MINISTRU OBRAS PÚBLIKA HO EMBAIXADORA AUSTRALIA LANSA FATUK DAHULUK “PROJEITU DEMONSTRASAUN PAVIMENTU BETAUN REFORSADU HO FIBRA-FRC” BA ESTRADA RURAL IHA SUKU LIHU NO RAILACO CRAIC

MINISTRU OBRAS PÚBLIKA HO EMBAIXADORA AUSTRALIA LANSA FATUK DAHULUK “PROJEITU DEMONSTRASAUN PAVIMENTU BETAUN REFORSADU HO FIBRA-FRC” BA ESTRADA RURAL IHA SUKU LIHU NO RAILACO CRAIC

Dili, 25 Março 2025

Ministru Obras Públika, Samuel Marçal akompaña hosi Embaixadora Australia iha Timor-Leste, Caitlin Wilson liu hosi Parseiru Hametin Dezenvolvimentu Suku no Administrasaun Munisipiu (PARTISIPA), lansa fatuk dahuluk “Projeitu Demonstrasaun Pavimentu Betaun  Reforsada  Fibra” ba Estrada ligasaun hosi Postu Administrativu Railaku ba suku Lihu no Railaku-Kraik iha Munisipiu Ermera.

Iha intervensaun Ministru Obras Públika, Samuel Marçal hato’o agradesimentu ba Governu Australia liu hosi Agénsia PARTISIPA tanba bele apoiu Governu Timor-Leste implementa projeitu ne’e. Governu Australia nia apoiu mai Timor-Leste laos area Estrada nian deit maibe liu hosi setor oin-oin.

“Projeitu ida ne’e, projeitu pillotu  ida nia implementasaun úniku tebes tanba nia utilizasaun ne’e Demonstrasaun Pavimentu Betaun Reforsadu ho Fibra, material ida ne’e diak tebes tanba material fibra ne’e tau ba sementi sira hanesan uza besi. Ba Ermera liu-liu Suku Lihu no rai sira seluk fasil tebes monu bainhira udan, entaun material ida ne’e diak tebes atu uza iha fatin ne’e” dehan Ministru Obras Públika iha nia intervensaun.

 Ministru Obras Públika akresenta projeitu ida ne’e foin lansa no implementa uluk iha Ermera maibe ba oin haree rezultadu diak mak Governu Timor-Leste no Australia bele tau osan hamutuk hodi implementa ba muisipiu sira seluk ne’ebe bele implementa sistema ida ne’e.

Iha nia diskursu Embaixadora Australia mai Timor-Leste, Caitlin Wilson hateten haksolok tebes bele marka prezensa iha Railaku Ermera. Ida ne’e hanesan oportunidade diak ida atu kolabora no servisu hamutuk hodi hatudu teknolojia foun no propriadu hanesan Estrada Beton ho Fibra iha Timor-Leste, teknolojia ida ne’e bele halo estrada rural sei dura liu hia klima ida ne’ebe ho kuantidade udan boot no inundasaun okazional kada tinan.

“Hau senti kontente hasoru komunidade lokal sira hosi Suku Lihu, Railaku-Kraik no seluk tan, hein katak estrada ida ne’e ajuda hadia, ita boot sira bele asesu ba merkadu sira, edukasaun, saúde no fornese oportunidade barak iha setor seluk tan. Hau hakarak hato’o agradesimentu ba Ministru Obras Públika, Samuel Marçal ne’ebe aprova ona projeitu ne’e no konvida atu partisipa iha lansamentu projeitu Demonstrasaun Beton ho Fibra ne’ebe finansia hosi Governu Australia liu hosi programa PARTISIPA no implementa ona iha Ministeriu Obras Públika iha kolaborasaun iha nasional no municipal”, hateten Embaixadora Caitlin Wilson.

Embaixadora ne’e haktuir, Betaun Reforsa ho Fibra nu’udar teknolojia foun iha Timor-Leste tanba BRF nu’udar ajenti reforsu ne’ebe ajuda reforsa betaun, nia iha material fibrizu (fibrous) ne’ebe halo hosi makro poli propylene.

Iha fatin hanesan Administradora Postu Administativu Railaku, Munisipiu Ermera, Mikaela dos Santos hateten agradese tebes ba MOP no Governu Australia ne’ebe ohin bele lansa ona fatuk dahuluk ba estrada Lihu to’o Railaku-Kraik.

“Ami senti kontente tebes tanba ohin lansa ona fatuk dahuluk ba estrada ne’e, fiar katak depoizde fulan ne’e hau nia komunidade bele utiliza ona estrada ne’e”, Mikaela afirma.

Iha biban ne’e nia parte mos husu ba komunidade bainhira obra ne’e lao iha terenu hotu-hotu kolabora labele halo impedimentu.

Xefe Suku Lihu, Postu Administrativu Railaku, Munisipiu Ermera, Bernando Soares Babo hateten lori komunidade hosi Suku Lihu no Railaku-Kraik hato’o agradese wain ba Governu Australia no Ministru Obras Públika ne’e bele responde ona preokupasaun komunidade nian durante ne’e halerik ba estrada.

“Ami agradese tanba ohin lansa ona fatuk dahuluk ba konstrusaun estrada nian, maibe ami mos husu ba Ministeriu Obras Públika katak maske estrada hahu halo ona maibe antes ba Suku Lihu  ho Railaku-Kraik hatur mota Berá ne’ebe ponte laiha, espera ba oin Ministeriu bele halo mos ponte nune’e estrada diak ponte mos iha” nia husu.

Projeitu ne’e rasik finansia hosi Governu Australia o montante $ 454,260.94 no estrada nia kilometru hamutuk neen, ne’ebe sei kaer hosi kompaña Doben Unip. Lda no projeitu ne’e material uza Demonstrasaun Pavimentu Betaun Reforsadu ho Fibra (FRC, sigla ingles).*

Mídia MOP