Infraestrutura
MINISTRU OBRAS PÚBLIKA HATUUR FATUK DAHULUK BA PROJEITU REHABILITASAUN ESTRADA PAKOTE RUA HOSI ROTUNDA BATUGADE BA BALIBO
Bobonaro, 8 visualizações
MINISTRU OBRAS PÚBLIKA HATUUR FATUK DAHULUK BA PROJEITU REHABILITASAUN ESTRADA PAKOTE RUA HOSI ROTUNDA BATUGADE BA BALIBO Bobonaro, 11 Setembru 2025 Ministru Obras Públika (MOP), Samuel Marçal akompañia hosi Prezidente Komisaun E Parlamentu Nasional, Marcos Xavier ho Autoridade Munisipiu Bobonaru hatuur fatuk dahuluk ba projeitu rehabilitasaun estrada nasional ho distansia 12km ne’ebe fahe ba pakote rua (2) hosi Rotunda Suku Batugade ba Postu Administrativu Balibo Vila, Munisipiu Bobonaru. Iha intervensaun Ministru Obras Púlika, Samuel Marçal hateten ho lansamentu obra ida ne’e IX Governu Konstituisional lori povu Bobonaru nia naran hakat tan pasu ida ba oin.
MINISTRU OBRAS PÚBLIKA HATUUR FATUK DAHULUK BA PROJEITU REHABILITASAUN ESTRADA PAKOTE RUA HOSI ROTUNDA BATUGADE BA BALIBO
Bobonaro, 11 Setembru 2025
Ministru Obras Públika (MOP), Samuel Marçal akompañia hosi Prezidente Komisaun E Parlamentu Nasional, Marcos Xavier ho Autoridade Munisipiu Bobonaru hatuur fatuk dahuluk ba projeitu rehabilitasaun estrada nasional ho distansia 12km ne’ebe fahe ba pakote rua (2) hosi Rotunda Suku Batugade ba Postu Administrativu Balibo Vila, Munisipiu Bobonaru.
Iha intervensaun Ministru Obras Púlika, Samuel Marçal hateten ho lansamentu obra ida ne’e IX Governu Konstituisional lori povu Bobonaru nia naran hakat tan pasu ida ba oin.
“Ohin ita mai lansa tan projeitu estrada hosi Batugade ba Balibo. Hau sempre koalia iha fatin-fatin, hafoin simu posse, hau simu kedan orientasaun hosi Primeiru-Ministru, Kay Rala Xanana Gusmão atu tau matan ba infraestrutura sira iha area rural, infraestrutura sira mak hanesan estrada, bee-moos no ahi”, dehan Ministru Obras Públika ba komunidade sira iha Sede Suku Batugade, Kinta-feira ne’e.
Iha biban ne’e Ministru Obras Públika apela mos ba joven sira atu estuda didiak, karik aban bainrua sai Lider kaer ukun karik bele dezenvolve Timor-Leste iha futuru.
“Joven sira kuidadu aan ba tanba nasaun ne’e presiza imi, estuda halo didiak para bainhira imi kaer ukun karik, ukun ho didiak”, hateten Ministru Obras Públika.
Prezidente Komisaun E Parlamentu Nasional ba Asuntu Infraestrutura, Marcos Xavier hato’o agradese wain ba Ministru Obras Públika ne’ebe brani foti desizaun hodi implementa no lansa projeitu estrada Batugade-Balibo.
“Hau sente orgullu bele partisipa no sai sasin lansamentu estrada ne’ebe implementa ho orsamentu tinan 2025 no aprovadu hosi orgaun legislative. Kondisaun estrada Batugade-Balibo dezde Oitavu Governu, ami kestiona beibeik iha Plenaria Parlamentu Nasional. Maibe ohin no fim IX Governu Konstituisional bele mai lansa duni dalan ida ne’ebe importante teb-tebes ba Munisipiu Bobonaru”, hateten Prezidente Komisaun E Parlamentu Nasional ne’e.
Entretantu projeitu estrada Rotunda Batugade ba Balibo rasik fahe ba pakote rua, pakote dahuluk responsabiliza hosi Kompañia King Construction,Lda ho montante Orsamentu $ 3,439,179.37 no pakote segundu responsabiliza hosi Kompañia Timobest Trading Unipessoal,Lda ho kustu $ 4,401,638.09 durasaun kontratu ba projeitu rehabilitasaun estrada tinan ida.
Partisipa iha serimonia hatuur fatuk dahuluk ne’e, Prezidente Autoridade Munisipiu Bobonaru, Paulo Moniz Maia, Diretor Jeral Estrada, Ponte, Prevensaun no Kontrolu, Nene Lobato, Diretor Nasional Konstrusaun Vias Rodaviarias, Milton Ramanata de Castro Monteiro, Koordenador Unidade Inspesaun Verifikasaun no Pagamentu, Aleixo Amaral do Carmo, Xefe Unidade Planeamentu, Tito Edegar, Diretora Nasional Aprovisionamentu MOP, Isabel Maria Lay Guterres inklui ekipa tekniku hosi MOP ho ADN, Autoridade Postu Balibo, Autoridade Lokal no Lia Nain.*
Mídia-MOP
