Infraestrutura
MINISTRU OBRAS PÚBLIKA LANSA FATUK DAHULUK BA KONSTRUSAUN PONTE DALASA SAMALARI
Baucau, 7 visualizações
MINISTRU OBRAS PÚBLIKA LANSA FATUK DAHULUK BA KONSTRUSAUN PONTE DALASA SAMALARI Baucau, 27 Março 2025 IX Governu Konstituisional liu hosi Ministeriu Obras Públika (MOP), iha Kinta-feira ne’e lansa fatuk dahuluk ba konstrusaun ponte iha mota Dalasa, Aldeia Darloi Leten, Suku Samalarai, Postu Administrativu Baguia, Munisipiu Baucau ne’ebe sei konstrui osi kompaña Internasional MCC 20 group Corp.LTD (Xina) ho montante orsamentu $ 4,025,624.71. Iha serimonia lansamentu ne’e Ministru informa tuir lolos projeitu konstrusaun ponte ne’e hahu iha fulan lima ba kotuk, maibe kompaña manan ba tenderizasaun ne’e ema estranjeiru, nia presiza prepara ekipamentus no buat hotu hodi mai halo tanba ne’e mak lansamentu ne’e tarde uitoan
MINISTRU OBRAS PÚBLIKA LANSA FATUK DAHULUK BA KONSTRUSAUN PONTE DALASA SAMALARI
Baucau, 27 Março 2025
IX Governu Konstituisional liu hosi Ministeriu Obras Públika (MOP), iha Kinta-feira ne’e lansa fatuk dahuluk ba konstrusaun ponte iha mota Dalasa, Aldeia Darloi Leten, Suku Samalarai, Postu Administrativu Baguia, Munisipiu Baucau ne’ebe sei konstrui osi kompaña Internasional MCC 20 group Corp.LTD (Xina) ho montante orsamentu $ 4,025,624.71.
Iha serimonia lansamentu ne’e Ministru informa tuir lolos projeitu konstrusaun ponte ne’e hahu iha fulan lima ba kotuk, maibe kompaña manan ba tenderizasaun ne’e ema estranjeiru, nia presiza prepara ekipamentus no buat hotu hodi mai halo tanba ne’e mak lansamentu ne’e tarde uitoan.
“Hau hato’o hau nia parabens ba povu Baguia tomak, foin tinan ida ho balun hau assume Kargu Ministru Obras Públika, Postu Baguia hetan projeitu boot rua mak hanesan projeitu Estrada hosi Laga mai Baguia no projeitu ida tan mak ohin ita lansa fatuk dahuluk ba konstrusaun Ponte Samalari”, dehan Ministru Obras Públika.
Iha biban ne’e Ministru Obras Públika enkoraja populasaun sira iha postu Baguia atu sai ezemplu diak ba munisipiu sira seluk, bainhira projeitu ida lao presiza ema hotu nia kolaborasaun diak, labele sai fali impedimentu.
“Hau husu ba populasaun postu Baguia tomak tenke sai ezemplu ba munisipiu seluk, labele halo impedimentu ba konstrusaun ne’e, hanesan iha munisipiu seluk ita ba hatun makina atu halo Estrada sira husu talas hun ida abut selu ketak, tahan selu ketak no isin selu ketak, kuitadu estadu atu mate sala-sala deit ona, hau fiar ema Baguia la hanesan ne’e, hau fo prioridade postu Baguia tanba postu rua ne’e rai ida bokur potensia tebes ba agrikultura”, hateten Ministru Obras Públika.
Iha fatin hanesan Prezidente Autoridade Munisipiu Baucau, Veneranda E. M. Lemos Martins hato’o apresiasaun ba Ministru Obras Públika ne’ebe ohin mai lansa ona fatuk dahuluk ba konstrusaun ponte Samalari.
“Ponte ne’e importante tebes ba ita atu halo ligasaun postu ba suku ba aldeia sira, nune’e mos bele fasilita ita nia maluk agrikultor sira ne’ebe halo toos ho natar bele fasilita sira lori produtu ba merkadu bainhira ponte no estrada sira prontu maka ita nia ekonomia bele sirkula iha postu Baguia nune’e mos fo moris ba komunidade sira”, dehan PAM Baucau.
Entretantu Xefi Suku Samalari, Maria Lucia Agostinha da Silva haktuir komunidade suku Samalari senti kontente loos, tanba Governu Sentral liu hosi Ministeriu Obras Públika bele responde ona komunidade nia preokupasaun, nune’e ohin konsege lansa ona fatuk dahuluk ba konstrusaun ponte samalari, tanba ne’e atu tarde ka lais komunidade hein katak konstrusaun ponte ne’e sei hotu to inagura.
Partisipa iha serimonia lansamentu fatuk dahuluk ne’e, Administrador postu Baguia, reprezentante Igreja, Autoridade Lokal no Komunidade postu Baguia iha serimonia lansamentu ne’e komunidade sira kompromete sei koopera ho Governu hodi simu dezenvolvimentu infraestrutura baziku hanesan konstrusaun ponte Samalari, atu nune’e bele fasilita komunidade lori sira nia produtu lokal ba iha merkadu.*
Mídia MOP
