider hotu-hotu ne’ebé hamutuk iha fatin ida-ne’e tanba S. Exa, mós hakarak hamutuk ho ita maibé tanba horseik nu’udar Prezidente Partidu Libertasaun Populár tenke halo kampaña iha Oekusi, ohin mak foin tuir dalan fila mai Dili.  Lori na’i Primeiru Ministru nia-naran, VIII Governu Konstitusionál nia-naran hakarak hato’o parabéns ba povu Letefoho no mós povu Hatubuiliku”, Sr. Ministru Obras Públikas hatutan iha nia intervensaun iha serimónia lansamentu ba konstrusaun estrada husi postu administrativu Letefoho to’o postu administrativu Hatubuiliku nian.

Sr. Ministru hatete, “Estrada ida-ne’e ha’u fiar importante tebes tanba liga populasaun ne’ebé mak hamutuk ona iha ligasaun dezde beiala sira-nia tempu. Hanesan husi reprezentante husi Banku Mundiál hato’o katak estrada ida-ne’e sei fasilita atividade lubuk ida, hanesan negósiu, agrikultura, turízmu no seluk tan”.

Iha oportunidade ne’e, Sr. Ministru mós informa mós ba komunidade sira liga ho projetu estrada ne’ebé planea ona ba munisípiu Ermera nian liga ho munisípiu viziñu sira.

“Ha’u kontenti nu’udar Ministru Obras Públikas hamriik iha fatin ida-ne’e atu deklara mós progresu ba projetu estrada sira seluk, agora daudauk iha ona prosesu tender nia-laran oinsá buka kompañia hodi hadi’ak, atualiza dezeñu ba estrada husi Humoe mai iha Letefoho. Dezeñu ba estrada ida-ne’e hotu kleur ona ha’u-nia inan-aman sira, liurai no na’i ulun sira iha ne’e maibé tanba razaun barak, razaun balun mak ha’u-nia inan-aman sira husu karun demais ba kafé huun ida, ba hali huun ida, kakeu huun ida mós husu barak teb-tebes entaun defikulta tebes Governu iha tempu ne’eba atu implementa lalais, tanba kleur oituan, dezeñu ne’e mós la kondis ona ho situasaun atuál tanba ne’e mak tenke atualiza. Tanba atualiza de’it sei la haan tempu barak, prosesu la’o ona oituan tan ita hetan manán na’in, atualizasaun hotu, ita-nia tékniku sira iha ADN (Ajénsia Dezenvolvimentu Nasionál) verifika ita bele ba lansa ona, ha’u kalkula husi esperiensia ne’ebé iha parese tinan oin nia-laran ita bele ona halo lansamentu ba tender estrada husi Humboe mai Letefoho”.

Sr. Ministru agradese ba ADN tanba ho ADN nia kontribuisaun mak estrada husi Letefoho ba Aitutu besik postu administrativu Maubise prontu ona no besik ona atu lansa ba tender.

“Atu kompleta liután estrada ida Letefoho ba Hatubuiliku ita tenke tutan ida husi Hatubuiliku tuun ba Aitutu, progresu ba estrada ida-ne’e di’ak loos, dezeñu kompleta iha tinan kotuk i ohin ita simu tiha ona rezultadu verifikasaun husi AND. La’os de’it estrada ida Humboe mai Letefoho ba Hatubuiliku, Hatubuiliku tuun ba Aitutu maibé ita mós prepara hela dezeñu atu kontinua husi Letefoho ba Atsabe no ba liu Bobonaro, prosesu ba tender dezeñu ida-ne’e prontu iha tinan kotuk kedas no ha’u fiar katak iha tinan ida-ne’e ita sei lansa tender, tender hotu iha tinan ida-ne’e ou tarde liu iha tinan oin bele ona halo dezeñu ba estrada importante ida-ne’e tan para suporta no fasilita inan-aman sira-nia moris iha rai Ermera ida-ne’e liga ba rai Bobonaru, see sei to’o  iha ne’eba entaun sei ba liu Ministru ninia rai iha Kovalima ne’eba”, Sr. Ministru esplika.

Iha munisípiu Ermera iha mós progresu ba projetu ida husi Glleno ba Aileu iha parte suku Seloi-Kraik nian, projetu ne’e nia dezeñu rprontu ona no daudauk ne’e ADN halo hela verifikasaun, iha tempu besik dezeñu bele verifikadu ona, no sei hakat ba prosesu tender tanba iha Konsellu Administrasaun ba Fundu Infraestrutura (KAFI) diskuti beibeik kona-ba projetu hirak ne’e. 

