PM XANANA AKOMPAÑIA HOSI MINISTRU OBRAS PÚBLIKA LANSA PROJEITU DILI URBAN DRAINAGE IHA PORTU DILI

PM XANANA AKOMPAÑIA HOSI MINISTRU OBRAS PÚBLIKA LANSA PROJEITU DILI URBAN DRAINAGE IHA PORTU DILI

Dili, 08 Setembru 2025

Primeiru-Ministru (PM), Kay Rala Xanana Gusmão akompañia hosi Ministru Obras Públika (MOP), Samuel Marçal hala’o lansamentu ba projeitu konstrusaun drainage (D4) hodi rezolve problema inundasaun iha Kapital Dili hahu hosi area Kaicoli tun to’o iha Portu Dili, Segunda-feira ne’e.

Durante ne’e Primeiru-Ministru preokupa tebes tanba tinan barak nia laran bainhira udan sempre bee nalihun taka tomak estrada, hoban uma komunidade tanba ne’e mak ohin ofisialmente lansa ona projeitu drainage ne’e atu bele akumula bee ho volume boot tun direita ba tasi laran.

“Atu imi bele komprende didiak bee dalan iha komando Polisia nia oin iha bee dalan boot ida hosi fali sorin balun EDTL nia sorin mos bee dalan boot, kada tinan akontese inundasaun iha area semafaru Monument Polisia nian, agora daudaun ita atu hadia hodi rezolve inundasaun iha area ne’e, ne’ebe neneik-neneik estrada ne’eba ita sei taka hodi hadia drainage ne’e”, dehan PM Xanana.

Xefe Governu fiar katak ho projeitu ida ne’e, bainhira finaliza sei laiha tan risku inundasaun ba komunidade iha area Kaicoli.

Hahu ohin kompañia implementador komesa projeitu drainage ne’e no PM Xanana fo atensaun atu servisu ho kualidade tanba osan ne’e povu nian.

Iha lansamentu ne’e Ministru Obras Públika hateten tinan-tinan kuandu hasoru inundasaun problema ne’e nia fundamental mak ida ne’e. kada tinan iha Dili Laran kuandu akontese inundasaun iha Kaikoli bainhira volume bee ne’e boot manila drainage iha semafaru Monumentu Polisia nia oin labele simu debitu be’e ho volume boot, ikus mai rezulta inundasaun iha kapital Dili, estudu ba implementasaun drainage antes ne’e ita halo uluk ona ho konsultan sira hosi Portugés no tinan ita halo revizaun uitoan hodi akumula hotu volume bee hosi Kaikoli, Vila-verde ho Audian para bele suli sai mai fatin ne’e.

“Se ita muda ninia tipu manila ba iha konstrusaun drainage ida agora no ita monta filtru hodi sarin masa aqua no plastic sira iha area semaforu Monumentu Polisia nia sorin para bele sulin ba tasi, ita bele fiar ita bele rezolve inundasaun iha parte Kaikoli, Vila-Verde imklui Audian, entaun ho ida ne’e ita bele rezolve inundasaun minimal la 100% mos 99% ita bele rezolve”, hateten Ministru Obras Públika.

Ministru Obras Públika haktuir tinan-tinan akontese inundasaun tanba bee volume boot no volume bee ne’ebe suli ba tasi ne’e nia volume kiik teb-tebes tanba manila bee dalan ne’ebe ita atu sobu ne’e nia luan 70cm, tanba ne’e mak bainhira bee nakonu iha area semaforu “Lampu Merah” Ministeriu Justisa nia oin bee Kaikoli labele suli tuir nia dalan, ikus mai alerta hotu ba Dili laran entaun ita labele rezolve problema ho nune’e kada tinan bainhira udan monu rai Primeiru-Ministru akompañia ita lao hodi halo monitorizasaun ba area sira risku inundasaun.

“Hafoin halo monitorizasaun iha area Kaikoli hau ho tekniku sira analiza didiak problema nia hun mak drainage iha area semaforu Monumentu Polisia nian ne’e, tanba manila nia luan ne’e 70cm deit, bainhira udan ne’e monu manila ne’e labele simu bee ho volume boot, mas ikus akontese inundasaun iha area Kaikoli, tinan kotuk ekipa BIR-MOP hamoos bee dalan ita haree entupidu boot, ita koko fera bee dalan hodi hamoos no bee konsege atu lori staff nain rua ba tasi”, hateten Ministru Obras Públika.

Partisipa iha serimonia lansamentu ne’e Prezidente Komisaun Ezekutivu, Bee Timor-Leste,Empreza Públika (BTL,E.P.), Gustavo da Cruz ho estrutura, Diretor DEI BTL,E.P. no seluk tan.*

Mídia-MOP