Dili, 01 Setembru 2023- Primeiru-Ministru, Kay Rala Xanana Gusmão fó orientasaun ba Ministériu Obras Publika (MOP), Ministériu Planeamentu Investimentu Estrateziku (MPIE) no Ministériu Saúde (MS) atu halo reabilitasaun urjensia ba rezidensia dotor no mediku sira nia hela fatin iha Bidau Toko Baru Dili.

Orientasaun ne’e, Xefe Governu fó, hafoin hamutuk ho Ministru Obras Públika-Samuel Marçal, Ministra Saúde, Elia A. A. dos Reis Amaral no Ministru Planeamentu Investimentu Estrateziku, Gastão Francisco de Sousa bainhira hala’o vizita no obserbasaun direita ba kondisaun fiziku rezidensia ne’ebé aat ona.

“Ita presiza hadia urjensia para fasilita dotor sira bele hela ho di’ak,” dehan PM Xanana.

Hafoin halo obserbasaun, Ministru Obras Publiku, Samuel Marçal koordena kedas ho Ministra Saúde no Ministru Planeamentu Investimentu Estrateziku hodi halo preparasaun atu reabilita iha semana ne’e.

Rezidensia ne’ebé mediku Kubanu sira hela halo komesa tempu Indonézia nian kompostu hosi uma boot tolu, no coby house rua dadaun ne’e kondisaun fiziku komesa aat hanesan, uma kakuluk kalen komesa tuan no plafon dodok hotu ona, inklui moru protesaun ne’ebé halo haleu uma komesa nakosu.(remata)

Mídia MOP