Aliende ne’e, Sr. Ministru mós informa kona-ba projetu estrada liga husi Ermera vila ba Fatubesi, ba Hatulia A, husi Tokoluli ba Bazartete, inklui husi Fatubesi ba postu administrativu Loes, munisípiu Likisa nian ne’ebé daudauk ne’e tékniku sira hetan ona orientasaun hodi hahú prosesu ba projetu refere.

Iha oportunidade ne’e Sr. Ministru agradese ba konvidadus espesiál sira iha serimónia lansamentu ne’e no inan-aman no lia-nain sira ne’ebé ho kontenti partisipa iha serimónia lansamentu ne’e no husu atu autoridade lokál no komunidade bele apoiu prosesu konstrusaun refere.

Iha fatin hanesan Reprezentante husi Banku Mundiál, Sra. Maria Isabel, reprezenta Reprezentante Banku Mundiál iha Timor-Leste, Bernard Harbone, hato’o katak sente kontenti no haksolok bele partisipa iha serimónia lansamentu ba konstrusaun estrada Letefoho ba Hatubuiliku iha projetu Timor-Leste Branch Roads ninian.

Banku Mundiál iha Timor-Leste mós hato’o parabéns ba Governu, ba Timoroan hotu liuliu komunidade Ermera no Ainaru ba serimónia lansamentu importante ne’e.

“Banku Mundiál nia mehi mak atu iha mundu ida ne’ebé laiha ema ida mak moris iha mukit ou pobreza nia-laran no dezenvolvimentu infraestrutura sai hanesan instrumentu forte ida ne’ebé mak ita bele utiliza hodi bele hamenus mukit ou pobreza, hasa’e rendimentu no ba dezenvolvimentu ekonomia, ha’u sente orgullu atu nota katak liuhosi projetu ida-ne’e bele aumenta asesu komunidade nian ba merkadu no servisu báziku prinsiál sira nune’e bele hadi’a kondisaun moris ema nian no mós fornese benefísiu ba setór sira seluk hanesan turízmu no agrikultura”, Reprezentante husi Banku Mundiál ne’e hatutan.

Banku Mundiál mós parabeniza esforsu Governu nian liuliu Ministériu Obras Públikas ne’ebé halo esforsu maka’as bele realiza projetu ne’e hodi responde ba nesesidade komunidade nian. Banku Mundiál mós sente orgullu servisu hamutuk ho Governu no povu Timor-Leste ajuda hamenus mukit ou pobreza no fahe prosperiedade ekonomia ba futuru nian no espera katak projetu ne’e bele la’o ho susesu.

Nune’e mós Prezidente Autoridade Munisipál munisípiu Ermera nian, Sr. Eusébio Salsinha, no Administrador munisípiu Ainaru, Sr. Leovegildo Amaral Pereira, agradese ba Governu tanba bele lansa ona projetu konstrusaun ba estrada entre Letefoho ba Hatubuiliku nian.

Autoridade munisípiu rua ne’e mós husu ba autoridade lokál no komunidade atu koopera iha prosesu konstrusaun ba projetu refere, liuliu ba komunidade ne’ebé hetan afeitadu husi prosesu konstrusaun refere, atu nune’e projetu ne’e bele hotu tuir nia tempu ne’ebé determina ona.

Sr. Ministru ho nia kometiva to’o iha fatin simu husi lia-nain sira ho lian dadolin tuir kultura no lisan Ermera nian, no akompaña ho tebe-dai ba fatin serimónia lansamentu nian.

Iha lansamentu ne’e partisipa husi Prezidente Autoridade Munisipál munisípiu Ermera no Ainaro nian, Komandante Polísia Nasionál Timor-Leste (PNTL) munisípiu Ermera no Ainaro, reprezentante husi Bee Timor-Leste Empreza Públika (BTL.EP), Autoridade Nasionál Lisensiamentu Ambientál (ANLA), Parte Ministériu Finansas nian, Amu Vigáriu Parokia Letefoho ninian, Diretór Jerál no Diretór Nasionál ho ekipa tékniku sira.

Partisipa mós husi administradór postu no xefe suku sira, veteranus, lia-nain, estudante sira no komunidade husi postu administrativu Letefoho no Hatubuiliku.