KOMISAUN REVIZAUN ORSAMENTU HAHU’U SORUMUTU BA JORNADA ORSAMENTU 2026

KOMISAUN REVIZAUN ORSAMENTU HAHU’U SORUMUTU BA JORNADA ORSAMENTU 2026

Dili, 05 Agostu 2025

Komisaun Revizaun Orsamentu (KRO) hahu’u sorumutu Jornada Orsamentu 2026 hodi prepara Orsamentu Jeral Estadu (OJE) 2026 ne’ebe sei hala’o 05 to’o 29 fulan-Agostu 2025, sorumutu ne’e rasik sei realiza iha sala Auditoriu Kay Rala Xanana Gusmão, iha Ministeriu Finansas.

Komité Revizaun Orsamentu iha objetivu atu garante katak planu anuál hosi servisu no entidade Setór Públika Administrativu viavel no aliñadu ho prioridade nasional ne’ebe estabelese iha Planu Estratéjiku Dezenvolvimentu tinan 2011-2030, iha Programa Governu iha planu tempu médiu no dokumentu estratéjiku sira seluk.

Komité mos iha responsabilidade atu asegura katak dotasaun orsamental ne’ebe atribui tuir planu hirak ne’e no limite másimu ba despeza ne’ebe define ona no mos garante katak inkluzasaun dotasaun iha Orsamentu Jeral Estadu depende ba inskrisaun prévia husi ninia atividade iha planu servisu anuál ka entidade sira ne’e.

Eventu ne’e sei hahu iha tuku 08:30 dader no sei iha diskursu abertura hosi Primeiru Ministru IX Governu Konstituisional, Kay Rala Xanana Gusmão.

Iha parte dader, ekipa KRO hahu rona uluk aprezentasaun hosi Ministeriu Edukasaun no tuir kedan Ministeriu Joventude Desportu Arte no Kultura (MJDAK) parte ikus (loraik) aprezenta hosi Ministeriu Ensino Superior Siensia no Kultura (MESSK).

Enkontru ida ne’e sei diskute topiku sira ne’ebe aprezenta no sei define prioridade tetu fiscal ba OJE 2026 nian, tuir prioridade ne’ebe define, liña ministerial sei prepara sira nia proposta orsamentu setorial atu bele analiza hosi Komisaun Revizaun Orsamentu.

Komité Revizaun Orsamentu ne’e prezide hosi Primeiru Ministru, Kay Rala Xanana Gusmão, Vise-Primeiru Ministru, Ministru Koordenador Asuntus Ekonomiku no Ministru Turizmu no Ambiente, Francisco Kalbuadi Lay, Vise-Primeiru Ministru, Ministru Koordenador Asuntus Sosiais no Ministru Dezenvolvimentu Rural no Abitasaun Komunitaria, Mariano Assanami Sabino.

Ministra Finansas, Santina José Rodrigues F. Viegas Cardoso, Ministru Obras Públika, Samuel Marçal no Ministru Planeamentu no Investimentu Estratéjiku, Gastão Francisco de Sousa, Sekretariu Estadu Igualdade, Elvina de Sousa Carvalho, Prezidente Komisaun Funsaun Públika, Agostinho Letêncio, Prezidente Institutu ba Defeza Direitu Labarik, reprezentante ida hosi Asosiasaun Defisiente Timor-Leste mos sei partisipa iha sorumutu Komité Revizaun Politiku nu’udar observador.*

Mídia-MOP