MINISTRU OBRAS PÚBLIKA SEI KONSTRUI ESTRADA LAUTÉM OAN KOMPROMETE KOOPERA HO GOVERNU

MINISTRU OBRAS PÚBLIKA SEI KONSTRUI ESTRADA LAUTÉM OAN KOMPROMETE KOOPERA HO GOVERNU

Lospalos, 1 Março 2025

Primeiru Ministru Repúblika Demokratika Timor-Leste (PM-RDTL), Kay Rala Xanana Gusmão iha loron Sabadu ne’e akompaña hosi Ministru Obras Públika, Samuel Marçal, Ministru Justisa hala’o sosializasaun kona-ba konstrusaun Estrada iha Munisipiu ba komunidade afeitadu sira hosi Postu Lautém ba Suku Com no Postu Lautém ba Postu Lospalos Vila.

Entretantu ne’e rasik lidera hosi Primeitu Ministru Repúblika Demokratika Timor-Leste (PM-RDTL), Kay Rala Xanana Gusmão no organiza hosi Ministeriu Obras Públika (MOP), ne’ebe hala’o iha salaun GOR Lospalos Vila.

Iha intervensaun, Primeiru Ministru, Kay Rala Xanana Gusmão hateten ukun aan ida ne’e povu hosi Tutuala to’o Oe-cussi Tasi Feto ba to’o Tasi Mane, povu mak sosa ukun aan ne’e ho ruin ho raan sosa ho tanis, sosa ho terus, sosa ho mate.

“Hahu hosi Tutuala to’o Oe-cussi Tasi Feto ba to’o Tasi Mane, povu mak sosa ukun aan ne’e ho ruin ho raan sosa ho tanis, sosa ho terus, sosa ho mate, ikus povu mak sosa independensia hosi sofrimentu oin-oin mak ita bele hetan ukun aan, riku soin diak liu mak povu, tanba ida ne’e kualker Governu ida mai ukun servisu atu servi povu no nasaun, tanba Governu mak sosa ukun an ida ne’e, balun lakon familia tomak ba Luta Libertasaun nian, agora hetan ona ukun Lautém oan sira hamutuk hodi koalia kona-ba preparasaun hodi bele partisipa atu kontribui ba iha prosesu dezenvolvimentu”, hateten PM Xanana.

Primeiru Ministru, Xanana hateten emprezariu sira ne’ebe fo ona konfiansa tenke servisu ho kualidade, tanba iha futuru sei iha projeitu barak.

“Ba emprezariu sira ne’ebe fo ona konfiansa tenke servisu kualidade ho responsabilidade, atu nune’e bele hetan konfiansa iha futuru, tanba futuru projeitu barak ba Postu sira maibe tinan ida ne’e Lautém hetan projeitu rua, Lautém ba Com, Lautém mai Lospalos Vila no tinan oin mai ita sei haree tan Estrada sira liga ba Postu”, hateten PM Xanana.

Aliende ne’e Xefe Governu husu mos ba povu munisipiu Lautém liu-liu komunidade afeitadu sira, bainhira konstrusaun estrada ne’e hahu tenke koopera ho Governu atu nune’e konstrusaun estrada ne’e bele hotu lalais.

Iha fatin ne’ebe hanesan Ministru Obras Públika, Samuel Marçal hateten bainhira iha kooperasaun ne’ebe diak projeitu ida ne’e sei lao ho diak, ohin mai halo sosializasau ba komunidade afeitadu sira.

“Tanba ne’e hau husu ba ita boot sira atu koopera ho Governu, sei ita boot sira la koopera projeitu ida ne’e sei muda fali ba fatin seluk, Lautém oan sei lakon oportunidade, bainhira iha kooperasaun diak projeitu ida ne’e sei lao ho diak no sei hotu iha tempu ne’ebe badak, tanba ida ne’e sai ona komprimisiu boot, IX Governu Konstituisional ne’ebe lidera hosi PM Kay Rala Xanana Gusmão ne’ebe hakarak povu tomak tenke partisipa hotu iha prosesu dezenvolvimentu, ita hotu ne’ebe mai hamutuk iha fatin ida ne’e, mai atu rona komunidade sira nia hanoin karik projeitu ida ne’e kona plantasau ruma ne’e ita hotu nian, atu nune’e bele dudu dezenvolvimentu bele lao ba oin” hateten Ministru Obras Públika.

Iha biban ne’e mos Ministru Obras Públika (MOP) kompromente ba povu Munisipiu Lautém, iha fulan Maiu tinan ida ne’e sei konvida Primeiru Ministru atu mai hamriik iha povu Lautém nia oin hodi asina kontratu ho empreza ne’ebe atu konstrui Estrada tanba ida husu povu Munisipiu Lautém labele halo impedimentu.

Entretantu Prezidente Autoridade Munisipal Lautém, Melio de Jesus haktuir hodi povu Munisipiu Lautém nia naran hato’o Seja Bem-Vindu ba Primeiru Ministru, Kay Rala Xanana Gusmão ho nia komitiva ne’ebe bele hakat mai ona iha Munisipiu Lautém hodi partisipa iha atividade sosializasaun ba komunidade afeitadu sira ligadu ho projeitu Estrada hosi Postu Lautém ba Suku Com no Postu Lautém ba Postu Lospalos Vila. Durante tinan barak nia laran, povu Munisipiu Lautém hetan sofrimentu ba konstrusaun infraestrutura baziku liu-liu Estrada nasional mai to’o iha Munisipiu Lautém no Munisipiu ba Postu Administrativu sira.

Iha tinan ida ne’e Munisipiu Lautém hetan mega projeitu boot hamutuk 3, ida mak estrada Postu Lautém mai iha Lospalos Vila 28km ho total orsamentu hamutuk Millioens $22, Postu Lautém ba Suku Com 20km ho orsamentu hamutuk Millioens $14 no Bee mos ho orsamentu hamutuk Millioens $17 atu fornese ba uma kain hamutuk 3400 iha Munisipiu Lautém.

Iha sosializasaun ne’e, marka prezensa mos hosi Administrador Postu, reprezentante Igreja, Autoridade Lokal no komunidade Munisipiu Lautém, bainhira sosializasaun ne’e lao komunidade sira kompromete koopera ho Governu hodi simu dezenvolvimentu infraestrutura baziku hanesan Estrada atu nune’e bele fasilita komunidade lori sira nia produtu lokal ba iha merkadu.*

Mídia MOP