MOP AKOMPNHA PPN NO V-PM LANSA FATUK DAHULUK BA ESTRADA BOOT MALIANA VILA

Ministru Obras Públikas (MOP), Eng. Abel Pires da Silva, akompaña S. Exa, Prezidente Parlamentu Nasionál (PPN), Dr. Aniceto Longuinhos Guterres Lopes, no Vise Primeiru Ministru no Ministru Planu no Ordenamentu (V-PM no MPO), Eng. José Maria dos Reis, lansa fatuk dahuluk dahuluk ba estrada boot iha Maliana vila, munisípiu Bobonaro.
Iha intervensaun S. Exa, Prezidente Parlamentu Nasionál kongratula Sr. Ministru Obras Públikas ho tékniku sira ministériu nian ne'ebé halo esforsu finaliza prosesu tomak ba konstrusaun estrada vila Maliana nian. Husu mós, aliende konstrusaun halo mós manutensaun ba estrada sira hodi fasilita movimentasaun komunidade nian.
Konstrusaun estrada vila Maliana nian ne'ebé lansa ona ne'e pakote daruak (II) ne'e sei konatrui estrada protokolu sira iha Maliana vila nian kuazs Kilometru 4.91 ho nia luan metru 23. Aliende ne'e sei iha pakote dahuluk (I) ne'ebé sei halo konstrusaun ba estrada urbana sira iha Maliana laran tomak, tanba ne'e hanesan Bobonaro oan, S. Exa, Prezidente Parlamentu Nasionál agradese ba lideransa S. Exa, Primeiru Ministru (PM), Jenerál Taur Matan Ruak, tanba bele halo esforsu lidera Governu hodi realiza programa sira no hatete bainhira projetu ne'e remata maka sidade Maliana sei nabilan.
Bainhira konstrusaun projetu ne'e hahú komunidade sira tenke fó kontribuisaun másimu atu nune'e projetu ne'e bele finaliza ho di'ak.
Nune'e mós S. Exa, Vise Primeiru Ministru no Ministru Planu Ordenamentu reprezenta Governu hato'o kona-ba esforsu Governu nian ba dezenvolvimentu infraestrutura liuliuliu estrada sira iha Timor laran tomak.
Iha fatin hanesan, liuhosi entrevista, Sr. Ministru Obras Públikas hatete, agradese ba tempu S. Exa, Prezidente PN no Vise PM nian hodi lansa primeira pedra ba projetu estrada boot iha Maliana vila.
"Agradese ba tempu S. Exa, Prezidente Parlamentu Nasionál bo Vise Primeiru Ministru ne'ebé mai lansa hela projetu bo'ot ida-ne'e, pakote ne'e pamote 2 (pakote daruak), nia Kilometru ne'e la to'o 5 tanba ne'e dalan bo'ot iha Maliana vila maibé nia luan ne'e mak 22 to'o 23 metrus sei luan tebes para harii sidade ida hanesan S. Exa, Prezidente Parlamentu dehan sidade Maliana ida ke nabilan", Sr. Ministru Obras Públikas informa ba jornalista sira hafoin serimonia lansamentu fatuk dahuluk iha Jinajio Maliana vila.
Projetu konstrusaun ba estrada boot iha Maliana vila ne'e manán husi kompañia Internasional husi Indonézia, Hutama Karya (Persero), liuhosi prosesu tenderizasaun ne'ebé realiza iha tinan kotuk (2022).
"Horseik (31/05/2023) Konsellu Ministru mós aprova tiha ona rezultadu tender ba pakote ida tan para kompleta estrada urbana iha Maliana laran tomak ne'ebé pakote rua ne'e mak junta hamutuk sei halo furak liutan Maliana, Pakote 1 (pakote dahuluk) ne'e sei lori ba Kámara de Kontas para fó vistu, depois ida ne'e ita lansamentu ona, entaun rua ne'e la'o hamutuk, ladun dook malu entaun tinan ida ka rua tan ne'e iha Maliana iha mudansa boot ne'e intermus estrada,"Sr. Ministru esplika.
Kona-ba indiminizasaun ba komunudade afeitadu sira, Sr. Ministru hatete "Prosesu la'o nafatin, indiminizasaun la'o normál, orsamentu ba ida-ne'e ami prepara dezde kedas tinan kotuk entaun ba oin ne'e laiha problema, karik iha problema, ita iha esperíensia barak ona estrada Laga-Baguia, Uaiaka-Kelikai, Portu Tibar, Aeroportu rasik ne'e mós prosesu negosiasaun ne'e la'o hela ne'ebé ida-ne'e la'os buat foun. Montante orsamentu ba indiminizasaun depende ba afeitadu sira".
Iha oportunidade ne'e Sr. Ministru agradese ba tékniku hotu ne'ebé esforsu-an to'o lansamentu fatuk dahuluk ba projetu refere.
Projetu konstrusaun estrada boot iha Maliana vila ne'e sei konstrui ho distánsia 4.91KM no nia luan 23M, orsamentu ba projetu ne'e husi Fundu Infraestrutura hamutuk millaun $21 resin, no implementa husi kompañia Hutama Karya.
Lansamentu estrada ne'e partisipa husi Deputadu sira husi PN, Prezidente Autoridade Munisípiu Bobonaro ho administrador postu no xefe suku sira, Amu Pároku, lia-nain, veteranu sira, autoridade seguransa no defeza nian, komunidade no estudante sira iha fatin refere.