PM XANANA NO MINISTRIU OBRAS PÚBLIKAS LANSA PROJEITU REABILITASAUN ESTRADA HOSI SELOI-KRAIK, AILEU BA TOKOLULI, ERMERA

PM XANANA NO MINISTRIU OBRAS PÚBLIKAS LANSA PROJEITU REABILITASAUN ESTRADA HOSI SELOI-KRAIK, AILEU BA TOKOLULI, ERMERA

Aileu, 08 Novembru 2025

Primeiru-Ministru, Kay Rala Xanana Gusmão akompañia hosi Ministru Obras Públikas, Samuel Marçal inklui membru governu sira seluk lansa fatuk dahuluk bá projeitu reabilitasaun estrada diresaun husi Seloi-Kraik "Aileu"  bá Tokoluli "Gleno, Ermera".

Iha intervensaun Primeiru-Ministru, Nonu Governo Konstitusionál, Kay Rala Xanana Gusmão hatete hafoin lansa tiha projeitu rehabilitasaun estrada  ne'e, bainhira implementa husu komunidade sira atu koopera labele bá impede kompania bainhira sira halo servisu, se komunidade sira halo impedimentu projeitu ne'e sei lala'o.

"Hanesan iha fatin balu komunidade sira sunu tiha ekipamentus, se ida ne'e akontese entaun di'ak liu ita labele hadia estrada. Ne'e duni ami hotu ne'ebé hamriik iha ne'e fiar katak komunidade liuliu joven sira atu hotu-hotu partisipa aselera lalais projetu ida ne'e hodi ita halo fali buat seluk", dehan Primeiru Ministru bá komunidade sira iha seremónia hatuur fatuk dahuluk ba projeitu reabilitasaun estrada Seloi kraik, sabado ne’e.

Tamba ne'e bainhira projeitu ne’e implementa ona, pessoal balun mai impede obra ne'e maka sei muda tiha projeitu ne'e bá munisípiu sira seluk ne'ebé presiza.

Iha fatin hanesan Ministru Obras Públikas, Samuel Marçal, hateten orgllu tanba kompania Timor Oan ida bele kompete ho kompania internasionál ba projeitu rehabilitasaun estrada ne'e no konsege manan iha prosesu tenderizasaun internasionál.

Hau orgullu tamba foin primeira vez kompania timoroan ida kompete ho kompania internasionál hodi sai vensedor ba projeitu rehabilitasaun estrada hosi Seloi Kraik ba Tokoluli. Ohin ita hotu mai iha ne'e ita la'ós hatuur de'it fatuk maibé lori mós kontratu mai asina iha povu nia oin, tamba projeitu ne’e gasta osan povu nian no projetu ne'e sai na'in ba ita hotu-hotu", hateten Ministru Obras Públikas.

Ministru Obras Públikas haktuir bainhira kompañia refere mai implementa ona povu mós iha direitu atu tau matan no involve iha prosesu dezenvolvimentu ne'e, signifika joven sira ne'ebé hakarak servisu bele ba rejistu iha kompañia hodi hetan oportunidade.

"Husu bá joven sira, imi bele ajuda hada fatuk, hadia valeta, hodi bele ajuda ekonómia família uma laran", hateten Ministru Obras Públikas.

Kona-ba aldeia balun ne'ebé seidauk asesu ba eletrisidade Ministru Obras Públikas hateten iha tinan 2026 fulan-Janeiru bele hahú asina kontratu ba aldeia sira, nune'e husu komunidade kalma uitoan tamba prosesu ne'e la'o hela.

Prezidente Autoridade Munisípiu Aileu, João Bosco dos Santos iha nia intervensaun hato'o agradese ba Nonu Governu konstitusionál tamba foin ukun tinan rua, konsege halo lansamentu ba estrada diresaun Seloi kraik ba Tokoluli Glenu, aleinde ne'e dezenvolvimentu ba estrada antes ne'e mós implementa tiha ona iha Lekidoe entaun lakleur tan kondisaum estrada sei di'ak ba ema hotu.

Iha biban ne'e mós PAM Aileu nafatin husu ba Governu atu reabilita estrada urbana iha Aileu laran.

Enkuantu projetu rehabilitasaun estrada hosi Seloi Kraik ba Tokoluli ne'e implementa husi kompania Marabia, Lda ho nia durasaun servisu tinan ida ho balun ho montante orsamentu hamutuk millaun $14,034,102.63.

Partisipa iha seremónia lansamentu projeitu rehabilitasaun estrada ne'e Ministra Finansas, Santina José Rodrigues F. Viegas Cardoso, Ministru Justisa, Sérgio de Jesus Fernandes da Costa Hornai,  Ministru Agrikultura, Pekuária, Peska no Florestas, Marcos da Cruz, Ministru Planeamentu no Investimentu Estratéjiku, Gastão Francisco de Sousa, Vise-Ministru ba Infraestruturas, Júlio do Carmo, Vise-Ministru Administrasaun Estatál, Jacinto Rigoberto G. de Deus, Sekretáriu Estadu Komunikasaun Sosiál Expedito Dias Ximenes, Sekretáriu Estadu Formasaun Profisionál no Empregu, Rogério Araújo Mendonça, Sekretáriu Estadu ba Protesaun Sivíl, Domingos Mariano Reis, Komando PNTL Munisípiu Aileu, Autoriedade Postu-Administrativu Aileu, Prezidente Autoridade Munisípiu Ermera, Autoriedade lokal sira inklui komunidade hosi Seloi Kraik no komunidade sira hosi Tokoluli.*

Mídia-MOP