MINISTRU OBRAS PÚBLIKA INAUGURA PROJEITU ELETRIFIKASAUN BA ALDEIA TOLU IHA SUKU LEBER POSTU BOBONARU

MINISTRU OBRAS PÚBLIKA INAUGURA PROJEITU ELETRIFIKASAUN BA ALDEIA TOLU IHA SUKU LEBER POSTU BOBONARU

Bobonaru, 12 Setembru 2025

Ministru Obras Públika, Samuel Marçal akompañia hosi Komisaun Ezekutivu EDTL,E.P., Dr.Paulo da Silva, Komisariu Ezekutivu Servisu Korporativu, Julio de Jesus Gonçalves, Komisariu Ezekutivu Servisu Tekniku, Roberto Manuel Marçal iha sexta-feira ne’e inaugura projeitu eletrifikasaun nasional iha Aldeia Lebertas, Mabelis, Holatas, Suku Leber, Postu Administrativu Bobonaru, Munisipiu Bobonaru.

Iha nia intervensaun Ministru Obras Públika, Samuel Marçal hato’o parabens ba komunidade Aldeia Lebertas, Mabelis no Holatas ne’ebe asesu ona eletrisidade.

“Ohin ita mai inaugura eletrisidade iha Aldeia tolu (3) ne’ebe foin asesu eletrisidade, parabens ba ita boot sira. Iha nivel Suku, kuaze 100% mak asesu ona eletrisidade, falta aldeia 186 mak seidauk asesu no Suku Leber tinan naruk la asesu eletrisidade ba futuru Governu hamutuk ho EDTL,E.P. sei foku implementa programa Timor Naroman ba aldeia sira ne’ebe seidauk asesu enerjia eletrika”, dehan Ministru Obras Públika iha nia intervensaun.

Prezidente Komisaun Ezekutivu EDTL,E.P., Paulo da Silva hato’o parabens ba komunidade aldeia tolu (3), aldeia Lebertas, Mabelis no Holatas ne’ebe ohin asesu ona eletrisidade.

“Ba dala uluk hau hatto’o agradese ba parte hotu-hotu liu-liu populasaun sira ne’ebe apoiu ona hodi implementa projeitu eletrifikasaun iha aldeia Libertas, Mabelis, Holatas suku Leber”.

Iha biban ne’e Prezidente Komisaun Ezekutivu hateten hafoin inaugura tiha eletrisidade, husu ba komunidade sira hotu atu uza eletrisidade, husu ba komunidade sira hotu atu uza eletrisidade ho didiak, uza ho kuidadu no uza ho seguru.

“Ita boot sira hakarak uza enerjia mak foin loke, se la uza hamate tiha hodi nune’e ita bele poupa eletrisidade, husu mos ba ita boot sira atu labele halo intervensaun direita presiza fo hatene tekniku sira, se lae sei fo risku ba ita nia vida rasik”, hateten Prezidente Komisaun Ezekutivu EDTL ne’e.

Prezidente Komisaun Ezekutivu haktuir ba aldeia tolu ne’ebe ohin asesu ona enerjia eletrisidade EDTL,E.P. sei fo oportunidade uza eletrisidade gratuita to’o fulan neen (6), hafoin uza gratuita ne’e remata ekipa tekniku sira sei mai halo sosializasaun antes monta kontador.

“Objetivu hosi Monta Kontador ne’e mak atu ajuda ita regulariza ita oinsa ita utiliza eletrisidade, imklui ajuda mos Governu hodi halo poupansa ba iha sosa kombustivel tanba ne’e presiza hotu-hotu nia kontribuisaun hamutuk hodi garante fornesimentu eletrisidade”, hateten Prezidente Komisaun Ezekutivu EDTL,E.P.

Projeitu Eletrifikasaun Nasional iha aldeia Lebertas, Mabelis, Holatas, Suku Leber implementa hosi kompañia Vilori Unipessoal,Lda ho volume servisu instalasaun liña media tensaun 3.25km sirkuitu, liña baixa tensaun 6.9km sirkuitu, instalasaun transformador ho kapasidade 50kVA unidade ida total benifisiariu uma-kain 186.

Partisipa iha serimonia inaugurasaun projeitu eletrifikasaun ne’e, Prezidente Komisaun E Parlamentu Nasional ba Asuntu Infraestrutura, Marcos Xavier, Prezidente Komisaun F Parlamentu Nasional, Maria Gorumali Barreto, reprezentante Prezidente Autoridade Munisipiu Bobonaru, Autoridade Postu Administrativu Bobonaru, Diretor Jeral Estrada, Ponte, Prevensaun no Kontrolu, Nene Lobato, Diretor Nasional Konstrusaun Vias Rodaviarias, Milton Ramanata de Castro Monteiro, Koordenador Unidade Inspesaun Verifikasaun no Pagamentu, Aleixo Amaral do Carmo, Xefe Unidade Planeamentu, Tito Edegar, Diretora Nasional Aprovisionamentu MOP, Isabel Maria Lay Guterres inklui ekipa tekniku husi MOP no ADN, PNTL Postu Bobonaru, F-FDTL Autoridade Lokal no Lia Nain, Komunidade no Estudante sira.*

Mídia-MOP