Viqueque, 19 Fevereiru 2024

Ministru Obra Públika-Samuel Marçal, hamutuk ho Diretur Unidade Inspesaun Verfikasaun no Pagamentu-Aleixo Borges no Diretur Ponte no Estrada Milton Ramanata de Castro Monteiro, halo observasaun ba Estrada Lugato'i akompania hosi empreza Hoven II, segunda ne'e, observa direta estrada Lugato'i ne'ebé lokaliza iha suku Caraubalu, postu Viqueque Vila, Munisipiu Viqueque.

"Ohin hau mai hamutuk ho ekipa tékniku Ministériu Obras Públika (MOP), observa dalan Lugatoi atu foti desizaun. Karik estrada Lugato'i, labele ita tenke haree mós dalan alternativu seluk. Maibé ha'u haree ona no tékniku sira dehan bele rezolve kestaun dalan Lugato'i,"hateten Ministru Obras Públika.

Ministru Obras Públika haktuir, orsamentu ba konstrusaun Estrada Lugato'i seidauk prevee tanba orsamentu multi anuál, katak hafoin tekniku sira haree kondisaun real mak foin bele aloka orsamentu.

"Ohin ha'u mós uza kamera drone hodi haree dalan alternativu ne'ebé loke husi aldeia Buanurak to'o iha eskola sekundáriu 4 setembru. Xefe suku Caraubalu informa ona ba ha'u katak dalan alternativu ne'e ba futuru konstrui ospitál munisipál no edifísiu kamara munisipal,maibé ita sei haree iha tinan 2025. Tanba agora ita foku ba estrada lugato'i," Ministru haktuir

Hafoin observa tiha estrada Lugato'i Ministru Obras Públika ho ekipa ba hare dalan urbana iha área Boromatan suku Caraubalu ne’ebé kotu no dalan diresaun Viqueque ba Postu Uatulari.

"Ha'u mós sei ba haree direta dalan urbana sira iha kapitál Viqueque Vila,oinsa maka ita bele hadi'a tanba kondisaun aat tebe-tebes. Ha'u espera katak iha tinan ida-ne'e ita bele komesa hadi'a dalan urbana sira-ne'e,"Ministru Obras Públika akresenta

Antes atu remata halo observasaun ba Estrada urbana iha Vikeke Vila Ministru Obras Públika husu ba autoridade komunitária sira iha munisipiu Viqueque atu labele iha impedementu ruma bao bra refere.

Mota Welolo

Kona-ba mota Welolo, ne'ebé lokaliza iha aldeia Uma Boot, suku Luca, postu Viqueque Vila, Munisípiu Viqueque. Ministru Obras Públika hatete, bainhira udan para tekniku sira hahú halo normalizasaun ba mota hodi asegura komunidade ira hosi risku dezastre, ligado ho kontrusaun ponte, Ministru haktuir presija halo estudu ida klean, antes hari fila ponte foun.

"bainhira udan para ita hahú halo normalizasaun ba mota, iha futuru antes atu konstrui ponte foun, presiza halo estudu ida kle'an di'ak tanba ha'u haree mota ida ne'e uniku iha Timor tanba mota hotu- hotu nia ain bá to'o tasi, uniku mota Welolo deit mák mota ain laiha, tanba ne’e bee hala'i ba ne'ebé ita lahatene. nune'e ita presiza halo estudu ida klean ba mota welolo,"hatete Ministru Obras Públika.

Ministru haktuir, dadaun ne’e Governu liu Ministériu Obras Públika preve ona orsamentu hodi normaliza Ponte Welolo, hodi fasilita movimentasaun abitante.

"Tinan ida-ne'e ami prevee ona orsamentu purvolta millaun $1 ba normalizasaun no konstrui mota welolo, maibé orsamentu ida-ne'e seidauk fixa loos tanba presiza halo levantamentu, atu hatene loos montante orsamentu ne’e, daudaun ne'e, ekipamentu pezadu husi empreza JONIZE unipesoál L.da destaka ona iha mota Welolo, maibé udan halo mota korrente boot ne'ebé afeta ba normalizasaun no konstrusaun. Ita-nia empreza la'ós la servisu, maibé mota mak sei boot. Karik udan para ita-nia empreza hahú fali servisu hodi halo normalizasaun,”dehan Ministru Obras Públika .(*)

Mídia-MOP