MINISTERIU OBRAS PÚBLIKA KONTINUA NORMALIZA ESTRADA GLENO BA LETEFOHO, HODI HEIN KONKURSU PÚBLIKA NE’EBE MAKA PROSESU IHA CNA

MINISTERIU OBRAS PÚBLIKA KONTINUA NORMALIZA ESTRADA GLENO BA LETEFOHO, HODI HEIN KONKURSU PÚBLIKA NE’EBE MAKA PROSESU IHA CNA

Ermera, 23 Juñu 2025

Primeiru Ministru, Kay Rala Xanana Gusmão iha Segunda-feira ne’e akompaña hosi Ministru Obras Públika, Samuel Marçal observa direita progressu normalizasaun estrada diresaun Kapital Gleno ba to’o Postu Administrativu Letefoho, Munisipiu Ermera.

Hafoin to’o iha fatin normalizasaun hodi observa direita progresu normalizasaun estrada diresaun Kapital Gleno ba to’o Postu Administrativu Letefoho, Munisipiu Ermera, Primeiru-Ministru, Kay Rala Xanana Gusmão fo orientasaun ba MOP, Samuel Marçal atu kontinua halo normalizasaun hodi hein konkursu públiku ne’ebe maka prosesu hela iha CNA.

Iha biban ne’e mos Primeiru Ministru IX Governu Konstituisional kontinua enkoraza populasaun sira atu hein prosesu hotu-hotu ne’ebe oras ne’e daudaun lao hela hodi hein konkursu ba projeitu konstrusaun estrada hosi Postu Administrativu Gleno ba Letefoho.

“Agora daudaun prosesu ba konstrusaun estrada hosi Gleno mai Letefoho lao hela iha CNA, ita presiza halo uluk estudu ba buat barak molok implementa projeitu ne’e. Tenke haree didiak ninia kualidade, kalkulasaun distansia no alokasaun orsamentu, tanba osan ne’e povu nian. Maibe atu dehan ba imi katak estrada hosi Gleno sei mai to iha Letefoho”, hateten Primeiru Ministru.

Iha oportunidade ne’e Primeiru Ministru husu ba populasaun atu kolabora ho Governu bainhira implementa projeitu konstrusaun estrada ne’e iha tempu balun mai. Bainhira to’o iha Suku Goulolo, populasaun balun ho estudante sira konserta iha Sede Suku hodi simu Primeiru Ministru no hato’o sentidu agradesimentu tanba normalizasaun estrada ne’e fasilita tebes movimentu komunidade.

Iha fatin Xefe Planeamentu MOP, Tito Edegar hateten MOP halo normalizasaun ba estrada hosi Gleno ba to’o Letefoho tanba ezijensia hosi populasaun, liu-liu atu fasilita movimentu transporte públiku.

Ho ezijensia populasaun ne’e maka Ministru Obras Públika, Samuel Marçal husu rasik ba Primeiru-Ministru atu halo normalizasaun no Xefe Governu mos konkorda katak tenke halo duni, nune’e provizoriamente bele fasilita movimentu transporte públiku hodi hein prosesu tenderizasaun ba konstrusaun.

“Ita hare kondisaun estrada antes ita normaliza grave tebes. Ezemplu agora daudaun tempu kú kafe, komunidade sira atu tula deit kafe mai Dili ho kuantidade tonelade lima to’o neen labele. Ho razaun hirak ne’e maka ita halo normalizasaun hodi hein prosesu tenderizasaun ba konstrusaun iha Comissão Nacional Aprovisionamento (CNA) durante fulan ualu seidauk konklui”, hateten Xefe Planeamento MOP, Tito Edigar.

Xefe planeamentu MOP ne’e dehan prosesu normalizasaun lao lais tebes tanba durante iha terenu, ekipa traballu hetan akompañamentu direita no korazen hosi Ministru Obras Públika.

Nune’e mos pároku, Parókia Nossa Senhora do Carmo Letefoho, Padre Elio Pereira Fernandes observa katak komunidade kontente tebes ba normalizasaun estrada ne’e. Loos duni, populasaun kontente tanba durante ne’e estrada grave tebes, Bee Naliun, Rai kuak barak, difikulta duni movimentu populasaun.

Pároku ne’e louva no agradese ba Governu liu hosi  Ministru Obras Públika, Samuel Marçal ne’ebe tun direita hodi akompaña ekipa durante tempu tomak no normalizasaun ne’e lao lais tebes.

“Ida-ne’e hatudu katak, Governante ne’e iha duni vontade ba kompromissu atu responde preokupasaun populasaun iha area rural. Populasaun mos kontente ho esperansa boot ba Governu katak sei implementa duni projeitu konstrusaun estrada tama to’o Letefoho”, hateten Padre Elio.

Normalizasaun ne’e hahu kedan hosi Gleno ba Humboe, Eraulu tama to’o Letefoho ho total kilometru 28 ne’ebe tuir planu sei konklui iha loron rua tan.

Prosesu normalizasau ne’e ekipa traballu Ministeriu Obras Públika utiliza ekipamentus hosi Instituto  de Gestão de Equipamentos e Apoio ao Desemvolvimento Infraestrutura, Instituto Público (IGEADI),IP).*

Mídia MOP