MINISTRU OBRAS PÚBLIKA ENKONTRU HO DELEGASAUN UNIAUN ESTUDANTE UNIVERSITARIU MUNISIPIU ERMERA

MINISTRU OBRAS PÚBLIKA ENKONTRU HO DELEGASAUN UNIAUN ESTUDANTE UNIVERSITARIU MUNISIPIU ERMERA

Dili, 22 Setembru 2025

Ministru Obras Públika, Samuel Marçal iha Segunda-feira ne’e akompañia hosi Vise-Ministru Asuntu Infraestrutura, Júlio do Carmo, Xafe Gabinete Ministru Obras Públika, Cristovão Fausto Guterres, Koordenador PMU-Estrada, Amilcar da Costa Victor no Koordenador Unidade Inspesaun Verifikasaun no Pagamentu-Ministeriu Obras Públika (UIVP-MOP), Aleixo do Carmo Amaral ho ekipa hala’o enkontru ho delegasaun Uniaun Estudante Universitariu Munisipiu Ermera ligadu ho projeitu estrada Glen oba Letefoho.

“Ohin loron hau nia alin sira ne’ebe hola parte iha Uniaun Estudante Universitariu Munisipiu Ermera hakarak mai atu rona direita informasaun kona-ba projeitu estrada Ermera. Antes ne’e sira rona informasaun ne’ebe kontraditoriu ligadu ho projeitu estrada Gleno-Letefoho. Tanba ne’e mak ohin sira mai atu rona lolos prosesu estrada Gleno-Letefoho to’o ona iha ne’ebe”, hateten Ministru Obras Públika.

Ministru Obras Públika haktuir ezijensia ne’ebe Uniaun Estudante Universitariu Munisipiu Ermera hato’o ne’e tanba sira preokupa tebes ho kondisaun estrada sira iha Ermera.

Hau rekoñese katak kuandu tempu udan ita hotu akompañia hela, laos deit kareta ho motor labele lao maibe mos mosu asidente, kareta dala ruma baku fila halo ema lakon vida no balun tohar. Kestaun sira ne’ebe Uniaun Estudante Universitariu Munisipiu Ermera (UEUME) ne’e ita hotu nia preokupasaun no ita hotu hakarak prosesu ne’e bele lais uitoan. Hau agradese teb-tebes ba hau nia alin estudante sira hosi UEUME ne’ebe hakarak mai rona lolos esplikasaun prosesu ne’e to ona iha ne’ebe”, hateten Governante ne’e.

Iha biban ne’e Ministru Obras Públika esplika ona ba delegasaun Uniaun Estudante Universitariu Munisipiu Ermera  husu sira atu pasiensia uitoan tanba prosesu ne’e iha ona nia finalidade, hein loron hira mai tan Banku Mundial fo ona resposta diak bele hahu’u ona kontratu ba projeitu estrada Gleno-Letefoho.

“Ohin hau esplika ba sira prosesu ne’e han tempu uitoan tanba birokrasia naruk, ne’ebe dala ruma ita hakarak lalais maibe ita tenki liu hosi dalan ne’ebe legal, importante mak ita iha vontade hakarak lalais no vontade esperansa ne’e labele lakon hodi nune’e ita nia servisu ne’e bele neneik ka lalais ita tenki halo”, hateten Ministru Obras Públika.

Iha sorumutu ho Ministru Obras Públika, delegasaun hosi Uniaun Estudante Universitariu Munisipiu Ermera apresia ho sorumutu ne’e tanba parte Ministeriu Obras Públika bele fo resposta ne’ebe klaru. Alende delegasaun UEUME husu ba MOP atu aselera lalais projeitu estrada Gleno ba Letefoho.*

Mídia-MOP