MOP INAUGURA PROJEITU BEE-MOOS NO SELEBRA ANIVERSARIU BTL,E.P. BA DALA LIMA (V) IHA SUKU MAUBISSE VILA

MOP INAUGURA PROJEITU BEE-MOOS NO SELEBRA ANIVERSARIU BTL,E.P. BA DALA LIMA (V) IHA SUKU MAUBISSE VILA

Ainaru, 26 Setembru 2025

Ministru Obra Públikas, Samuel Marçal akompañia ho Vise Prezidente Asuntu Parlamentár Aderito Hugo da Costa, Vise-Ministru Administrasaun Estatál, Jacinto Rigoberto G. de Deus, Prezidente Bee Timor-Leste,E.P (BTL), Gustavo da Cruz inagura projetu bee-moos inklui selebra aniversariu BTL,E.P ba dala lima (V) iha suku Maubisse Vila, Postu Administrativu Maubisse, Munisípiu Ainaru.

Iha intervensaun Ministru Obras Públikas Samuel Marçal, hato’o agradesimentu bá povu Maubisse nia pasiensia durante ne’e, maske dezenvolvimentu iha posto ne’e la’o tarde oituan maibé nafatin iha esperansa,ohin loron hahú hakat neineik konsege asesu ona bee-moos.

"Ohin ita mai iha ne’e laos inagura bee-moos maibe mai atu rona mós saida mak povu ne’e presiza, hafoin hau simu tiha posse hanesan Ministru Obras Públikas, Primeiru-Ministru fo orientasaun bá hau atu tau importánsia bá infraestrutura bázika sira iha territóriu Timor laran tanba PM hatene tebes situasaun sira ne’ebé povu infrenta,”dehan Ministru Obras Públikas.

Ministru Obras Públikas,hatete ohin loron iha ne’e marka prezensa membru Governu lubuk ida. Membru Governu sira mai hodi marka prezensa iha ne’e tanba hakarak rona saida mak povu iha Posto Maubessi ne’e hakarak.

“Responsabilidade ne’ebé atribui ona mai ami nia kba’as atu halo dezenvolvimentu hodi konkretiza povu nia mehi bá luta ukun rasik a’an, povu nia terus(fakar ran) povu nia mate. Iha fatin barak hau ba povu sempre halerik ba dezenvolvimentu bee-moos, estrada no eletrisidade, ida-ne’e povu nia direitu atu ejizi tanba estadu mai husi povu, povu nia luta mak hari'i nasaun no Estadu ida-ne’e. Tanba ne’e se de’it mak ukun iha dever tomak serbí povu ida-ne’e ho di’ak,”dehan Ministru Obras Públikas.

Entretantu Prezidente Bee Timor-Leste,E.P., Gustavo da Cruz hateten konstrusaun projetu bee ne’ebé ohin mai halo inaugurasaun ne’e, konstrui hahú iha tinan kotuk tuir kontratu termina fulan neen maibé tanba hasoru difikuldade oioin inklui mós mudansa klimatika nune’e foin finaliza iha tinan ne’e.

“Projetu bee moos ne’e rasik fahe bá pakote rua, pakote dahuluk halo kanalizasaun husi bee ulun mai tanke rezervatoriu ne’e responsabiliza husi kompañia Malaka Unipessoal,Lda no pakote daruak konstrusaun rezervatóriu ne’e responsabiliza husi kompañia Bougenville Unipessoal,Lda. Projetu bee moos ne’e gasta orsamentu hamutuk rihun maizumenus $642 no fornese bee bá populasaun hamutuk resin  2.760 husi totál uma-kain 467. Husi projetu ne’e ita iha tanke rezervatoriu boot rua ho kapasidade 150 metru kúbiku no tanke redus bee nian hamutuk hitu ho nia kapasidade 20 metru kúbiku,”tenik Prezidente Bee Timor-Leste.

Iha biban ne’e Prezidente Autoridade Munisípiu Ainaru, Manuela Carmo Bucar Corte-Real lori komunidade Ainaru nia naran hato’o agradesimentu bá membru Governu sira-nia prezensa tanba bele hakat mai Maubessi, Ainaru hodi halo inaugurasaun bee-moos bá komunidade iha Posto Maubessi.

“Hau agradese tanba hau-nia komunidade bele konsumu ona bee-moos husi BTL, ita hotu hatene preokupasaun boot ida husi komunidade mak bee-moos espera ho bee ne’e mai bele suporta atividade ekonomia família nian,”PAM Ainaro haktuir.

Partisipa iha seremonia inagurasaun projetu bee moos ne’e, Vise-Prezidente Asuntu Parlamentár, Aderito Hugo, Vise-Ministru Administrasaun Estatál, Jacinto Rigoberto G. de Deus, Prezidente Bee Timor-Leste’E.P (BTL), Deputadu CNRT, José Virgilio, Diretór Jerál Estrada Ponte Prevensaun no Kontrolu, Nene Lobato, Diretór Nasional Konstrusaun Vias Rodaviarias,Milton Ramanata de Castro Monteiro, Kordenador Unidade Inspesaun Verifikasaun no Pagamentu, Aleixo Amaral do Carmo, Diretóra Nasionál Aprovizionamentu MOP, Isabel Maria Lay Guterres, Amu Pároco Paroquia Imaculado Coração de Maria Maubisse (PICOMA Sigla Portugés),Padre João Soares, ekipa tékniku husi MOP, Jerente no funsinariu BTL,E.P, Sekretariu Grande Projetu, ADN, PNTL Posto Maubessi, Autoriedade Lokal, lia nain, komunidade no estudante sira.*

Mídia-MOP