PM XANANA HO MINISTRU OBRAS PÚBLIKA INAUGURA PROJEITU KANALIZASAUN BEE MOOS IHA FOHOREM

PM XANANA HO MINISTRU OBRAS PÚBLIKA INAUGURA PROJEITU KANALIZASAUN BEE MOOS IHA FOHOREM

Covalima, 10 Jullu 2025

Primeiru-Ministru, Kay Rala Xanana Gusmão ho Ministru Obras Públika, Samuel Marçal akompaña hosi Sekretariu Estadu Dezenvolvimentu Lokal, Mateus dos Santos Tallo, Sekretariu Estadu Asuntus Toponímia no Organizasaun Urbana, Germano Santa Brites Dias, Deputadu CNRT, Saul Salvador H. J., Prezidente Komisaun Ezekutivu BTL,E.P., Gustavo da Cruz ho nia komitiva inaugura projeitu Melhoramentu Sistema Bee Moos ba komunidade iha Suku Fohorem, Postu Administrativu Fohorem, Munisipiu Covalima, Kinta-feira ne’e.

Antes tama ba serimonia inaugurasaun Bee moos lia nain sira hosi Suku Fohorem, simu Primeiru Ministru ho lia dadolin tuir kultura Fohorem, Munisipiu Covalima. Hafoin simu ho lia dadolin, PM Xanana kontinua presta homenajen hodi tau ai-funan no sunu lilin iha rate matebian Alferis Ricardo ne’ebe mate iha 1975.

“Ohin ita inaugura tiha fornesimentu Bee-moos hanesan parte ida ami lori ona no responde imi nia halerik sira”, Xefe Governu hato’o kestaun ne’e iha serimonia inaugurasaun fornesimentu Bee-moos iha postu Fohorem.

Iha biban ne’e Primeiru-Ministru, Kay Rala Xanana Gusmão kontinua rona mos preokupasaun komunidade sira ne’ebe mak administrador postu Fohorem aprezenta konaba infraestrutura bazika.

Durante prezensa, Primeiru-Ministru, Kay Rala Xanana Gusmão iha postu administrativu Fohorem, Prezidente Autoridade Munisipiu Covalima ho nia estrutura hamutuk ho komunidade sira simu ho entusiazmu.

Iha intervensaun Ministru Obras Públika, Samuel Marçal haktuir hafoin simu posse iha loron 01 Jullu 2023, Primeiru-Ministru IX Governu Konstituisional fo orientasaun hodi tau atensaun ba infraestrutura sira iha teritoriu Timor laran.

“Hafoin hau simu tiha posse Primeiru-Ministru, Kay Rala Xanana Gusmão bolu hau hodi fo orientasaun, atu tau atensaun ba infraestrutura sira iha area rural, konaba Estrada ita sei preve orsamentu iha OJE 2026 hodi implementa iha tinan oin”, hateten Ministru Obras Públika.

Iha fatin hanesan, Prezidente Konsellu Administrasaun BTL,E.P., Gustavo da Cruz informa projeitu melloramentu Sistema Bee moos hodi fornese ba komunidade Fohorem ne’e fahe ba pakote II kanalizasaun no instalasaun ba tanke rezervatoriu.

“Projeitu kanalizasaun no instalasaun tanke ita gasta osan rihun $700-resin bele fornese Bee-moos ba uma-kain 200-resin ho total populasaun 2000-resin iha postu Administrativuu Fohorem, Munisipiu Covalima,” hateten Prezidente Konsellu Administrasaun BTL,E.P.. Entretantu prosesu implementasaun projeitu melloramentu Sistema Bee moos iha Fohorem, realiza durante fulan neen (6), maibe kestaun klima nune’e projeitu ne’e remata tarde uitoan, nune’e foin mak halo inaugurasaun.

Governu kompromitivu baze ba Planu Estratejiku Dezenvolvimentu Nasional iha kapital postu Administrativu 51 ne’ebe iha prioridade no iha faze implementasaun projeitu iha kapital munisipiu sira ne’ebe finaliza ona iha postu administrativu hitu no daudaun ne’e finaliza ona hein faze inaugurasaun.

Projeitu Melloramentu Sistema Bee-moos iha postu Administrasaun (PA) Fohorem, Munisipiu Covalima. Projeitu ne’e fahe ba pakote rua : konstrusaun Sistema kanalizasaun Bee moos implementa hosi kompaña Roman Junior Unip,Lda ho montante kontratu US$ 449,563.69. Fornesimentu no instalasaun tanki rezervatoriu (liner tanks) – implementa hosi kompaña Azra Unip,Lda ho montante kontratu US$ 71,517.1.

·     Tanki Rezervatoriu 26 - unidade ida (1)

·     Tanki Rezervatoriu 58 - unidade ida (1)

Entretantu rekursu Bee ne’ebe fornese ba komunidade iha Fohorem mai hosi Bee-matan Aumean 1 ho nia debitu hamutuk 3,8 litru por segundu. Total instalasaun kanu transmisaun hamutuk 2.299m (2,2km) no kanu distribuisaun hamutuk 1.454m (1,4km). Instalasaun metru kontador ba uma-kain hamutuk 210 (fo benefisiu ba populasaun besik 1.260). Kobertura hosi sistema Bee moos kobre Suku Fohorem inklui Aldeia Fatuk-Laran, Lo’ohali, Fatukbitik-laran, Sadahur no Lorokida. Sistema Bee moos ne’e liga mos ba edifisiu públiku sira hanesan postu saúde, Eskola, postu PNTL Eskuadra Fohorem, edifisiu administrasaun postu, sede suku no inklui mos igreja.*

Mídia MOP